Nýi Glitnir reynir að tryggja að kaupendur Árvakurs, útgáfufélags Morgunblaðsins, séu ekki „leppar“ fyrir þriðja aðila. Það er gert með því að spyrja tilboðsgjafa sérstaklega hvort þeir komi fram í þágu annarra. Sterkur orðrómur hefur verið á kreiki um að ástralskur fjárfestir, Steve Cosser, sem vill eignast Morgunblaðið – og raunar fleiri fjölmiðla hér á landi – gangi erinda innlendra manna. Því harðneitar hann þó sjálfur.
Fjallað er um málið á fréttaskýringarvefnum AMX í dag. Þar kemur fram að fjárfestar þurfa að leggja fram skuldbindandi tilboð í Árvakur ekki síðar en 17. febrúar næstkomandi. AMX segir að í leiðbeiningum um gagnaskil fjárfestanna sé spurt: „Er lögaðili raunverulegur aðili viðskiptanna, þ.e. kemur ekki fram í þágu þriðja aðila? Ef svo er verður að gefa upplýsingar um hver sá þriðji aðili er.“
„Sagt á mannamáli er gengið eftir því hvort verið sé að „leppa“ kaupin“, segir AMX.
Fram hefur komið að fjórir aðilar sýna Árvakri áhuga: Ástralinn Steve Cosser, Óskar Magnússon fyrir hönd hóps fjárfesta, Hallbjörn Karlsson og Árni Hauksson og Almenningshlutafélag um rekstur Morgunblaðsins sem Vilhjálmur Bjarnason fer fyrir.
