Íbúðalánasjóður á nú 570 íbúðir, samkvæmt tölum sem teknar voru saman fyrir fund fjárlaganefndar Alþings í gær.
Morgunblaðið segir frá þessu í dag. Fram kemur í blaðinu að sjóðurinn hyggist nú leigja út fleiri íbúðin en hann hefur gert til þessa.
Holskefla íbúða á Austurlandi lenti á sjóðnum um síðustu mánaðamót, vegna þrots íbúðaleigufélags sem átti sjö stórar blokkir, fjórar á Reyðarfirði og þrjár á Egilsstöðum.
Við það eignaðist sjóðurinn 120 íbúðir á einu bretti, en alveg frá hruni haustið 2008 hefur íbúðum í eigu sjóðsins fjölgað mjög. Þannig átti Íbúðalánasjóður að sögn Guðmundar Bjarnasonar, framkvæmdastjóra sjóðsins, að jafnaði um og yfir fimmtíu íbúðir hverju sinni fram að hruni.
Flestar íbúðir í eigu Íbúðalánasjóðs eru á Austurlandi, 180 talsins. Á Suðurlandi á sjóðurinn tæplega hundrað íbúðir og sama fjölda íbúða á Suðurnesjum. Á öðrum stöðum á sjóðurinn færri eignir, t.d. aðeins 30 í Reykjavík.
