eyjan.is

Sofnar frávísunartillaga Bjarna Ben í þingnefnd? Ekki meirihluti í nefndinni fyrir afgreiðslu

Svo kann að fara að þingsályktunartillaga Bjarna Benediktssonar, formanns Sjálfstæðisflokksins, um að vísa frá kæru á hendur Geir H. Haarde fyrrverandi forsætisráðherra fyrir Landsdómi, fáist ekki afgreidd út úr þingnefnd og komist þannig ekki til síðari umræðu á Alþingi og atkvæðagreiðslu, ekki að sinni að minnsta kosti.

Róbert Marshall, varaformaður stjórnskipunar og eftirlitsnefndar Alþingis, sagði í hádegisfréttum Ríkisútvarpsins, að ekki sé meirihluti fyrir tillögunni í nefndinni og því sé ekki ástæða til að taka hana til síðari umræðu á þingi. Það sé málefnaleg niðurstaða og sömu örlög og um hundrað þingmál fái á hverjum vetri.

Samkvæmt dagskrá Alþingis er næsti fundur áætlaður eftir tæplega hálfan mánuð, eða þann 14. febrúar næstkomandi. Í næstu vika er kjördæmavika á Alþingi.

Ef Alþingi afturkallar ekki kæruna á næstu dögum heldur málsmeðferð fyrir Landsdómi áfram. Aðalmeðferð í máli Geirs Haarde fyrir landsdómi hefst 5. mars næstkomandi.