Eyjan.is

Gunnar Stefán Möller Wathne, sem var á flótta undan bandarísku lögreglunni í fjögur ár þangað til hann var handtekinn á Indlandi í gær, er sannarlega enginn venjulegur götustrákur. Hann er Íslendingur í báðar ættir, hefur alið mestallan sinn aldur erlendis en heimsótt Ísland oft og iðulega.

Gunnar Stefán stundaði nám við Harvard háskóla - þekktasta háskóla Bandaríkjanna - en lauk ekki námi. Meðal þeirra sem hann umgekkst í Harvard voru Kristin Gore, dóttir Al Gore, þáverandi varaforseta Bandaríkjanna, og James Murdoch, sonur Ruperts Murdoch, hins fræga eiganda margra af þekktustu fjölmiðlum í heimi.

Gunnar kom með þau og fleiri skólafélaga sína hingað til lands árið 1999 og hélt hópurinn þá veislu á Hótel Borg þar sem heiðursgestur var sjálfur Davíð Oddsson, forsætisráðherra. Davíð var við þetta tækifæri gerður að sérstökum heiðursfélaga í félaginu Harvard Lampoon, sem gefur út samnefnt grínblað og skólablaðið Harvard Crimson.

Félagið velur sér einn heiðursfélaga á hverju ári og 1999 var komið að Davíð Oddssyni að fá inngöngu í þennan félagsskap sem státar m.a. af heiðursfélögum á borð við Billy Crystal, Robin Williams og Bill Cosby. Það er fyrst og fremst gerð ein krafa til heiðursfélaga í Harvard Lampoon - þeir þurfa að vera skemmtilegir og með framúrskarandi húmor. Eins og venja er fá heiðursfélagar gefna veglega gjöf sem tengd er sögu félagsins og Harvard og gjöfin sem Davíð fékk var gamall útskorinn stóll, Harvald Crimson stóllinn.

Í ræðu sem Davíð hélt á Hótel Borg til þess að þakka fyrir heiðurinn fór hann á kostum eins og oft áður og brást ekki vonum viðstaddra um að vera skemmtilegur og fyndinn. Það vakti t.d. mikla lukku þegar hann lýsti því yfir að í heil átján ár hafi hann verið að reyna að fá fólk til að taka sig alvarlega en nú hefðu þau komið og eyðilagt allt saman með því að verðlauna hann fyrir að vera húmoristi.

Frá þessum tíma hefur Gunnari Stefáni Möller Wathne hins vegar ekki gengið allt í haginn, hann hætti námi og frá árinu 2003 var hann á flótta undan lögreglu, grunaður um fíkniefnaafbrot og stórfellt peningaþvætti í tengslum við fíkniefnaviðskipti.

Orðið á götunni er það að kalda stríðið sé skollið á aftur - að þessu sinni á  ritstjórn Viðskiptablaðsins að Mýrargötu 2 í Reykavík. Vinnufélagarnir Ólafur Teitur Guðnason og Viðar Þorsteinsson eru illilega ósammála. Það þarf ekki að koma á óvart því vitað var að Ólafur Teitur er með hörðustu hægrimönnum landsins en Viðar er hins vegar langt vinstra megin í tilverunni.

Nú hefur Viðar skrifað harðorða grein um bókmenntahátíð í Reykjavík á vefritið Kistuna. Honum finnst lítið til hátíðarinnar koma að þessu sinni og finnur að því að gestirnir hafi flestir verið ómerkilegir pólitískir áróðursmenn.

Þar tekur hann sérstaklega sem dæmi Aayan Hirsi Ali, sómölsku konuna, sem er höfundur nýútkominnar bókar hjá Veröld  og svo hjónin Jung Chan og Jan Halliday,  höfunda bókarinnar um Maó. Svo skemmtilega vill til að vinnufélagi Viðars, Ólafur Teitur var mánuðum saman í leyfi frá störfum til þess að þýða bókina sem nú er komin út og fær einkunnina “níðrit um Mao” hjá Viðari.

