Hollensk kona í bænum Oldenzaal sturtaði óvart 900 evrum niður um klósettið. Konan hafði einmitt verið í bankanum og tekið út peningana sem hún ætlaði að nota í sumarfríinu sínu.
Hún var í spreng þegar hún kom heim en þar sem hún sat á klósettinu féllu níu 100 evru seðlar úr rassvasa hennar í klósettið.
Hún uppgötvaði ekki hvað hafði gerst fyrr en eftir að hún sturtaði niður.
Konan sneri sér í örvæntingu til pípulagningarmanna í þorpinu, sem sneru sér að því í hvelli að ná peningunum.
Þeir sendu örmyndavél niður í klóakrörið og tókst að ná peningunum eftir nokkra stund.
Konan er nú komin í sumarfrí með aurana sína – eftir að hafa þurrkað þá að sjálfsögðu.
