Aftur verður biðlað til Ólafs Ragnars um að synja fjölmiðlalögum staðfestingar, þó af ólíkum ástæðum enda frumvörpin ólík.
Skorað verður opinberlega á forseta Íslands að synja nýjum fjölmiðlalögum staðfestingar, verði þau samþykkt óbreytt frá Alþingi. Menntamálanefnd afgreiddi frumvarpið úr nefnd í síðustu viku og því stefnir allt í að frumvarpið verði að veruleika, að óbreyttu.
Líkt og Eyjan greindi frá í síðustu viku eru ýmis ákvæði í frumvarpinu sem vekja óánægju þeirra sem standa fyrir frjálsri fjölmiðlun. Meðal annars á að koma á fót Fjölmilastofu, sem getur úrskurðað einhliða um starfsemi fjölmiðla og verður ákvörðunum stofnunarinnar ekki skotið til annars stjórnvalds. Auk þess segir í 37. grein frumvarpsins:
„Bann við hatursáróðri. Í fjölmiðlum er óheimilt að kynda undir hatri á grundvelli kynþáttar, kynferðis, kynhneigðar, trúarskoðana, þjóðernis, stjórnmálaskoðana eða menningarlegrar, efnahagslegrar eða félagslegrar stöðu í samfélaginu.“
Þetta túlka andstæðingar frumvarpsins sem alvarlega aðför að tjáningarfrelsinu, enda huglægt mat hverju sinni hvenær kynnt er undir hatursáróður vegna stjórnmálaskoðana. Því mun hópurinn senda frá sér yfirlýsingu:
„Við undirrituð skorum á forseta Íslands að beita málskotsrétti skv. 26.gr.stjórnarskárinnar verði fyrirliggjandi frumvarp um fjölmiðla samþykkt sem lög frá Alþingi.
Fjölmiðlafrumvarpið er alvarleg atlaga gegn sjálfstæði frjálsra fjölmiðla á Íslandi og felur í sér íþyngjandi afskipti framkvæmdavaldsins af starfsemi fjölmiðla og myndi grafa undan skoðana-og tjáningarfrelsi í landinu.
Ritskoðun má aldrei lögfesta með beinum eða óbeinum hætti. Fjölmiðlafrumvarpið er ógnun við áframhaldandi starfsemi frjálsra fjölmiðla á Íslandi.“
Jónas Kristjánsson, fyrrverandi ritstjóri, gagnrýndi frumvarpið í pistli um helgina, sérstaklega fyrrgreinda lagagrein. Jónas skrifaði:
„Undarleg eru fyrirhuguð fjölmiðlalög Katrínar Jakobsdóttur. Tengjast vinstri áráttu miðstýringar hugarfars. Lögin banna grófar skoðanir, „sem kynda undir hatri“. Það er orðalag, sem Stóri bróðir elskar að misnota. Betra er að hafa engar reglur um skoðanir og framsetningu þeirra. Lögin stofna ríkisritskoðun undir heitinu Fjölmiðlastofa. Hún á að boða og banna og beita viðurlögum án þess að áfrýja megi úrskurðum. Af hverju má ekki lasta Múhameð spámann eða Katrínu Jakobsdóttur? Af hverju má ekki segja Vinstri græna útúr-spillta og þjóðkirkjuna undir áhrifum myrkrahöfðingjans? Katrín er úlfur í sauðargæru.“
