Eiður Smári Guðjohnsen, landsliðsfyrirliði í knattspyrnu, varð fyrir líkamsárás í miðborg Reykjavíkur um helgina – honum var hrint og hann kýldur í andlitið. Hann slapp ómeiddur frá árásinni, ætlar ekki að kæra og var í dag á æfingum í með félögum sínum í Barcelona.
Samkvæmt heimildum Eyjunnar var Eiður Smári að koma úr þrítugsafmæli Sverris Þórs Sverrissonar, Sveppa, sem haldið var á skemmtistaðnum Dómó, á laugardagskvöldið þegar ráðist var á hann. Hann var með nokkrum félögum sínum þegar maður, sem hann þekkti ekki kallaði á hann og vildi spjalla við hann. Þegar Eiður svaraði ekki réðist maðurinn á hann og hrinti honum þannig að Eiður féll í götuna.
Þegar Eiður Smári stóð upp kom félagi mannsins að og kýldi hann í andlitið. Félagar Eiðs Smára skökkuðu leikinn en sjálfur lét hann sig hverfa af staðnum. Eiður hlaut ekki teljandi meiðsli og hefur verið á tveimur æfingum með félögum sínum í Barcelona í dag.
Eggert Skúlason, talsmaður Eiðs Smára, staðfesti við Eyjuna í dag að Eiður hefði orðið fyrir árás í miðbænum aðfaranótt sunnudags og að hana hefði borið að með þessum hætti. Hann sagði að Eiður ætlaði sér ekki að kæra árásina.
