Það hefði í för með sér 0,5-1% samdrátt í landsframleiðslu að draga úr þorskveiðum í samræmi við tillögur Hafrannsóknarstofnunar, að því er fram kom á fundi Hagfræðistofnunar Háskóla Íslands með blaðamönnum í dag. Gríðarlegur munur yrði á samdrætti eftir svæðum á landinu. Langmestur yrði hann á Vestfjörðum en hverfandi hlutfallslega á höfuðborgarsvæðinu.
Að sögn Ragnars Árnasonar, stjórnarformanns Hagfræðistofnunar, eru það fyrst og fremst Vestfirðir, Norðanvert Snæfellsnes, Vetmannaeyjar og Hornafjörður og e.t.v. einstök önnur byggðarlög sem verða fyrir umtalsverðri röskun verði dregið úr þorskafla í samræmi við tillögur Hafrannsóknarstofnunar. Langmest eru áhrifin á Vestfjörðum þar sem 40% heildarverðmætasköpunar er vegna sjávarútvegs, þar af helmingur vegna þorskveiða.
Á myndinni að ofan, sem er úr skýrslu Hagfræðistofnunar, sést hlutdeild sjávarútvegs í verðmætasköpun á einstökum svæðum landsins á neðri myndinni sést hlutfall þorskveiða í heildarþátttartekjum einstakra svæða.
Ragnar segir að það samræmist góðri efnahagsstefnu við þessar aðstæður að lækka veiðigjald tímabundið við en einnig að flýta opinberum framkvæmdum, svo sem vegagerð, fjárfestingu í fjarskiptum og innviðum samfélaga á þeim svæðum sem verða fyrir mestri röskun vegna minnkandi þorskveiða.
—
Skýrslan í heild er ekki enn aðgengileg í rafrænu formi en verður væntanlega birt með þeim hætti einhvern næstu daga. Hún var unnin að ósk sjávarútvegsráðherra til að meta þjóðhagsleg áhrif aflareglu, og byggir á forsendum Hafrannsóknarstofnunar um mat á ástandi fiskistofnanna.