Hann segir: “Raunar stingur í augu að hið ágæta bókaforlag Mál og menning hafi gefið bókina út, en það er önnur saga. Bókin um Maó er vanhugsaður viðsnúningur á þeirri persónudýrkun sem ríkti á sínum tíma í kringum Maó. Chang reynir að koma höggi á Maó með því að snúa formúlunni við: “Allt er gott í Kína og það er Maó að þakka” verður “allt var vont í Kína og það var Maó að kenna.” Vafalítið á Maó höggin skilið, en hvers erum við nær? tjórnmálakrítík á þessu plani getur sjálfsagt verið góð skemmtun fyrir rassvasasálfræðinga allra kaffistofa. [...] “Uppgjör íslenskra hægrimanna við hinn látna Maó er fyrst og fremst hlálegt ásýndar, í ljósi stóru, æpandi þagnarinnar um glæpsamlegt framferði kínverskra stjórnvalda á hverjum degi sem líður, á meðan við bíðum þess eins að undirrita næsta fríverslunarsamning. Í stað þess að horfast í augu við að í Kína ríkir það fyrirbæri sem þeir vissu ekki að væri til -- kapítalismi án lýðræðis og mannréttinda – standa þeir á torgum, æpandi um illsku þjóðarleiðtoga sem lést fyrir mörgum áratugum síðan.”

Orðið á götunni er að það sé síður en svo einsdæmi að íslenskir auglýsingamenn sæki í hugmyndir erlendra kollega.

Í gær greindi Orðið frá auglýsingum Landsbankans um aukakrónurnar og benti á eiginlega nákvæmlega eins auglýsingu fyrir mexókóskan banka.

En hér á eftir bjóðum við upp á stælingu á erlendri auglýsingu þar sem ekkert þarf að villast hvert fyrirmyndin er sótt enda hluti af alþjójðlegri herferð, upphaflega frá Noregi. Þetta er velþekkt auglýsing sem Hvíta húsið gerði fyrir Umferðarstofu. Hana sjá má hér.

En hér að neðan er önnur bresk auglýsing þar sem rekinn er áróður fyrir bílbeltanotkun.

Þeir sem horfa á hana geta ekki verið í vafa um hvaðan hugmyndin að auglýsingu Umferðarstofu er komin.

Uppfært kl. 20.19: Orðinu hefur borist eftirfarandi athugasemd frá kvikmyndagerðarmanni, sem þekkir vel til og segir: “Þó að íslenskar auglýsingar steli grimmt frá erlendum auglýsingum þá er ekki um það að ræða hér. Umrædd umferðarstofuauglýsing er hluti af alþjóðlegri herferð sem var keypt sérstaklega til að gera íslenska útgáfu. Þetta er svipað því að sjónvarpsþátturinn “Idolstjarna Íslands” er aðkeypt útgáfa af “American Idol” - eða þá kannski frekar bresku frummyndinni, “Pop Idol”.”

Þar höfum við það, þetta var semsagt alþjóðleg herferð ...

Uppfært kl. 21.02:  Birgir Hákonarson, framkvæmdastjóri Umferðarstofu hefur lagt orð í belg um málið með eftirfarandi athugasemd: “Mér var bent á það að á vefnum ykkar væri umfjöllun um meintan “þjófnað” Umferðarstofu á auglýsingu frá Bretlandi. .... Þegar Umferðarstofa kynnti þessa auglýsingu sumarið 2006 var strax tekið fram að auglýsingin væri eftir erlendri fyrirmynd, reyndar norskri, enda höfum við fengið leyti til þess frá þeim aðila sem átti höfundarréttinn. Okkur þótti nauðsynlegt að aðlaga hana að íslenskum aðstæðum og var Hvíta húsið fengið til þess verks. Það er allt tekið fram um þetta á heimasíðu Umferðarstofu og ekki verið að leyna uppruna herferðarinnar, sjá http://www.us.is/id/4443. Þetta er frekar gömul “frétt” á ykkar vef og ekki mikil rannsóknarblaðamennska á bak við hana.”

