Stuðningur áhorfenda á Laugardalsvelli dugi ekki til í kvöld.
Íslenska karlalandsliðið í fótbolta byrjar undankeppni Evrópumótsins jafn illa og því gekk í undankeppni síðustu heimsmeistarakeppni. Fyrsta leik liðsins lauk með 1:2 tapi gegn Norðmönnum á Laugardalsvelli í kvöld.
Íslendingar hófu leikinn reyndar vel og voru 1:0 yfir í leikhléi. Heiðar Helguson skoraði markið á 38. mínútu, hans ellefta mark í 50 A-landsleikjum. Brede Hangeland jafnaði svo leikinn og Mohammed Abdellaoue skoraði sigurmark Norðmanna.
Kýpur náði jafntefli við Portúgal
Í riðli Íslendinga náðu Kýpurbúar jafntefli gegn Portúgölum á útivelli í miklum markaleik, 4:4. Kýpur jafnaði leikinn einni mínútu fyrir leikslok.
Nýkrýndir heimsmeistarar Spánar unnu öruggan sigur á Liechtenstein á útivelli, 0:4. Fernando Torres skoraði tvö og þeir David Villa og David Silva sitt markið hvor.
Englendingar fóru létt með Búlgari á Wembley í kvöld, 4:0, og skoraði Jermain Defoe þar hat-trick, eða þrennu.
Frakkar byrja illa undir stjórn Laurent Blancs, en þeir töpuðu fyrir Hvít-Rússum á heimavelli, 0:1.
Öll úrslit kvöldsins má sjá á vef UEFA.
