Fjárfest fyrir tvöfalt meira en tekjur nema
Dótturfyrirtæki Orkuveitu Reykjavíkur, Gagnaveitan, hefur eytt sem nemur tæplega átta milljörðum króna á síðustu sex árum til uppbyggingar á ljósleiðaraneti á höfuðborgarsvæðinu. Tekjur fyrirtækisins af þessu á sama tímabili nema aðeins 3,5 milljörðum.
Morgunblaðið gerir þetta að umtalsefni en endurskipulagning OR stendur fyrir dyrum og segir Haraldur Flosi Tryggvason, stjórnarformaður, að starfsemi Gagnaveitunnar sé eitt af því sem verið er að skoða.
Af fjárfestingum Gagnaveitunnar á þessu ári má ráða að þar á bæ séu menn að bæta við í stað þess að draga saman því fjárfest hefur verið fyrir tíu milljónir króna hærri upphæð nú en á sama tíma í fyrra.
