Eyjan.is

Orðið á götunni er að Kjartan Magnússon sé langlaunahæsti borgarfulltrúinn í Reykjavík og uppskeri þannig ríkulega fyrir að hafa verið maðurinn á bak við meirihlutasamstarf sjálfstæðismanna og Ólafs F. Magnússonar.

Kjartan er með álag á laun borgarfulltrúa fyrir að vera í borgarráði. Svo er hann bæði formaður OR og REI sem gerir væntanlega um 5-600 þúsund í viðbót og situr í stjórn ÍTR og stjórnkerfisnefnd borgarinnar. Því er líka fleygt að Júlíus Vífill, félagi Kjartans í borgarstjórnarflokknum, hafi orðið sár þegar Kjartan gerði sjálfan sig að stjórnarformanni REI. Júlíus taldi sig hafa fengið vilyrði um að fá formennskuna.

Og varaformaður OR, Ásta Þorleifsdóttir, má líka una vel við sitt. Hún var í 4. sæti á F-lista og því ekki einu sinni varaborgarfulltrúi en er samt orðin varaformaður menntaráðs með Júlíusi Vífil sem formann, varaformaður Umhverfisráðs, með Gísla Marteini, varaformaður Orkuveitu Reykjavikur og REI með Kjartani og varaformaður Faxaflóahafna hjá Júlíusi Vífli. Orðið á götunni er að Ásta sé komin með laun sem eru mun hærri en ýmsir kjörnir fulltrúar fá fyrir að sitja í borgarstjórn.

Sagan sem gekk ljósum logum um höfuðstöðvar Birtings í morgun um að Vilhjálmur H. Vilhjálmsson, héraðsdómslögmaður, væri búinn að stefna Eiríki Jónssyni, ritstjóra Séð og heyrt, vegna myndar sem hefði birst af honum sjálfum er víst ekki rétt.

Einu samskipti Vilhjálms og Birtings um þessar mundir eru vegna máls sem sagt er frá í Fréttablaðinu um morgun þar sem ungar stúlkur heimta greiðslu fyrir birtingu mynda af bandaríska leikstjóranum Quentin Tarantino.

Vilhjálmur kom af fjöllum þegar hann sá Orðið á götunni um sig og Eirík og ber málið allt til baka. Þarna hafði fjöður orðið að hænu. Færslan er því farin héðan út, eins og vera ber.

Orðið á götunni er að aðalhöfundur deiliskipulagstillögunnar sem gerði ráð fyrir því að húsin við Laugaveg 4 og 6 yrðu rifin og nýtt hús byggt undir hótel í staðinn sé enginn annar en Ólöf Guðný Valdimarsdóttir, nýr aðstoðarmaður nýs borgarstjóra, Ólafs F. Magnússonar.

Ólöf Guðný er arkitekt að mennt og vann sem starfsmaður hjá arkitektastofu Gylfa Guðjónssyni við gerð tillögunnar  umdeildu. Ólafur F. Magnússon lét verða sitt fyrsta verk í borgarstjórastóli að ógilda deiliskipulagið þegar hann lét borgarsjóð kaupa húsin fyrir 480 milljónir króna - húsin sem nýi aðstoðarmaðurinn hafði skipulagt á bak og burt.

Orðið á götunni er að atvinnulífið spyrji sig ýmissa spurninga vegna nýjasta átaks íslenskra stjórnvalda fyrir hönd atvinnulífsins.

Útflutningsráð er með mikla herferð í undirbúningi og er að safna í mikla viðskiptasendinefnd til þess að afla viðskiptatækifæra fyrir Íslendinga á Barbados. Útflutningsráð mun hafa starfsmann staðsettan á eyjunni “í nokkra mánuði” til þess að aðstoða íslenskt atvinnulíf við að koma á viðskiptasamningum.

Ingibjörg Sólrún Gísladóttir, utanríkisráðherra, er á leið í opinbera heimsókn til Barbados í lok marsmánaðar en það er eyríki í Karíbahafi með um 300.000 íbúa, líkt og Ísland. Orðið á götunni er að það sé hæpið að Ingibjörg Sólrún væri að fara í þessa ferð ef Ísland væri ekki í framboði til Öryggisráðs Sameinuðu þjóðanna. Fulltrúum 16 ríkja hefur verið boðið til Barbados til að hitta íslenska utanríkisráðherrann.