Orðið á götunni sagði um daginn frá því að Landsbankamönnum hefði brugðið illa við þegar þeir fréttu að aukakrónu-auglýsingin sem þeir gerðu dýrum dómum væri sláandi lík mexíkóskri auglýsingu.

Nú geta lesendur dæmt sjálfir, skoðið hér: Auglýsinguna frá Mexíkó annars vegar og Landbankanum hins vegar.  Óneitanlega eru auglýsingarnar sláandi líkar, eiginlega bara copy-paste.

Sagan segir að Landsbankinn hafi borgað nokkurra milljóna króna reikning fyrir hugmyndavinnu Íslensku Auglýsingastofunnar við þessa herferð.

Orðið á götunni er að breytingar séu framundan hjá Símanum. Sagt er að Brynjólfur Bjarnason, sé á förum úr starfi forstjóra innan skamms og að tilkynnt verði um breytingar núna í vikunni ... það fylgir að Brynjólfur taki við stjórninni hjá Skipti, sem er fyrirtækið sem á Símann, Mílu og Já/118.

Akkúrat þessa stundina er í gangi starfsmannafundur á Skjá einum þar sem verið er að tillkynna uppsögn sjónvarpsstjórans Björns Sigurðssonar eða “Bússa”.

Við starfinu tekur Kristjana Thors Brynjólfsdóttir, dóttir Brynjólfs Bjarnasonar forstjóra Símans sem á Skjáinn.

Orðið á götunni er að það hafi verið deilur í stjórnendahópi Skjásins í sumar og að Bússi sem er afar vinsæll meðal almennra starfsmanna hafi orðið undir.

Bússi var áður dagskrárstjóri á Sirkus og Popptívi og er maðurinn á bakvið 70 mínútur og strákana. Hann var dagskrárstjóri á Skjánum en varð sjónvarpsstjóri eftir sviplegt brotthvarf Magnúsar Ragnarssonar.

Það varð víst uppi fótur og fit í markaðsdeild Landsbankans fyrir nokkrum dögum þegar ábending barst um að auglýsingin um aukakrónurnar væri ekki alveg eins frumleg og talið hafði verið.

Mikil tími hafði farið í hugmyndavinnu vegna herferðarinnar og hún var víst ekki af ódýrari taginu. Þess vegna fannst bankamönnunum lélegt þegar þeim var bent á að herferðin þeirra væri sláandi lík auglýsingu sem gerð hafði verið fyrir banka í Mexíkó. Það var haldinn fundur og horft á myndir frá Mexókó. Bankamönnum ekki skemmt. Orðið á götunni er að Landsbankinn kunni Íslensku auglýsingastofunni litlar þakkir fyrir viðskiptin.

Í DV í gær, miðvikudaginn 19. september, var lítil frétt sem sagði frá því að langferðabíll skipuðum ungum sjálfstæðismönnum á leið í höfuðborgina af SUS þingi á Seyðisfirði hafi lent utan vegar rétt austan við Hvolsvöll. Var í kaldhæðni sagt að ungir sjálfstæðismenn hafi á SUS þinginu ályktað um vegakerfi landsins og því hafi það verið mátulegt á þá að hýrast í náttmyrkrinu eftir hjálp.

Það sem hins vegar kom ekki fram í fréttinni var að einungis munaði 20 metrum að virkilega illa hafi farið og bílinn hafi hafnað í Markarfljóti. Mikil mildi var að ekki varð stórfellt slys.

