eyjan.is

Þjóðin stendur á öndinni eftir ótrúlegt viðtal í Kastljósinu. „I love you man. I love you man.“

Óhætt er að fullyrða að þjóðin standi á öndinni eftir eitthvert eftirminnilegasta sjónvarpsviðtal síðari ára, sem birt var í Kastljósinu í kvöld við Eirík Inga Jóhannsson, sem komst lífs af er togarinn Hallgrímur fórst undan ströndum Noregs í síðustu viku og þrír félagar hans úr áhöfn skipsins fórust.

Samskiptavefir á borð við Facebook og Twitter hafa logað í kvöld þegar þjóðin ber saman bækur sínar um upplifun sína af viðtali Sigmars Guðmundssonar ritstjóra Kastljóssins, sem leyfði viðmælanda sínum lengstum að hafa orðið í kvöld er hann lýsti reynslu sem enginn vill nokkru sinni upplifa í sínu lífi.

Eiríkur Ingi kvaðst í viðtalinu hafa farið gegnum ótal hugsanir er skipið sökk og hann svamlaði um í sjónum:

Þú verður að vera brattur, hugsaðu til barnanna þinna. Þú verður að komast heim til barnanna þinna og konu.

Og hann lýsti æðruleysinu sem hann upplifði:

Ég gerði samkomulag við sjálfan mig; ég ætla að tolla í tíu tíma. Ég ætla ekki að gefast upp

Þegar Eiríkur Ingi heyrði fyrst í björgunarþyrlunni og sá hana síðast, synti hann í áttina til hennar:

Svo sá ég sigmanninn koma niður. Ég synti beint í fangið á honum og sagði: „I love you man. I love you man.“

Þórarinn Jón Magnússon, einn reyndasti fjölmiðlamaður landsins, segir um viðtalið:

Ég er ekki frá því að vert væri að veita skipsverjanum Eiríki (sem bjargaðist af Hallgrími) sérstök fjölmiðlaverðlaun Eddunnar fyrir að halda athygli án nokkurs innskots mynda eða spurninga í ríflegum Kastljósþætti. Verður með eftirminnilegustu atriðum Kastljóss fyrr og síðar.

Sigríður Arnardóttir (Sirrý) fjölmiðlakona segir:

Þetta merkilega viðtal við Eirík Inga Jóhannsson í Kastjósi kvöldsins er svo lærdómsríkt fyrir okkur hin sem aldrei höfum kynnst hættum hafsins. Hann greindi líka svo vel frá samkennd sjómanna, mætti hugarfarsins og ólíkum tilfinningum sem toguðust á í honum á björgunarstund þ.e. bæði gleði og sorg. Ógleymanleg frásögn.

Ragnheiður Elín Clausen skrifar:

Einlægasta og áhrifamesta viðtal sem ég man eftir í íslensku sjónvarpi … maður situr lamaður.

Sjá hér viðtal Kastljóssins í kvöld sem allir eru að tala um.