eyjan.is

Jón Ásgeir sýnir „harðdrægnina”. Öryggisvörður stóð yfir brottreknum forstjóra Tals

Öryggisvörður og lögfræðingur stóðu yfir Hermanni Jónassyni forstjóra Tals þegar honum var sagt upp og vísað úr húsakynnum fyrirtækisins daginn fyrir gamlaársdag. „Óþægileg tilfinning,“ segir Hermann í viðtali við Vísi í dag og íhugar að leita réttar síns.

Uppsögnin var sögð vegna samnings sem forstjórinn gerði við Símann án þess að hafa haft samráð við stjórn fyrirtækisins, en annar samningur var í gildi við Vodafone. Hermann segist eingöngu hafa haft hagsmuni viðskiptavina Tals að leiðarljósi og vísar því á bug að stjórnin hafi ekki vitað af samningnum.

Símafyrirtækið Tal er í eigu Jóns Ásgeirs Jóhannessonar. Í Morgunblaðsgrein sem hann ritaði og birtist degi áður en Hermanni var vikið frá störfum kvaðst hann hafa tamið sér harðdrægni í viðskiptum.