Hjálp barst eftir 40 mínúturfrá lögreglumanni á Hvolsvelli. Lögreglumaðurinn bauð ungu sjálfstæðismönnunum að hringja á leigubíl sem myndi koma þeim í húsaskjól á Hvolsvelli. Þegar hinir ungu sjálfstæðismenn spurðu hvort slíkt væri ekki rándýrt, enda um nokkra leið að fara, hafði lögreglumaðurinn á orði að þar sem þeir væru nú ungir sjálfstæðismenn hlytu þeir að hafa efni á hlutunum!

Að lokum kom svo leigubíll sem flutti ungu sjálfstæðismennina á Hvolsvöll og leyfði bílstjórinn þeim að bíða heima hjá sér þar til bílar frá Reykjavík sóttu ferðalangana. Hinn miskunnsami leigubílstjóri hellti meira að segja uppá kaffi handa ungu sjálfstæðismönnunum.

Það er því vissara að keyra varlega þegar menn eiga leið um Rangárþing Eystra ellegar gætu menn lent í því að þurfa að hringja á leigubíl til að komast heim.

Eyjan sagði frá því í gær að Atli Gíslason, þingmaður Vinstri grænna, hefði verið í hollinu sem var rekið úr Hítará fyrir maðkaveiði, sem er bönnuð í ánni eftir 30. júní.

Atli sjálfur veiðir aldrei á maðk og hefur aldrei gert en formaður hans, Steingrímur J. Sigfússon, er ekki jafnvandfýsinn á veiðarfæri.

Orðið á götunni hefur heimildir fyrir því að Steingrímur veiði t.d. gjarnan á spún. Það gerði hann amk í Selá síðastliðið sumar, að því er fram kemur í veiðibókum Selár.

Fréttastofa Stöðvar 2 er að fá liðsauka um næstu mánaðamót. Sindri Sindrason, sem var fréttamaður á Stöð 2 er búinn að ráða sig til starfa á ný.

Sindri hætti fyrir tæpu ári á Stöð 2 og tók við starfi sem talsmaður Jóns Ásgeirs Jóhannessonar. Samkvæmt heimildum Orðsins á götunni er Sindri búinn að ákveða að hætta hjá Jóni Ásgeiri og snúa og snúa aftur í sjónvarpið. Hann kemur til starfa hjá Stöð 2 um næstu mánaðamót.

Íslensk þingmannasendinefnd er nýkomin af fundi í sameiginlegri nefnd þingmanna EFTA-landanna og þingmanna á Evrópuþinginu.

Fyrir Íslendinga og aðrar EFTA-þjóðir er þetta mikilvægur liður í tengslunum við Evrópusambandið og eitt fárra tækifæra sem kjörnum fulltrúum gefast til þess að hafa áhrif á og eiga samskipti við þá sem taka ákvarðanir og fara með völd í Evrópu.

Eins og kunnugt er fá langflestar ákvarðanir og tilskipanir sem teknar eru innan ESB lagagildi á Íslandi, - þær eru sendar hingað með pósti með skilaboðum um að þýða þær vinsamlegast yfir á móðurmálið og láta Alþingi svo stimpla þýðinguna sem lög.

En nú á dögunum kom glögglega í ljós að þýðing samstarfsins við EFTA-þjóðirnar er ekki hin sama í augum ESB-landanna og þýðing samskiptanna við ESB-ríkin er í augum fulltrúa EFTA-ríkjanna.

Sendinefndir EFTA-ríkjanna voru fullmannaðar - skipaðar þingmönnum sem vildu láta að sér kveða. Af sendinefnd ESB er aðra sögu að segja.

Sextán þingmenn á Evrópuþinginu rétt til þátttöku í fundum með EFTA-nefndinni en einungis fimm létu sjá sig. Formaður ESB-nefndarinnar var svo 34 ára gamall þingmaður frá Búlgaríu, - einu nýjasta og áhrifaminnsta ríki ESB.

