Efnahagsbrotadeild bresku lögreglunnar (SFO) telur að mikilvæg gögn séu að finna í fórum Kaupþings, en á meðal þeirra sem stæta nú er sannsókn er Chris Ronnie sem fékk lán frá Kaupþingi til kaupa á verslunarkeðjunni JJB Sports. Chris Ronnie var viðskiptafélagi Exista í Bretlandi, en Kaupþing lánaði honum og Exista fyrir um 27% hlut í verslunarkeðjunni.
Fulltrúar SFO eru væntanlegir til Íslands, einsog Eyjan greindi frá í gær. Ólafur Þór Hauksson, sérstakur saksóknari, og Eva Joly, ráðgjafi hans, funduðum með fulltrúum SFO í London í vikunni.
Kaupþing notað til að fela eigur?
Breska blaðið Daily Mail segir frá því í dag að lykilgögn kunni að finnast hjá Kaupþingi á Íslandi. Grunur leikur á að verslunarkeðjurnar JJB Sports og Sports Direct hafi staðið í verðsamráði. Daily Mail segir að rannsóknin beinist þó ekki aðeins að brotum auðhringa á samkeppnislögum, heldur meintum fjársvikum yfirmanna fyrirtækjanna tveggja, Mike Ashley og Chris Ronnie.
Heimildir blaðsins herma að SFO rannsaki hvort fjöldi breskra viðskiptajöfra hafi notið aðstoðar Kaupþings við að fela raunverulegar eigur sínar. Ónafngreindur heimildarmaður blaðsins segir að SFO hafi þó ekki í hyggju að rannsaka Kaupþing sem slíkt, enda ekki í þeirra verkahring. „En við teljum að Kaupþing hafi staðið fyrir óeðlilegum viðskiptaháttum í þágu fjölda breskra kaupsýslumanna.“
Kaupþing lánaði Chris Ronnie 190 milljónir punda, eða um 40 miljarða á núvirði, fyrir kaupum hans á JJB Sports. Ronnie var jafnframt viðskiptafélagi Exista, stærsta eiganda Kaupþings.
