Upplýsingar sem ríkisskattstjóri hefur fengið frá bönkunum um hlutabréfaviðskipti sýna samkvæmt bráðabirgðatölum að 127 milljarða tekjur eru vantaldar á framtölum. Ekki er gerð grein fyrir þessum viðskiptum á skattframtölum. Skúli Eggert Þórðarson ríkisskattstjóri segir að nú sé komið í ljós, sem skattyfirvöld hafi lengi grunað, að þessi mál hafi alls ekki verið í lagi.
Frá þessu er greint í Morgunblaðinu í dag.
„Við höfum hamrað á því aftur og aftur að það yrði að efla upplýsingagjöf frá fjármálafyrirtækjunum til skattyfirvalda. Þetta fyrirkomulag sem hefur verið notað á síðustu árum hefur sýnt sig að vera ekki nægilega traust,“ er haft eftir Skúla Eggert í Morgunblaðinu.
Fram kemur í frétt blaðsins að fyrir nokkrum árum óskaði ríkisskattstjóri eftir að fá upplýsingar um hlutabréfaviðskipti. Bankarnir hafi ekki viljað afhenda upplýsingarnar sem leitt hafi til þess að allir viðskiptabankarnir þrír höfðuðu mál gegn ríkisskattstjóra til að fá það viðurkennt að þeir þyrftu ekki að afhenda upplýsingarnar. Þeir hafi tapað málunum fyrir héraðsdómi og hæstiréttur staðfest þá niðurstöðu. Það hafi gengið seint að fá upplýsingarnar afhentar, m.a. vegna þess að það hafi kostað talsverða vinnu að taka þær saman.
„Þessar upplýsingar eru loksins komnar í hús og fyrstu bráðabirgðatölur sýna að það séu um 127 milljarða tekjur vanframtaldar sem ekki hafi verið gerð grein fyrir á framtölum,“ segir ríkisskattstjóri í Morgunblaðinu.
Tekið er fram að frá þessari upphæð eigi eftir að draga kaupverð hlutabréfa og eins geti verið að eitthvað af þessum hlutabréfum hafi verið talin fram á nafni einkahlutafélaga. Til viðbótar þessu séu umtalsverðar tekjur af hlutabréfaviðskiptum hjá lögaðilum sem eftir sé að fara yfir og kanna hvort skilað hafi sér í framtölum fyrirtækja.
Loks kemur fram í frétt Morgunblaðsins að þessar vantöldu tekjur séu til viðbótar vantöldum tekjum vegna afleiðuviðskipta, sem sagt var frá í gær, en þær skipta mörgum milljörðum.
