Mestar afskriftir bílalána verða á dýrum bílum sem keyptir voru á háum lánum, gangi hugmyndir félagsmálaráðherra eftir um að afskrifa lán umfram 110% af markaðsvirði bílanna. Þetta segja talsmenn þeirra sem lánuðu fyrir kaupunum, í Morgunblaðinu í dag.
Þeir forsvarsmenn eignaleigufyrirtækjanna sem rætt var við í gær segja að stórir og dýrir bílar hafi lækkað mest í verði, hvort heldur litið sé til prósentu- eða krónutölu.
Því muni þeir sem tóku hlutfallslega há lán til kaupa á slíkum bílum hagnast mest á slíku úrræði en það séu ekki endilega þeir sem eigi í mestu greiðsluerfiðleikunum.
Þeir sem á hinn bóginn hafi t.d. lagt fram eldri bíl eða sparifé upp í kaup á nýjum muni hins vegar margir sitja uppi með sömu skuld og áður.
