Steingrímur J. Sigfússon, fjármálaráðherra, virðist vera búinn að fá nóg af umræðum um að ríkisstjórnin standi í vegi fyrir uppbyggingu í atvinnulífinu. Svaraði hann slíkri gagnrýni harðlega á fundi með stjórnendum í íslensku atvinnulífi í morgun. Sagði hann allt slíkt tal tómt kjaftæði.
Smugan greinir frá þessu en umræddur fundur var haldin af hálfu Samtaka atvinnulífsins og sóttu hann um 300 manns í heildina úr ýmsum kimum atvinnulífsins.
Sagði þar formaður Samtaka atvinnulífsins, Vilmundur Jósefsson, þolinmæði fólks og fyrirtækja á þrotum en fjármálaráðherra sagði þann söng enga stoð eiga sér í raunveruleikanum. Slíkt tal væri kjaftæði og að forystumenn í atvinnulífinu vissu mætavel hvers vegna erfiðlega gengi hjá atvinnulífinu að fá lánafyrirgreiðslu við þær aðstæður sem hafa verið uppi. Minnst einn forsprakki úr atvinnulífinu tók undir málflutning ráðherrans.
Í máli sínu á fundinum sagði Steingrímur mikið hrópað á virkjanir í neðri Þjórsá og jafnvel talað um tafir á þeirri framkvæmd. Ítrekaði fjármálaráðherrann að engar virkjanir séu áætlaðar á því svæði á næstunni og svo hafi aldrei verið. Þá sé enginn fótur fyrir því að orka þaðan sé eyrnamerkt álveri í Helguvík eins og margir virðist halda.
