Segir þörf á siðvæðingu og lýðræðisvæðingu – Tekur ákvörðun um framboð á næstu vikum
Stefán Jón Hafstein segist munu taka ákvörðun um það á næstu vikum hvort hann bjóði sig fram í embætti forseta Íslands. Þetta segir Stefán Jón í viðtali við Eyjuna.
Nafn Stefáns er eitt af þeim sem hvað oftast kemur upp í umræðunni um arftaka Ólafs Ragnars Grímssonar sem tilkynnti í gær að hann myndi ekki bjóða sig fram til endurkjörs. Tveir hafa þegar tilkynnt um framboð sitt: Elísabet Jökulsdóttir rithöfundur og Þorgrímur Þráinsson. Stefán segir að tilkynning Ólafs Ragnars í gær hafi í raun engin áhrif á hann.
„Í raun og veru hefur þessi ákvörðun Ólafs ekki áhrif á mig því ég var búinn að hugsa erindi næsta forseta. Ég gaf það út í haust að það yrði að kjósa nýjan forseta árið 2016 sem hefði ákveðið erindi og væri með ákveðið umboð frá þjóðinni. Ég hefði alveg þorað að taka slag við Ólaf Ragnar eða hvern sem er með það erindi og þær hugmyndir sem ég hef,“ segir Stefán.
Hann bætir við að gríðarlegt átak þurfi í umhverfismálum á heimsvísu sem og baráttu gegn fátækt og forseti Íslands eigi að leika þar veigamikið hlutverk. Þá segir hann að þörf sé á siðvæðingu og lýðræðisvæðingu í hinu pólitíska landslagi hér á landi.
„Það þarf endurreisn í íslenskum stjórnmálum, það er í rauninni það sem ég hef verið að tala um frá hruni og raunar fyrir hrun. Ég gaf út ritgerð fyrir tíu árum sem heitir „Breytum rétt“ þar sem ég tala um siðvæðingu og lýðræðisvæðingu í íslenskum stjórnmálum. Skrifaði einnig talsvert margar greinar um það eftir hrun, að jafnhliða efnahagslegri endurreisn eftir hrun þyrfti að fara fram stjórnmálaleg endurreisn á Íslandi. Síðastliðið sumar og svo með haustinu benti ég á að 2016 og 2017 eru tvennar kosningar þar sem almenningur getur krafist ákveðinnar siðvæðingar og lýðræðisvæðingar í samfélaginu. Ég taldi einfaldlega að það væru komin kaflaskipti og Ólafur, sem fulltrúi gömlu stjórnmálanna, væri ekki boðberi nýrra tíma á þessu augnabliki,“ segir hann.
Viðtalið má lesa í heild hér.