Grein Indriða H. Þorlákssonar, aðstoðarmanns Steingríms J. Sigfússonar, fjármálaráðherra, hefur valdið mikilli óánægju og er aðstoðarmaðurinn gagnrýndur fyrir að veikja þannig samningsstöðu Íslands á sama tíma og til stendur að hefja formlegar viðræður við Breta og Hollendinga að nýju. Í greininni sagði Indriði að samningsdrög frá því í desember 2008 jafngiltu samningi um Icesave og að samninganefndin undir forystu Svavars Gestssonar, hefði verið bundin af þessum samningsdrögum.
„Þetta er makalaust innlegg í umræðuna á þessum tímapunkti og með miklum ólíkindum miðað við viðkvæma stöðu málsins í dag, að aðstoðarmaður ráðherra, sem er í virku samráði við stjórnmálaflokkana, skuli draga fram það sem hann telur málstað Íslands síst til framdráttar,“ segir Bjarni Benediktsson, formaður Sjálfstæðisflokksins í Morgunblaðinu í dag.
Steingrímur J. Sigfússson telur að Indriði hafi fulla heimild til að svara fyrir sig þegar hann telur tilefni til o g telur tímasetninguna ekki óþægilega.
Bjarni bendir á að samningsdrögin sem Indriði dró fram hafi enga þýðingu og hafi ekki verið annað en birtingarmynd þeirra krafna sem Bretar og Hollendingar héldu uppi á þeim tíma.
Einsog Eyjan benti á í gær, voru samningsdrögin aldrei lögð fyrir ráðherra í þáverandi ríkisstjórn.
Ingibjörg Sólrún Gísladóttir, fyrrverandi utanríkisráðherra, tekur undir með Bjarna.
Ingibjörg segir skjalið hafa verið til í bæði utanríkis- og fjármálaráðuneytinu. „Þetta eru einhverjir pappírar sem hafa aldrei komið inn á pólitískan vettvang og hefur bara enga þýðingu frekar en mörg önnur samningsdrög sem liggja örugglega í báðum ráðuneytum,“ segir Ingibjörg um þá merkingu sem Indriði leggur í skjalið.
Ingibjörg leggur áherslu á að um sé að ræða vinnugagn sem enginn hafa verið búinn að samþykkja. „Þetta eru furðuleg vinnubrögð. Plaggið hefur ekki nokkra þýðingu og ég átta mig ekki á því af hverju það er verið að draga það fram.“