Það var í raun aðeins einn evrópuþingmaður sem lét í sér heyra á nefndarfundinum, það var Skotinn sem lýsti því yfir hér á Eyjunni í gær að hann vildi gjarnan fá Íslendinga í lið með sér til þess að breyta sameiginlegri sjávarútvegsstefnu Evrópusambandsins. Bjarni Benediktsson, formaður íslensku þingmannanefndarinnar, tók kurteislega undir óskir þingmannsins skoska í samtali við Eyjuna, en heimildir Orðsins á götunni herma að hann eins og allir viðstaddir hafi gert sér grein fyrir því að líkurnar á því að það sem kemur út úr samstarfi þingmanna EFTA og ESB nái einhvern tímann eyrum þeirra sem taka ákvarðanir fyrir hönd ESB eru um það bil engar.

Það vakti athygli hversu margir starfandi fjölmiðlamenn sóttu um starf upplýsingafulltrúa utanríkisráðuneytisins. Af 36 umsækjendum kemur u.þ.b. helmingur úr fjölmiðlaumhverfinu, margir þeirra í góðum stöðum. Meðal umsækjenda voru t.d. Hallgrímur Thorsteinsson, Davíð Logi Sigurðsson, Sveinn Guðmarsson, Auðunn Arnórsson og Þorfinnur Ómarsson.

Ekki er langt síðan að fjölmiðlarnir soguðu til sín hæfileikafólk alls staðar að kjölfar áhuga peningamanna á fjárfestingum í fjölmiðlum og sögur heyrðust af miklu launaskriði bestu blaða- og sjónvarpsmanna landsins.

Nú virðist straumurinn liggja aftur út af fjölmiðlunum og reyndustu fjölmiðlamenn landsins virðast reyna allt hvað þeir geta að koma sér í þægileg störf sem upplýsingafulltrúar hjá hinu opinbera eða hjá stórum fyrirtækjum.

Orðið á götunni hefur heimildir fyrir því að í hópi mikils fjölda umsækjenda um nýlega auglýst starf á samskiptasviði Kaupþings hafi verið nöfn margra þekktra fjölmiðlamanna og skýtur það enn einni stoðinni undir kenninguna um atgervisflótta hjá fjölmiðlafólki.

Hvaða þýðingu þetta hefur fjölmiðlabransann á eftir að koma í ljós en hugsanlega skynja þessir reyndu fjölmiðlamenn að það séu erfiðir tímar framundan á þessum vinnustöðum. Þeir sjá að meirihluti prentmiðla á markaðnum skilar engu nema tapi og sömu sögu má segja um ljósvakamiðlana. Frekar en að bíða eftir að niðurskurðarhnífurinn nái til þeirra, flýja þeir sökkvandi skip.

Jón Baldvin Hannibalsson verður ekki á landinu í vetur. Hann ætlar að eyða vetrinum í Litháen og Króatíu.

Það var meira framboð á Jóni Baldvin en spurn reyndist eftir í kosningunum hér heima í vor, Samfylkingin vildi ekki hafa hann á lista og tilraunir hans til þess að tryggja Ómari Ragnarssyni þingsæti báru ekki árangur. Jón Baldvin taldi að eina leiðin til að að fella ríkisstjórnarmeirihlutann væri að tryggja Ómari þingsæti. Það gekk ekki eftir og er haft fyrir satt að þvert á móti hafi Íslandshreyfing Ómars á endanum orðið til þess að koma í veg fyrir að ríkisstjórnarmeirihlutinn félli. Það breytti þó ekki því að tími ríkisstjórnar framsóknar og sjálfstæðismanna var liðinn og tími Jóhönnu Sigurðardóttur og Samfylkingarinnar kominn.

En þótt forysta Samfylkingarinnar vilji nú lítið af honum vita er Jón Baldvin víða í hávegum hafður. Litháar hafa miklar mætur á Jóni vegna þess hve vel Íslendingar stóðu að baki þeim í sjálfstæðisbaráttunni en þá var Jón Baldvin utanríkisráðherra. Gott ef Litháar hafa ekki skýrt götu í höfuðið á honum. Íslendingar voru líka fljótir til að viðurkenna sjálfstætt ríki Króata þegar þeir slitu sig frá Júgóslavíu. Það er því ekki að efa að Jón Baldvin mun fá hlýjar móttökur við Adríahaf og Eystrasalt þegar hann heldur þangað til vetrarsetu.

