Eignaleigufyrirtækin fjögur gætu farið í þrot gangi eftir hugmyndir Árna Páls Árnasonar félagsmálaráðherra sem þvingar þau til að afskrifa hluta bílalána til einstaklinga. Hugmyndir hans ganga út á að afskrifa bílalán niður í 110 prósent af markaðsverði.„Við höfum verið að ræða við banka og eignaleigufyrirtækin um það hvernig þau geti axlað byrðarnar og tekið þátt í þeirri skuldaaðlögun sem þarf að eiga sér stað,“ segir Árni Páll við blaðið.
Hann kallaði forsvarsmenn eignaleigufyrirtækjanna fjögurra á fund sinn á fimmtudag og reifaði þar hugmyndir stjórnvalda um þátttöku fjármálafyrirtækja í skuldaaðlögun samfélagsins. Þær fela meðal annars í sér að knýja fram afskriftir á lánum sem ekki er greiðslugeta fyrir.
Fréttablaðið hefur heimildir fyrir því að væntanlegt frumvarp ráðherra kveði á um að ábyrgð á bílalánum verði aldrei hærri en 110 prósent af markaðsverði bíls. Fari það óbreytt í gegnum Alþingi getur það þýtt að eignaleigufyrirtæki verði að færa útlán sín niður að samsvarandi prósentutölu.
Halldór Jörgensson, framkvæmdastjóri Lýsingar, telur hugmyndir ráðherra ekki nógu vel ígrundaðar. Gæta verði jafnræðis enda hætta á að þeir sem tóku mestu áhættuna og skuldi mest hagnist á fyrirhuguðum afskriftum.
Heildarvirði bílalána fyrirtækjanna nemur um hundrað milljörðum króna. Eftir því sem næst verður komist óttast forsvarsmenn eignaleigufyrirtækjanna að afskriftirnar geti reynst þeim þungar í skauti, jafnvel sett þau á hliðina.
Árni Páll deilir ekki áhyggjum þeirra: „Markmið okkar er að ná fram samhengi á milli greiðslugetu fólks og skuldabyrði. Í þeirri aðlögun kann eitthvað undan að láta,“ segir hann.
