Ekki virðist allt hafa verið með felldu í innri starfsemi SPRON í aðdragandi yfirtöku Fjármálaeftirlitsins á sparisjóðnum og eru meiri líkur en minni að slitastjórn sjóðsins að málsóknir vegna riftunar- og skaðabótamála séu í farvatninu. Samkvæmt úttekt slitastjórnar sjóðsins lítur út fyrir að almennir kröfuhafar fái milli 10 og 12 prósent upp í kröfur.
Slitasstjórnin hélt fund með kröfuhöfum Sparisjóðs Reykjavíkur og nágrennis, SPRON, í dag og gerði fundarmönnum grein fyrir stöðu mála. Eignir búsins eru 150 milljarðar króna að teknu tilliti til niðurfærslna en lýstar kröfur í búið nema 250 milljörðum alls. Hefur slitastjórn tekið afstöðu til 95 prósent þeirra krafna. Erlendir aðilar eiga kröfur í 70 prósent samþykktra krafna en slitaferlið allt getur tekið allt upp í fjögur ár.
Stærsti kostnaðarliður búsins er vaxtaskuldbinding gagnvart Arion banka sem Fjármálaeftirlitið hefur úrskurðað um. Samkvæmt honum eru vextirnir tæplega milljarður króna á mánuði sem að mati slitastjórnar er verulega umfram áhættu og kostnað bankans af yfirtöku innlána SPRON. Hefur slitastjórn farið fram á endurskoðun þessarar ákvörðunar við Fjármálaeftirlitið.
