Hvorki fleiri né færri en sextán einstaklingar hafa látist í banaslysum hér á landi síðastliðin tólf ár sem rekja má nánast eingöngu til einhvers konar veikinda ökumanna. Í allnokkrum tilvikum reyndist lyfjanotkun ökumanns vel yfir eitrunarmörkum og ökuhæfni því eðlilega mjög skert.
Kemur þetta fram í tölum sem Rannsóknarnefnd umferðarslysa hefur tekið saman fyrir Eyjuna en nefndin hefur gegnum tíðina vakið athygli á að að veikindi fólks undir stýri sé alvarlegt vandamál. Sýna enda tölurnar það svart á hvítu enda aðeins tæplega helmingi færri látist vegna slíkra slysa og þeirra sem látist hafa af völdum ölvaðra ökumanna síðasta ártug eða svo.
Byggir nefndin tölurnar á niðurstöðum krufningarskýrslna auk annarra tengdra gagna frá heilbrigðisstarfsmönnum. Meginorsök umferðarslysa er þegar ökumenn eiga við hjarta- og eða æðasjúkdóm að stríða og fá aðsvif undir stýri. Geðræn vandamál eru önnur helsta orsök slíkra slysa.
Vekur athygli og um leið áhyggjur hjá Rannsóknarnefnd umferðarslysa hversu oft lyfjaeitrun kemur við sögu hjá þeim ökumönnum sem valdir eru að banaslysi Vegna þessa hefur nefndin bent á að einstaklingar sem eiga við veikindi að stríða og þurfa að neyta lyfja verða að líta í eigin barm og meta ökuhæfi sitt með gagnrýnum hætti. Aðstandendur þeirra og læknar geta þar einnig haft hönd í bagga.
