Seðlabankinn telur að ársgamlar tölur um að heimilin skuldi 300 milljarða í erlendri mynt feli í sér nokkurt vanmat á skuldastöðunni. Skuldirnar séu líklega talsvert meiri.
Þetta kemur fram í Morgunblaðinu í dag.
Um 37 þúsund heimili tóku erlend bílalán og eru þau nema um 111 milljörðum króna samkvæmt tölum Seðlabankans, en þau gætu þó hækkað. Unnið er að nýju mati á skuldastöðunni.
Nokkur óvissa hefur skapast um hvort verðtrygging lánanna við erlent gengi standist lög eftir héraðsdóm sem féll í síðustu viku, en Hæstiréttur á eftir að fjalla um málið. Málið gæti ekki einvörðungu haft áhrif á erlend lán heimilanna. Bændur og smábátasjómenn telja að dómurinn geti líka haft áhrif á þeirra lán í erlendri mynt.
Gylfi Magnússon, efnahags- og viðskiptaráðherra, sagði á Alþingi í gær að lántakendur gætu verið í verri stöðu staðfesti Hæstiréttur niðurstöðu héraðsdóms. Hann sagði að ef Hæstiréttur staðfesti dóminn þyrfti að greiða úr málum með eðlilegum hætti og byggja á sanngjörnum sjónarmiðum.
„Þá blasir við og það er tiltekið í lögum um vexti og verðtryggingu, að miða beri við vexti sem birtir eru af Seðlabankanum og eru hagstæðustu útlánavextir bankanna á hverjum tíma,“ sagði Gylfi.
