Kjósendur þurfa að velja á milli ríkisstjórnarinnar og forseta Íslands í þjóðaratkvæðagreiðslunni um Icesave-lögin sem líklega verður haldin 20. febrúar.
Þetta segir Þórunn Sveinbjarnardóttir, þingmaður Samfylkingarinnar og fyrrverandi umhverfisráðherra, á Eyjubloggi sínu í dag.
Þórunn segir að hafni kjósendur nýju Icesave-lögunum í atkvæðagreiðslunni telji hún einsýnt að ríkisstjórnin segi af sér og Jóhanna Sigurðardóttir skili umboði til stjórnarmyndunar á Bessastaði. Samþykki kjósendur lögin blasi við að forseti lýðveldisins segi af sér embætti.
„Menn verða að tefla sínar skákir til enda. Í þessari stöðu verða ekki leiknir fleiri biðleikir. Valið er fólksins og valið er skýrt: Ríkisstjórn eða forseti,“ skrifar Þórunn.
