Tveir erlendir auðmenn vilja kaupa stjórnarbyggingar á Íslandi og leigja þær ríkinu. Þeir telja tilboðið hagstætt því þannig fái Íslendingar erlendan gjaldeyri inn í landið. Tilboðinu hefur hins vegar verið hafnað.
Þetta kemur fram í viðtali við bresk-ástralska fjárfestinn Steve Crosser í Morgunblaðinu í dag. Hann hefur ásamt sterkefnuðum viðskiptafélaga sínum, Everhard Vissers, sýnt því áhuga að kaupa eignir og fyrirtæki hér á landi fyrir allt að tvo milljarða evra eða um 320 milljarða íslenskra króna. Meðal annars gerði hann tilboð í Morgunblaðið sem var hafnað. Þá hefur hann boðist til að yfirtaka samninginn um Tónlistarhúsið. Fjöldi annarra fjárfestinga hér á landi er í skoðun. Cosser segir að fyrir þeim félögum vaki einlægur áhugi á að taka þátt í uppbyggingunni á Íslandi.
Haft er eftir Cosser í Morgunblaðinu að fyrsta hugmynd þeirra hafi verið sú að kaupa opinberar byggingar á Íslandi og leigja hinu opinbera þær með þeim möguleika fyrir stjórnvöld að kaupa þær til baka þegar betur áraði. „Okkur var strax sagt að við gætum gleymt þeirri hugmynd,“ segir hann. Cosser segir að þeir félagar hafi enn ekki gefið upp von um að af þessum kaupum verði því framundan séu erfiðir tímar á Íslandi og þá þurfi ríkissjóður á miklu fé að halda. Hins vegar séu nú aðrar fjárfestingar í skoðun.
Ekki kemur fram hvaða stjórnarbyggingar Cosser hafði í huga, en yfirleitt er með þessu hugtaki átt við byggingar æðstu stjórnvalda. Hér á landi væru það til dæmis Stjórnarráðshúsið við Lækjargötu, Arnarhvoll og ráðuneytisbyggingar þar í grennd og hugsanlega Alþingishúsið, forsetasetrið á Bessastöðum og hús Seðlabankans.
Cosser segir ekkert hæft í því að með tilboðinu í Morgunblaðið hafi þeir verið að ganga erinda íslenskra fjárfesta. Orðrómur hefur verið á kreiki um að Björgólfur Thor Björgólfsson stæði á bak við tilboðið, en lögmaður Cosser hér á landi starfar einnig fyrir Björgólfsfeðga. „Ég get fullvissað þig um að ég þekki ekki þennan Björgólfsson. Ég gæti ekki einu sinni stafað nafnið! Sama gildir um aðra íslenska fjárfesta. Þá spyr fólk hvort við séum hákarlar sem bíðum eftir að hirða eignir á brunaútsölu. En saga okkar í fjármálum sýnir það og sannar að við erum engir hákarlar, “ segir hann við blaðamann Morgunblaðsins.