Orðinu á götunni barst flugufregn úr Háskólanum í Reykjavík. Nokkrar námsmeyjar úr skólanum munu hafa lagt mikið á sig til að komast yfir miða á árshátíð starfsmanna Kaupþings banka.

Nýverið var í fjölmiðlum kynnt könnun þar sem kom í ljós að karlar horfa aðallega á útlitið þegar þeir velja sér konu en sama rannsókn sýndi að konur horfa aðallega á hluti eins og menntun, laun og félagslega stöðu.

Ósagt skal látið hvort ásælni HR-stelpnanna í miða á árshátíð Kaupþings hafi haft eitthvað með þennan kynbundna mun að gera, en ef svo væri þá væri þær sjálfsagt að leita fyrir sér á réttum stað því óvíða má finna jafn marga unga og ólófaða efnamenn en á árshátíð Kaupþings.

Menn ráku upp stór augu þegar þeir fengu Blaðið í hendurnar í gær.

Á íþróttasíðu blaðsins við hliðina á umfjöllun um sigurgöngu Fjölnis og viðtölum við börn úr yngri flokkum og foreldra í íþróttafélaginu getur að líta heldur glannalega mynd af stúlku í bláu bíkiníi út í laxveiðiá.

Þessi hallærilega auglýsing er frá einhverri veiðiverslun út á Granda sem er með útsölu í gangi. Það hefur verið útsala hjá auglýsingastofunni sem hannaði auglýsinguna líka væntanlega, því klénni verður myndauppstilling varla í auglýsingu.

Bugatti bílar eru meðal dýrustu og fágætustu lúxusbíla í heiminum og það er ekki á færi hvers sem er að kaupa slík ökutæki. Nú eru Hannes Smárason og Jón Ásgeir Jóhannesson komnir í hóp ánægðra Bugatti-eigenda og gáfu eina milljón dollara, eða um 65 milljónir króna, hvor fyrir sinn bílinn.

Orðið á götunni heyrir að þeir félagar hafi fengið bílana sína afhenta í Lúxemborg. Þeir eru báðir kunnir áhugamenn um bíla og hraðakstur og hafa m.a. tekið þátt í hinum umdeilda Gumball3000 kappakstri þar sem fjölþjóðlegur hópur milljarðamæringa þeysir um á ofsahraða. Síðast þegar þeir tóku þátt í Gumball3000 óku Jón Ásgeir og Ingibjörg Pálmadóttir á Ferrari en Hannes á Porsche.

Jónína Benediktsdóttir er einn vinsælasti bloggarinn á Moggablogginu og lætur jafnan gamminn geysa um hin ýmsu málefni. Baugsmál og náttúrulækningar í Póllandi eru algeng umfjöllunarefni hjá Jónínu.

Síðdegis á föstudaginn síðasta kom Jónína með þrjár færslur með skömmu millibili. Þar gerir hún m.a. þögnina að umtalsefni og segir m.a. þetta: “Ef við viljum tala þá tölum við”. E.t.v. vilja einhverjir lesa það þarna á milli línanna að Jónína telji sig hafa frá einhverju meira að segja um fjandvini sína, Baugsfeðgana Jón Ásgeir og Jóhannes.

Það er spurning hvort að Jónína hafi sjálf enn á ný verið beðin að þegja því að færslurnar eru nú horfnar út af síðunni. En reyndar ekki fyrr en eftir að einn dyggur lesandi síðunnar hafði sýnt þá forsjálni að taka skjámynd af færslunum.

