Upp hafa komið tilvik þar sem sem eignum, sem stóð til að gengju til nýju bankanna, hefur verið skilað aftur í þrotabú þeirra gömlu.
Fréttablaðið segir þessa stöðu hafa komið upp bæði hvað varðar Landsbankann og Glitni, en ekki Kaupþing. Þar hafi þó einnig verið eftir því leitað.
Kröfuhafar óttist því að verða hlunnfarnir.
Fjármálaeftirlit sér um skiptingu eigna milli nýju bankanna og gömlu, sem á í grófum dráttum að felast í því að innlendar eignir fari í nýju bankana og erlendar í þá gömlu.
Skilanefndir gömlu bankanna og tilsjónarmaður hafa það hlutverk að verja hagsmuni kröfuhafa, en sögusagnir um að „vafasömum eignum“ hafi verið skilað aftur í þá gömlu hafa valdið óróleika meðal kröfuhafanna. Þannig væri nýja bankanum hyglað á kostnað þeirra.
Fréttablaðið segist hafa heimildir fyrir því að kröfuhafar Kaupþings hafi krafið skilanefndina svara um þessi mál, en fengið þau svör að skilanefndin hafi ekki tekið við eignum inn í búið, jafnvel þótt eftir því væri leitað. Skilanefndin hafi verið hörð á því að
samþykkja bara tilskipun og lista FME yfir skiptingu eignanna á milli nýja og gamla bankans.
Árni Tómasson, formaður skilanefndar Glitnis, segir eignir hafa verið færðar til í undantekningartilvikum og sumar hafi legið á mörkum þess að vera innlendar og erlendar, jafnvel svo að erfitt væri að skilgreina þær.
Eignir úr gamla Glitni hafi ekki verið færðar yfir í Nýja Glitni. Hann segist þó vita af því að kröfuhafar hafi sett sig upp á móti yfirtöku skilanefnda bankanna á eignum úr þeim nýju og kröfuhafa hafa áhyggjur af mati á skuldabréfi Nýja Glitnis til gamla bankans. Helst óttist þeir að eignir verði verðmetnar á óhentugum tíma.
Lárus Finnbogason, formaður skilanefndar Landsbankans, hefur ekki gefið færi á viðtali vegna málsins.
