Líklegt er að breyta þurfi lögum um kjararáð eigi hugmyndir nýrrar ríkisstjórnar um lægri laun forstjóra ríkisstofnana að ná fram að ganga. Morgunblaðið hefur þetta eftir Guðrúnu Zoëga, formanni kjararáðs í dag.
Í stefnuyfirlýsingu ríkisstjórnarinnar er kveðið á um að „gætt verði ýtrasta aðhalds í rekstri ríkisins, þóknanir fyrir nefndir verði lækkaðar eða lagðar af, hömlur verði settar á aðkeypta ráðgjafaþjónustu og sú stefna mörkuð að engin ríkislaun verði hærri en laun forsætisráðherra. [...] Sjálfstæðum hlutafélögum í eigu ríkisins verði settar skýrar reglur um launastefnu og útgjaldastefnu í þessum anda.“
Ólíklegt er að til standi að hækka laun forsætisráðherra, en þau eru nú um 935 þúsund á mánuði, og því er ljóst að færa verður niður laun fjölmargra ríkisforstjóra því mörg dæmi eru um að embættismenn ríkisins séu á hærri grunnlaunum en sem nemur launum forsætisráðherra.
Guðrún Zoëga segir í Morgunblaðinu að eini ríkisforstjórinn sem heyrir undir kjararáð og sé með hærri laun en forsætisráðherra, sé forstjóri Landspítalans. Hún er með um 1,4 milljónir í mánaðarlaun. Forseti Hæstaréttar er með um 970 þúsund krónur í heildarlaun á mánuði. Hugsanlega séu örfáir embættismenn með álíka há og jafnvel hærri heildarlaun en forsætisráðherra, að sögn Guðrúnar.
Guðrún segir að til að kjararáð geti lækkað laun þeirra embættismanna sem fá hærri laun en forsætisráðherra, verði Alþingi væntanlega að breyta lögum um kjararáð.
Fyrir utan þá embættismenn sem heyra undir kjararáð eru ýmsir fleiri forstjórar ríkisfyrirtækja á enn hærri launum. Þannig námu mánaðarlaun og -hlunnindi forstjóra Landsvirkjunar um 1,8 milljónum í fyrra og útvarpsstjóri var með 1,5 milljónir. Hvorugur heyrir undir kjararáð heldur eru þeir ráðnir af stjórnum viðkomandi félaga, en ættu engu að síður að falla undir skilgreiningu ríkisstjórnar á „ríkislaunum“. Sama á við um forstjóra Fjármálaeftirlitsins, Samkeppniseftirlitsins, Íbúðalánasjóðs, bankastjórnar Seðlabankans og ríkisbankanna þriggja.
