Fjárfestingafélagið Novator, sem er í eigu Björgólfs Thors Björgólfssonar, hefur selt 31% hlut sinn í Netia, sem er annað stærsta símafyrirtækið í Póllandi. Þetta kemur fram í frétt Reuters-fréttastofunnar.
Í fréttinni segir að 118 milljón hlutir í Netia-símafyrirtækinu hafi verið seldir á mörkuðum í Varsjá í gær og að í kjölfar kreppunnar á Íslandi hafi margir búist við því að Novator myndi selja hlut sinn í Netia og 75% hlut sinn í P4, sem er fjórða stærsta farsímafyrirtækið í Póllandi.
Viðskiptin nú hafi verið upp á 158 milljónir bandaríkjadala, eða 17,9 milljarða króna.
Reuter segir Novator og Netia ekki hafa viljað tjá sig um málið.
