eyjan.is

Nýr meirihluti í Kópavogi: Ármann Kr. Ólafsson sagður verða bæjarstjóri

Nýr meirihluti verður myndaður í Kópavogi í dag og hafa Sjálfstæðisflokkurinn, Framsóknarflokkurinn og Y-listi Kópavogsbúa náð saman um málefnasamning. Ármann Kr. Ólafsson, verður að öllum líkindum bæjarstjóri.

Viðræður milli framboðanna þriggja hafa staðið yfir síðan á mánudag. Eftir því sem Eyjan  kemst næst verður Ármann Kr. Ólafsson oddviti Sjálfstæðismanna bæjarstjóri, Ómar Stefánsson, Framsóknarflokki, verður formaður bæjarráðs og Rannveig H. Ásgeirsdóttir, Y-lista, forseti bæjarstjórnar. Þetta hefur þó ekki fengist staðfest.

Meirihluti Samfylkingar, VG, Næstbesta flokksins, og Y-listans sprakk vegna ágreinings um það hvernig staðið yrði að uppsögn Guðrúnar Pálsdóttur, bæjarstjóra. Hún hefur gegnt embætti sínu áfram þótt ekki hafi verið starfandi meirihluti í þrjár vikur. Hún mun þó vera á útleið samkvæmt því sem fram kemur hér að ofan.

Uppfært: Búið er að tilkynna um skipan í stöður nýs meirihluta. Eins og Eyjan greindi fyrst frá verður Ármann bæjarstjóri. Rannveig verður hins vegar formaður bæjarráðs og Ómar varaformaður. Margrét Björnsdóttir, Sjálfstæðisflokki, verður forseti bæjarstjórnar.