Þingmannanefnd undir forystu Atla Gíslasonar til að fjalla um skýrslu rannsóknarnefndar Alþingis hefur fundað daglega að undanförnu. Engar fundargerðir hafa hins vegar verið birtar á vef Alþingis síðan 27. ágúst. Búist er við því að nefndin kveði fljótlega upp úr um það hvort ástæða sé til að kalla Landsdóm saman í fyrsta sinn og höfða mál á hendur fyrrverandi ráðherrum vegna ábyrgðar þeirra á bankahruninu haustið 2008. Skýrsla nefndarinnar mun vera tilbúin í meginatriðum.
Fundur hefur verið boðaður í nefndinni í fyrramálið. Af dagskránni er ekkert hægt að ráða um stöðu málsins. Nefndarmenn eru þögulir sem gröfin.
Fjöldi sérfræðinga hefur að undanförnu verið kallaður á fund nefndairnnar. Fram kemur í fundargerð frá 27. ágúst að hún m.a. hafi fengið tvo sérfræðinga á sviði fjármála, Ragnar Önundarson og Aðalstein Jónasson, til að lesa yfir skýrsludrögin.
