Þuríður Backman, þingmaður VG, er efins um að hægt verði að afgreiða umsókn um aðild að Evrópusambandinu á þinginu sem kemur saman í lok vikunnar. Hún segir að þótt rík áhersla sé lögð á afgreiðslu málsins af hálfu Samfylkingarinnar sé ekki þar með sagt að hægt sé að lofa því eða fylgja því eftir.
Þetta kemur fram í Fréttablaðinu í dag.
Fram kemur að Þuríður er einn þeirra fimm þingmanna flokksins, sem hafa lýst því yfir að þeir muni ekki styðja tillögu um umsókn að Evrópusambandinu. Hún vill bíða með ESB-mál þangað til úr rætist í efnahagsmálum. Það taki vonandi ekki mikið meira en tvö ár. Hún segist ekki vilja tefja málið, en mikilvægt sé að það fái þinglega meðferð og verði sent til umsagnar í nefndir. Helst vilji hún þjóðaratkvæðagreiðslu um umsóknina sjálfa.
Fréttablaðið ræðir einnig við VG þingmennina Lilju Rafneyju Magnúsdóttur og Ásmund Einar Daðason sem bæði lýsa yfir andstöðu við tillögu um aðildarumsókn.
