Jóhanna Sigurðardóttir hittir erlenda fjölmiðlamenn í fyrsta sinn eftir að hún tók við embætti forsætisráðherra á blaðamannafundi sem boðaður hefur verið í Þjóðmenningarhúsinu síðdegis. Jóhanna mun mæla á íslensku, en túlkar þýða spurningar blaðamanna og svör Jóhönnu.
Fjöldi erlendra blaðamanna er á landinu vegna þingkosninganna. Umfjöllun er um kosningarnar í mörgum erlendum miðlum á netinu í dag.
Fram að þessu hafa íslenskir forsætisráðherrar jafnan talað ensku eða norðurlandamál á fundum með erlendum blaðamönnum. Leiðtogar erlendra stórvelda mæla þó yfirleitt á þjóðtungu sinni þegar þeir hitta erlenda blaðamenn.
