Nýi seðlabankastjórinn, Már Guðmundsson, er ekki sáttur við að fjölmiðlar hafi milliliðalaust samband við hann. „Í engu öðru landi mundi blaðamaður hringja beint í seðlabankastjóra,“ er haft eftir honum á forsíðu Fréttablaðsins í dag. Már neitar þar að svara spurningu blaðamanns Fréttablaðsins um viðtal sem hann hafði veitt Reuters-fréttstofunni og vísaði á fjölmiðlafulltrúa bankans.
Vakin er athygli á þessum orðum á fréttavefnum AMX þar sem þau virðast talin til marks um hofmóð nýja seðlabankastjórans. ’Hvað hefði verið sagt, ef Davíð Oddsson [fyrrverandi seðlabankastjóri] hefði talað svona til blaðamanns? Ætli það hefði ekki verið sérstök frétt um það í 08.00 fréttum RÚV?’ er spurt á AMX. Þar velta menn því einnig fyrir sér hvort seðlabankastjóri hafi sagt eitthvað svipað við fréttamenn Reuters-fréttastofunnar.