Það eru líka sviptingar á neðri hæð Skaftahlíðar 24. Jakob Bjarnar Grétarsson, innblaðssnápur Fréttablaðsins til allmargra ára og eigandi vatnsréttinda með meiru, er á förum upp Ártúnsbrekkuna til liðs við Mannlíf Mikaels Torfasonar. Jakob kvaddi samstarfsfólk í gær: “Mér segir svo hugur að ég eigi eftir að starfa með mörgum ykkar þeim sem hanga í þessu djobbi aftur því þetta er ekki stór heimur. Sjálfum hefur mér ekki enn tekist að rífa mig frá þessu vanþakkláta og vanmetna starfi.”

Orðið á götunni hefur fengið senda eftirfarandi framhaldssögu með bréfaskiptum á Fréttastofu Stöðvar 2 um uppsögn Þóru Kristínar Ásgeirsdóttur. Kristinn Hrafnsson gagnrýnir Steingrím Ólafsson fréttastjóra en Steingrímur svarar fullum hálsi, segir Kristin ekki fara rétt með staðreyndir, og segir líka að ákvörðun um að segja Þóru Kristínu  upp hafi legið fyrir þegar hann tók við starfinu. Hann hafi einungis frestað uppsögninni um tíma.

“Kristinn Hrafnsson/Norðurljós/IS

08/31/2007 04:37 PM

To

Fréttastofa Stöðvar 2

cc

bcc

Subject

“Þá ber að nefna...”
“Þá ber að nefna að gengið hefur verið frá starfslokum við Þóru Kristínu Ásgeirsdóttur…”

Þetta er niðurlagið í tilkynningu um mannabreytingar frá fréttastjóra. Það “smáatriði” er nefnt í framhjáhlaupi að hann hafi rekið Þóru Kristínu, einn besta blaðamann landsins. Þóra segir mér að hún hafi ekki fengið haldbæra skýringu á uppsögninni. Einungis að það sé verið að “gera breytingar”.

Mér finnst þetta ótrúlega lúalegt og lítilmannlegt. Það er ekki í lagi að menn séu reknir úr starfi án þess að haldbærar ástæður séu gefnar. Ég hef ekki orðið vitni að öðru en að Þóra Kristín hafi sinnt starfi sínu vel. Ég hef ekki annað séð en að það hafi verið mikill fengur í því að hafa hana í pólitískum fréttum.
Þar er þörf á reynsluboltum – fólki með bein í nefinu sem geta fylgt málum eftir af festu. Það er lýðræðinu nauðsynlegt og ein frumforseta þess að menn geti talað um að fjölmiðlar séu einn af hornsteinum lýðræðisins. Þóra sinnti sínu hlutverki vel - þeir fundu fyrir því á stjórnarheimilinu á liðnu kjörtímabili.

Lengst af var núverandi fréttastjóri talsmaður á höfuðbóli þess stjórnarheimilis. Þegar hann skiptir um föt og gerist oddamaður í aðhaldi almennings gagnvart valdhöfum grípur hann til þess ráðs við fyrsta hentugleika að reka aðalfréttamanninn í pólitískum fréttum. Smekklegt!

Ég hef ýmsa fjöruna sopið í gegnum tíðina en ég hef ekki skap í mér til að þegja þegar mér misbýður. Þetta er óboðleg framkoma – ekki bara gagnvart Þóru Kristínu heldur öllum blaðamönnum hjá þessu fyrirtæki.

Hvaða skilaboð er verið að senda þeim? Svari nú hver fyrir sig.

Kristinn Hrafnsson

----------

Síðan kom þessi sem svar við því sem Kristinn sendi:
Steingrímur Sævarr Ólafsson/365

08/31/2007 05:02 PM

To

Kristinn Hrafnsson/Norðurljós/IS@Nordurljos

cc

Fréttastofa Stöðvar 2

bcc

Subject

Re: “Þá ber að nefna...”

