Katrín Jakobsdóttir, mennta- og menningarmálaráðherra, er þeirrar skoðunar að fjármunir þeir er ríkið lætur listamönnum í té í formi listamannalauna sé þannig vel varið.
Segir hún við Eyjuna lítinn vafa leika á að lista- og menningarlíf landsmanna væri alls ekki jafn fjölbreytt og lifandi eins og raun ber vitni ef ekki kæmi til slíkar greiðslur til listafólks.
Hart er nú deilt í fjölmiðlum um gildi listamannalauna í kjölfar skoðanakönnunar sem sýnir að meirihluti landsmanna er því mótfallin að ríkið skuli greiða listamannalaun. Könnun þessa framkvæmdi MMR og sýna niðurstöður hennar að 61,4% sem spurðir voru reyndust frekar eða mjög andvíg því að ríkið greiði listamannalaun.
Katrín segir málið flókið og sýnir því skilning að slíkt sé umdeilt nú um stundir en bendir á að önnur nýleg könnun Félagsvísindastofnunar Háskólans sýni svo ekki verði um villst að meirihluti Íslendinga almennt sæki list- eða menningarviðburði af ýmsu tagi reglulega. Sú könnun, þó almennari sé, sé önnur hlið á sama peningi.
„Það verður að líta á heildarmyndina í svona tilfellum. Það má ekki rugla saman listamannalaunum og heiðurslaunum eins og mér sýnist gerast í einhverjum tilvikum. Listamannalaun fær enginn nema fara fyrir úthlutunarnefnd sérstaka og til sérstaks verkefnis og því er fylgt eftir. Að mínu viti er fjármunum til listamannalauna vel varið.“
