Anne Sibert hagfræðiprófessor, sem situr í peningastefnunefnd Seðlabankans, segir að Sigmundur Davíð Gunnlaugsson, formaður Framsóknarflokksins, veitist að tjáningarfrelsinu með hörðum viðbrögðum við grein hennar um stöðuna í Icesave-deilunni.
Einsog Eyjan sagði frá í gær, vill Sigmundur Davíð að Sibert verði rekin úr peningastefnunefndinni vegna álits hennar, sem fram kemur í greininni. Á Alþingi í gær hvatti hann Jóhönnu Sigurðardóttur, forsætisráðherra, til að vísa henni úr nefndinni.
Sibert undrast hve hörð viðbrögð greinin hefur vakið á Íslandi. Í viðtali í kvöldfréttum Ríkisútvarpsins sagði hún óskiljanlegt að stjórnmálamaður skuli veitast að tjáningarfrelsinu með þessum hætti. Sagði hún að með því væri Sigmundur Davíð að reyna að koma í veg fyrir upplýsta umræðu um efnahagslega stöðu Íslands, en hún hefði ekki gert annað en að reyna að fara yfir stöðuna á fræðilegan hátt.
„Jafnvel þó hann sé ósammála mér, þá er tjáningarfrelsið einn af hornsteinum lýðræðisins og því með öllu óskiljanlegt að hann skuli reyna að stöðva upplýsta umræðu um Icesave-málið,“ sagði Anne Sibert.