Um leið og við þökkum Kristni stjórnmálaskýringarnar er rétt að rifja upp að flestir fréttamann reyna að hafa staðreyndir á hreinu og leita sjónarmiða beggja aðila áður en þeir gefa sér niðurstöður.

Þessi sending Kristins er því miður full af staðreyndavillum og vitleysu og er auðveldara að telja það sem rétt telst en það sem rangt er talið upp.

Ég fann þrjár réttar staðreyndir. Að Þóra Kristín sé hætt, að þau hafi talað saman og að Kristinn hafi sopið fjörur. Annað er rangt.

Það er kannski rétt að geta þess, þó það sé ekki aðalatriði, að búið var að ákveða að segja Þóru Kristínu upp áður en ég tók við störfum. Ég frestaði þeirri uppsögn þegar ég tók við og skoðaði málið út frá eigin forsendum og komst að sömu niðurstöðu og forveri minn. Það er öll “pólitíkin” og “óboðlega framkoman”.

Annars óska ég mönnum friðar og vona að menn andi með nefinu áður en þeir senda svona vitleysu frá sér sem er þeim sjálfum til minnkunar.

hilsen
Steingrímur Sævarr Ólafsson
Fréttastjóri Stöðvar 2 / Editor in Chief Channel 2 News

------

Kristinn svarar um hæl:
Kristinn Hrafnsson/Norðurljós/IS

08/31/2007 10:11 PM

To

Steingrímur Sævarr Ólafsson/365@Nordurljos

cc

Fréttastofa Stöðvar 2

bcc

Subject

Re: “Þá ber að nefna...”
Það vakti sérstaka athygli mína að Steingrímur skuli hafa erft þá ákvörðun að reka Þóru Kristínu. Ég hafði samband við Sigmund Erni og bar þetta uppá hann.
Sigmundur sagði þetta vera alrangt.. Þarna stendur því orð gegn orði. Nema ákvörðun um að segja Þóru Kristínu upp störfum hafi verið tekin af einhverjum öðrum en Sigmundi. Forvitnilegt væri þá að vita hver hefði tekið þá ákvörðun.

Hitt er svo aukaatriði að fréttastjórinn hafi aðeins fundið þrjár réttar staðreyndir í minni sendingu. Það er þá væntanlega staðreyndavilla að Þóra Kristín hafi sinnt sínu starfi vel og að fengur hafi verið í því að hafa hana í pólitískum fréttum. Varla er það staðreyndavilla að Þóra hafi fengið þá skýringu eina að gera ætti breytingar. A.m.k. var þetta haft eftir fréttastjóranum á Mbl: “Steingrímur sagðist hafa tekið við hópi fréttamanna og þann hóp vildi hann móta eftir sínu höfði og að það hafi verið ákveðið að gera breytingu á hópnum.”

Meginmálið nú er hins vegar þetta: Hvað er hæft í því að búið hafi verið að ákveða að segja Þóru Kristínu upp störfum áður en nýr fréttastjóri tók við.

Þarf að minna menn á að við eigum víst að hafa það hlutverk að leita sannleikans í umboði almennings. Betra að hann sé að hreinu innanhúss.

Kristinn

---------
Síðan kom þetta frá fréttastjóranum:

Steingrímur Sævarr Ólafsson/365

09/02/2007 10:03 PM

To

cc

Fréttastofa Stöðvar 2

bcc

Subject

Re: “Þá ber að nefna...”
Við Sigmundur Ernir erum sammála um að það sé engum til hagsbóta, allra síst fréttastofu Stöðvar 2, að halda áfram umræðu um þetta mál með þessum hætti.
Málefni einstakra starfsmanna eru trúnaðarmál og því ætti ekki að ræða þau á opinberum eða svona vettvangi ef hægt er að komast hjá því.

Eftir stendur einfaldlega að uppsagnir fara ekki fram á pólitískum eða “óboðlegum” nótum á fréttastofunni punktur.

hilsen

Steingrímur Sævarr Ólafsson”