Bjarni Benediktsson, formaður Sjálfstæðisflokksins, gagnrýndi Norðurlöndin harðlega í ræðu á þingi Norðurlandaráðs í dag fyrir að taka undir skilning Evrópusambandsins um ábyrgð vegna Icesave-skuldbindinganna og afgreiða ekki lán sem þau hefðu lofað Íslendingum fyrr en eftir blessun Alþjóðagjaldeyrissjóðsins. Aðeins Færeyingar hefðu lánað Íslendingum án skilyrða. Bjarni sagði þetta í fyrirspurnartíma Frederiks Reinfeldts, forsætisráðherra Svíþjóðar, að því er kemur fram í frétt RÚV.
Bjarni spurði Reinfeldt hvað hefði gerst, hver væri lögfræðilegur grundvöllur ákvörðunar norrænu ríkjanna. Hann sagði að Íslendingar hefðu alltaf litið á Norðurlöndin sem eina fjölskyldu og inntakið í norrænni samvinnu væri að standa saman. Íslendingar hefðu hins vegar upplifað það síðasta ár að standa nánast einir á móti öllum heiminum.
„Því miður upplifðu Íslendingar sl. haust hvernig það er að standa nánast einir í hvirfilbylnum. Aldrei áður í sögu okkar höfum við þurft eins mikið á norrænum stuðningi að halda en því miður fundum við ekki þann stuðning frá Norðurlöndunum, ef undan eru skildir bræður okkar Færeyingar,“ sagði Bjarni, samkvæmt frétt mbl.is.
Reinfeldt sagði í svari sínu að Alþjóðagjaldeyrissjóðurinn væri sú stofnun sem gæti komið þjóðum til aðstoðar þegar að kreppti. Aðstoð við þjóðir í vandkvæðum væri ekki tvíhliða heldur í gegnum alþjóðastofnanir eins og Gjaldeyrissjóðinn.
Gagnrýni af þessu tagi gætti hins vegar ekki í ræðu Jóhönnu Sigurðardóttur þegar efnt var til sérstakrar umræðu norrænu forsætisráðherranna á þinginu um hlutverk Norðurlanda í Evrópusamstarfinu.
Þar sagði Jóhanna m.a. að Ísland vildi verða ábyrgt aðildarríki ESB og hluti af liðsheildinni, svo notað væri líkingamál úr íþróttum.: „Hvað varðar stofnanir ESB, þá mun Ísland í norrænum anda vinna með þeim aðildarríkjum sem vilja auka lýðræðisleg vinnubrögð og gagnsæi innan ESB. Við munum gefa mannréttindum og velferð allra sérstakan gaum, ekki síst þegar kemur að minnihlutahópum. Við munum standa vörð um árangur Íslands og Norðurlandanna í jafnréttismálum og leggja lið baráttu ESB fyrir auknu jafnrétti kynjanna. Við viljum stuðla að auknu samstarfi smærri aðildarríkja um leið og mikilvægi samstöðu allra aðildarríkja er áréttað. Loks verður aðstæðum á Norðvestur-Atlantshafi gefinn meiri gaumur með aðild Íslands og íslensk stjórnvöld verða ávallt reiðubúin til að standa vörð um hagsmuni þjóða í þeim heimshluta. Þótt Íslendingar gangi í ESB gleyma þeir ekki næstu nágrönnum og vinum enda deilum við í meginatriðum sömu lífskjörum.“
Síðar í ávarpinu sagði Jóhanna: „Ísland er eitt fámennasta ríki Evrópu og atburðir undanfarins árs hafa sýnt að það er staðreynd sem felur í sér ákveðin takmörk. Við gerum okkur engar grillur um að ESB breytist til að þóknast okkur einum en við vitum að evrópskur samruni er stöðugt þróunarferli sem öll aðildarríki geta tekið þátt í að móta á grundvelli heildarhagsmuna. Aðildarríki ESB hafa ekki varpað fyrir róða sínum sérkennum eða sérhagsmunum og það mun Ísland heldur ekki gera.“
Ræða Jóhönnu Sigurðardóttur í heild.
