eyjan.is

Aþena logar: Kveikt í byggingum á meðan þingmenn ræða örlög grísku þjóðarinnar

Byggingar loga í miðborg Aþenu.

Kveikt hefur verið í sögulegum kvikmyndahúsum, kaffihúsum, verslunum og bönkum í miðborg Aþenu þar sem tugir þúsunda hafa safnast saman. Á sama tíma ráða grískir stjórnmálamenn ráðum sínum og ákvarða örlög þjóðarinnar.

Til stendur að greiða atkvæði um 130 milljarða björgunarpakka á gríska þinginu. Það eru ESB, Alþjóðagjaldeyrissjóðurinn og Evrópski seðlabankinn sem reiða fram risalánið gegn loforðum grískra stjórnvalda um harkalegan niðurskurð.

Mikill fjöldi hefur safnast saman í miðborg Aþenu og hafa margir gripið til ofbeldis og spellvirkja. Kveikt er í byggingum og gripdeildir eiga sér stað. Einnig hafa borist fréttir af óeirðum á eyjunum Korfú og Krít, Þessalóníku og í minni bæjum og borgum.

Lögreglan hefur beitt táragasi gegn mótmælendum og hefur fjöldi Grikkja sem og erlendra ferðamanna leitað skjóls á hótelum.

Leiðtogar grísku ríkisstjórnarinnar hafa varað við því að ástandið verði enn verra verði björgunarpakkinn ekki samþykktur. Ef það verður ekki gert, er fátt sem kemur í veg fyrir að landið verði gjaldþrota.

Fimm ráðherrar sögðu af sér fyrir helgi vegna óánægju með björgunarpakkann. Sama hvað verður, þá er ljóst að Grikkir eru í afar slæmri stöðu hvernig sem atkvæðagreiðslan fer.