Í kvöld fer fram opin íbúafundur í Vestmannaeyjum um samgöngumál milli Eyja og lands í nútíð og framtíð. Gríðarlegur áhugi er fyrir fundinum en að sögn annars fundastjóra viðburðarins, Tryggva Más Sæmundssonar ritstjóra fréttavefsins Eyjar.net, þurfti að finna stærra húsnæði fyrir viðburðinn. „Upphaflega átti að fundurinn að fara fram í húsnæði sem rúmar 200 manns. Við fundum fljótlega að áhuginn fyrir fundinum var mikill og því verðum við í húsnæði sem rúmar 500 manns í kvöld,“ segir Tryggvi Már. Fundarboðendur eru Eyjar.net, Eyjafréttir og Ásmundur Friðriksson alþingismaður.

Það segir ýmislegt um hversu aðkallandi málið er að einn auglýstur frummælandi fundarins hefur boðað forföll. Ástæðan er sú að viðkomandi kemst ekki til Eyja út af vandræðum með samgöngur. Þá er óvissa um hvort að fulltrúi Vegagerðarinnar, Guðmundur Helgason, komist á fundinn. „Hann á bókað flug seinnipartinn en það er hvasst núna í Eyjum og því er óvíst hvort að verði flogið,“ segir Tryggvi Már.

Gríðarlega óánægja er í Vestmannaeyjum vegna þeirrar staðreyndar að ferjan Baldur, sem nú sinnir siglingum til Landeyjahafnar á meðan ferjan Herjólfur er í slipp, hefur ekki leyfi til þess að sigla til Þorlákshafnar þegar hefðbundin leið er ófær. Var fundað um málið í bæjarráði Vestmanneyja í byrjun vikunnar. Þar kom fram að í tvígang hafi verið óskað eftir undanþágu til siglinga á hafsvæði B fyrir Baldur en slík undanþága hafi ekki enn fengist. Það væri skýlaus krafa bæjarráðs og Vestmannaeyjarbæjar að afleysingaskip fyrir Herjólf hefði leyfi til þess að sigla til Þorlákshafnar. Töldu hagsmunaðilar að samkomulag um slíkt hefði ríkt seinustu ár. „Bæjarráð harmar að það samkomulag hafi nú verið rofið og hvetur þingmenn Suðurlands til að láta sig málið varða,“ segir í fundargerð.