« Hæstiréttur staðfestir Baugsdóm - þurfa Jón Ásgeir og Tryggvi að víkja úr forsvari félaga? Eyjan

Innlent - fimmtudagur - 5.6 2008 - 16:37

Hæstiréttur staðfestir Baugsdóm - þurfa Jón Ásgeir og Tryggvi að víkja úr forsvari félaga?

Hæstiréttur staðfesti rétt í þessu niðurstöðu Héraðsdóms Reykjavíkur í lokakafla Baugsmálsins og dæmdi Jón Ásgeir Jóhannesson í 3ja mánaða skilorðsbundið fangelsi, Tryggja Jónsson í 12 mánaða skilorðsbundið fangelsi og Jón Gerald Sullenberger í 3ja mánaða skilorðsbundið fangelsi.

Mestur hluti málskostnaðar þeirra allra verður greiddur úr ríkissjóði. Enginn þremenninganna var viðstaddur dómsuppkvaðningu. Sjá dóminn í heild hér en dómsorðið hér að neðan.

Þetta var síðasti þáttur Baugsmálsins, sem hófst með húsleit lögreglu í höfuðstöðvum Baugs í ágúst 2002. Eftir langvinna lögreglurannsókn hafa ákæruliðir gengið milli dómstiga en nú var felldur efnisdómur um þá 18 ákæruliði sem eftir stóðu.

Samkvæmt ákvæðum hlutafélagalaganna virðist sem hvorki Tryggvi né Jón Ásgeir mega gegna starfi stjórnarformanns eða forstjóra hlutafélaga en í 66. grein hlutafélagalaganna segir: “Stjórnarmenn eða framkvæmdastjórar skulu vera lögráða, fjár síns ráðandi og mega ekki á síðustu þremur árum hafa í tengslum við atvinnurekstur hlotið dóm fyrir refsiverðan verknað samkvæmt almennum hegningarlögum eða lögum um hlutafélög, einkahlutafélög, bókhald, ársreikninga, gjaldþrot eða opinber gjöld.”

Dómsorð dóms Hæstaréttar er svohljóðandi:

Ákærði Jón Ásgeir Jóhannesson sæti fangelsi í þrjá mánuði. Fresta skal fullnustu refsingarinnar og hún falla niður að liðnum tveimur árum frá uppsögu þessa dóms ef ákærði heldur almennt skilorð 57. gr. almennra hegningarlaga nr. 19/1940, sbr. 4. gr. laga nr. 22/1955.

Ákærði Tryggvi Jónsson sæti fangelsi í tólf mánuði. Fresta skal fullnustu refsingarinnar og hún falla niður að liðnum tveimur árum frá uppsögu þessa dóms ef ákærði heldur almennt skilorð samkvæmt framangreindum lagaákvæðum.

Ákærði Jón Gerald Sullenberger sæti fangelsi í þrjá mánuði. Fresta skal fullnustu refsingarinnar og hún falla niður að liðnum tveimur árum frá uppsögu þessa dóms ef ákærði heldur almennt skilorð samkvæmt framangreindum lagaákvæðum.

Ákærði Jón Ásgeir greiði af málsvarnarlaunum skipaðs verjanda síns í héraði og fyrir Hæstarétti, Gests Jónssonar hæstaréttarlögmanns, 1.530.000 krónur vegna rekstrar málsins í héraði og 750.000 krónur vegna rekstrar málsins fyrir Hæstarétti. Málsvarnarlaun verjandans að öðru leyti, samtals 20.920.000 krónur á báðum dómstigum, greiðast úr ríkissjóði.

Ákærði Tryggvi greiði af málsvarnarlaunum skipaðs verjanda síns í héraði og fyrir Hæstarétti, Jakobs R. Möller hæstaréttarlögmanns, 2.515.000 krónur vegna rekstrar málsins í héraði og 1.875.000 krónur vegna rekstrar málsins fyrir Hæstarétti. Málsvarnarlaun verjandans að öðru leyti, samtals 15.410.000 krónur á báðum dómstigum, greiðast úr ríkissjóði.

Ákærði Jón Gerald greiði af málsvarnarlaunum skipaðs verjanda síns í héraði og fyrr Hæstarétti, Brynjars Níelssonar hæstaréttarlögmanns, 2.025.000 krónur vegna rekstrar málsins í héraði og 400.000 krónur vegna rekstrar málsins fyrir Hæstarétti. Málsvarnarlaun verjandans að öðru leyti, samtals 7.275.000 krónur á báðum dómstigum, greiðast úr ríkissjóði.

Ákærði Jón Ásgeir greiði í ríkissjóð vegna annars sakarkostnaðar í héraði samtals 7.568.519 krónur, þar af 5.000.000 krónur óskipt með ákærða Tryggva.

Að öðru leyti greiðist sakarkostnaður í héraði og áfrýjunarkostnaður málsins úr ríkissjóði.”