eyjan.is

Ný könnun MMR gefur til kynna umskipti í afstöðu til borgarstjóra: 61,7% segjast nú óánægðir

Borgarstjórinn í Reykjavík nýtur nú mun minni vinsælda en í fyrra samkvæmt könnun frá MMR

Íslendingar eru flestir jafnánægðir og þeir voru í fyrra með vinnuna sína, nágrannana og sumarfríið en veðrið veldur talsvert fleiri vonbrigðum en áður.

Hins vegar eru umskipti orðin í afstöðu fólks til Jóns Gnarr borgarstjóra í Reykjavík, ef marka má nýja könnun MMR.

Hann naut almennra vinsælda í fyrra, miðað við mælingu sem þá var gerð .

61,7% þeirra sem tóku nú afstöðu í könnun MMR  segjast nú óánægð með borgarstjórann í Reykjavík.

Í ágúst í fyrra voru aðeins 22,4% óánægð með Jón Gnarr.

Þá voru 77,6% ánægð með borgarstjórann en nú aðeins 38,3%.

72,5% aðspurðra tóku afstöðu til spurningarinnar í ár.

Fyrir utan ánægju og óánægju með borgarstjórann birtir MMR svör við spurningum um ánægju og óánægju með veðrið, sumarfríið, vinnuna og nágrannana.

Þar tóku um 90% afstöðu og reyndust nær allir ánægðir. Um og yfir 90% tóku afstöðu til sömu spurninga í fyrra.

91% eru ánægðir með nágrannana, 90,2% eru ánægð með sumarfríið og 89,9% eru ánægð með vinnuna sína.

Þetta eru allt smávægilegar breytingar frá afstöðunni í fyrra þegar ánægjan með þessa þætti var á bilinu 91,2-92,9%.

Veðrið vekur hins vegar ekki sömu lukku þátttakenda í viðhorfahópi MMR og í fyrra.

62% svarenda segjast ánægðir með veðrið í sumar en 94,7% voru ánægð með veðrið fyrir ári síðan.

„Könnunin var framkvæmd dagana 15.-18. ágúst 2011 og var heildarfjöldi svarenda 818 einstaklingar,“ segir í tilkynningu MMR.

Leiðrétt: Í upphaflegri frétt var sagt að upplýsingar um mælingu MMR frá í fyrra hefðu ekki birst fyrr en nú en það er ekki rétt, þær voru birtar í september 2010 en upplýsingar um ánægju með veður, nágranna, fjárhagsstöðu og vinnu birtust hins vegar í desember 2010