Lars Peder Brekk, landbúnaðarráðherra Noregs, segir að Íslendingar muni ekki fá varanlega undanþágu frá fiskveiðistefnu Evrópusambandsins sæki þeir um aðild. Haldi Íslendingar það geti þeir allt eins trúað á jólasveininn.
Þetta er haft eftir honum í viðtali við fréttastofuna Avisenes Nyhetsbyrå samkvæmt norska blaðinu Verdens Gang í morgun.
Brekk situr fund sjávarútvegs- og landbúnaðarráðherra Norðurlanda á Ísafirði í þessari viku.
Í viðtalinu segir ráðherrann að Íslendingar leiki rússneska rúlletu með fiskveiðiauðlindir sínar sæki þeir um inngöngu í Evrópusambandið. Hann segir að sjávarútvegsstefna sambandsins hafi versnað frekar en hitt þrátt fyrir áform um að minnka flotann og stöðva ofveiði.
Brekk talar um að innganga Íslands í Evrópusambandið yrði eins og himnasending fyrir sambandið sem fengi stærri fiskveiðilögsögu og auknar fiskveiðiauðlindir. Hann bendir á að hvergi í grænbók Evrópusambandsins um fiskveiðar sé vikið að því að aðildarríki stjórni sjálf fiskveiðum sínum.
