eyjan.is

87,7% Íslendinga andvíg hugmyndum um lögleiðingu kannabisefna

Eindregin og vaxandi andstaða mælist við lögleiðingu kannabisefna hérlendis.

Einungis 12,3% þjóðarinnar eru hlynnt lögleiðingu kannabisefna.

87,7% eru andvíg – þar af 75,2% mjög andvíg – því að efnið verði lögleitt.

Þetta er niðurstaða nýrrar skoðanakönnunar MMR.

Andstaða við lögleiðingu mælist vaxandi því í síðustu könnun fyrirtækisins fyrir réttu ári sögðust 83,1% andvíg lögleiðingu.

Mikill kynjamunur er á afstöðunni. Þannig eru 18,7% karla en aðeins 6,8% kvenna hlynnt lögleiðingu kannabisefna.

Hugmyndin nýtur einnig mest fylgis meðal yngsta aldurshópsins en 26,1% fólks á aldrinum 18-29 ára segist hlynnt lögleiðingu en aðeins 5,8% fólks yfir fimmtugu.

Einnig kemur fram að 23,4% fólks í lægsta tekjuhópnum er hlynnt lögleiðingu en í öðrum tekjuhópum er 9-13% stuðningur við lögleiðingu.

Hugmyndin um lögleiðingu nýtur mest fylgis meðal stuðningsmanna Framsóknarflokksins, eða 13,4%. 12,7% Samfylkingarkjósenda styðja lögleiðingu, en 7,9% kjósenda Sjálfstæðisflokksins og 6,0% kjósenda Vinstri grænna.

Tæplega 900 manns voru í úrtaki og tóku 95,2% afstöðu til spurningarinnar.