Arion banki segist vera að verja fjárhagslega hagsmuni sína með því að gera kyrrstöðusamninga við einstaka skuldara. Bankinn hafi á undanförnum mánuðum fryst lán fjölda skuldara, einstaklinga sem fyrirtækja, í þeirri von að það muni auðvelda innheimtu skuldanna.
Bankinn hafnar því að gerð kyrrstöðusamninga feli í sér sérkjör fyrir einstaka skuldara. Bent er á að þó að einn kröfuhafi geri kyrrstöðusamning við skuldara hafi það ekki áhrif á aðgerðir annarra lánardrottna viðkomandi.
Bankinn hefur óskað eftir fundi með Umboðsmanni skuldara vegna ummæla í sjónvarpi um þetta mál í gærkvöldi.
Yfirlýsing Arion banka í heild:
Að gefnu tilefni vill Arion banki árétta eftirfarandi um kyrrstöðusamning (e. stand still agreement) við eignarhaldsfélagið Gaum:
• bankinn leitar allra leiða til að tryggja hagsmuni sína sem kröfuhafa í þessu máli sem öðrum
• kyrrstöðusamningar eru í ákveðnum tilvikum leið til verja slíka hagsmuni og eru í eðli sínu tímabundin frysting lána meðan unnið er að greiningu og úrlausn vandans
• Arion banki hefur tímabundið fryst lán hjá hundruðum viðskiptavina sinna, einstaklingum sem fyrirtækjum, á undanförnum mánuðum
• í öllum þessum tilvikum væntir bankinn þess að eitthvað það gerist áður en fresturinn er úti sem verði til þess að bankinn sjái hagsmunum sínum betur borgið sem kröfuhafi
• kyrrstöðusamningar eru gerðir til nokkurra daga, vikna eða til lengri tíma
• fjöldi kyrrstöðusamninga hefur verið gerður hér á landi síðustu misserin þar sem ýmist einn kröfuhafi eða fleiri saman gefa skuldurum færi á að endurskipuleggja fjármál sín
• öll umræða um að kyrrstöðusamningur feli í sér sérkjör fyrir útvalda er því villandi
• aðgerðir í einstökum málum eru háðar mati í hverju tilfelli með hagsmuni bankans að leiðarljósi
• þó að einn kröfuhafi geri kyrrstöðusamning við skuldara, hefur það ekki áhrif á fullnustuaðgerðir annarra kröfuhafa
• í ljósi ummæla Umboðsmanns skuldara mun bankinn óska eftir fundi með embættinu