Útflutningsráð leggur í auglýsingunni sérstaka áherslu á að fá aðila sem hafa með sjávarútvegs-, orku- eða jafnréttismál að gera með sér í þessa sólarlandaferð. Orðið á götunni er að þótt þessi lýsing hljómi eins ferðin sé sérsniðin að kjarnastarfsemi Glitnis á erlendum mörkuðum þyki ekki líklegt að Þorsteinn Már og Lárus Welding fari með í ferðina, nýbúnir að skera niður forstjóra- og stjórnarlaunin vegna óróans á markaðnum.

Samkvæmt síðunni Weather.com má búast við 25-28 stiga hita á Barbados á þessum tíma árs.

Kristján L. Möller samgönguráðherra brást fljótt og vel við þegar Gunnar I. Birgisson, bæjarstjóri í Kópavogi, lýsti eftir honum í Mogganum í morgun, í grein sem vakti mikla athygli og sagt var frá í frétt hér á Eyjunni.

Orðið á götunni er að Kristján hafi verið mættur á bæjarskrifstofurnar strax klukkan níu í morgun og hafi farið inn á skrifstofu bæjarstjórans og setið þar drykklanga stund.

Að sjálfsögðu var sent eftir vínarbrauði handa bæjarstjóranum og ráðherranum. Í Moggagreininni sýndi Gunnar óþekkta takta og segir: “Þeir eru ófáir morgnarnir sem ég hef setið einn að rúnstykkjunum og sætabrauðinu eins og hryggbrotin mær með þeim afleiðingum sem sjá má á holdafari ljósmyndafyrirsætu ársins.”

Orðið á götunni er að rætt sé um að bankarnir og ríkisstjórnin fái Bjarna Ármannsson, fyrrverandi bankastjóra Glitnis, til að leiða nýtt ímyndarátak fyrir íslenskt fjármálalíf erlendis.
Bjarni tók forystu meðal bankamanna fyrir nokkrum misserum þegar blásið var til sóknar þegar efasemdar gætti um íslenska bankakerfið í Danmörku og Bandaríkjunum. Bjarni var andlit ímyndarsóknar íslensku bankanna á þeim tíma, fór í viðtöl á Bloomberg og helstu viðskiptasjónvarpsstöðvum og nutu menn þess þá að Bjarni hafði sótt til starfa i stjórnunarstöður hjá Glitni þá Magnús Bjarnason og Pétri Óskarssyni, þáverandi forstöðumanns almannatengsla hjá Glitni, en reynsla þeirra af störfum fyrir utanríkisþjónustuna í Bandaríkjunum nýttist vel í átakinu.

Í tengslum við þetta átak unnu svo Tryggvi Þór Herbertsson og Frederic Mishkin, þekktur hagfræðiprófessor, þekkta skýrslu sem nægði til þess að kveða niður drauginn sem nú er kominn á kreik á ný. Ríkisstjórnin og bankamenn hittust í Ráðherrabústaðnum um daginn og þar var rætt um að hrinda af stað nýju átaki til þess að efla traust á íslenskum fjármálamarkaði og reyna að tala niður skuldatryggingaálag bankanna og ríkissjóðs.

Þess vegna leita menn að draugabana og Orðið á götunni er að Bjarni sé þar efstur á blaði, en lítið hefur til hans spurt eftir REI-málið

Orðið á götunni er að spennan sé farin af húsi Orkuveitu Reykjavíkur og stjórnendur fyrirtækisins varpi öndinni léttar eftir að niðurstaða er fengin í mál Vilhjálms Þ. Vilhjálmssonar innan borgarstjórnarflokks sjálfstæðismanna.

Mikil spenna hefur verið í fyrirtækinu um framtíð þeirra Guðmundar Þóroddssonar og Hjörleifs Kvaran. Í kjölfar skýrslu REI-stýrihópsins var talið að þeir yrðu látnir axla ábyrgð og látnir fara frá fyrirtækinu. Sjálfstæðismenn og Ólafur F. Magnússon töluðu á þá leið en mættu strax mikilli andstöðu. Það þótti ekki ganga að láta embættismenn eina sæta ábyrgð ef pólitíkusar sætu áfram.

Ef Vilhjálmur hefði ákveðið að hverfa af sviðinu hefði staða þeirra tveggja verið erfið en í kjölfar þess að Vilhjálmur hefur ákveðið að halda kyrru fyrir er talið að málið sé í raun dautt. Ef borgarstjórnarmeirihlutinn færi að stugga við Guðmundi og Hjörleifi yrði það til þess eins að ýfa upp sár REI-málsins, sem er það síðasta sem sjálfstæðismenn vilja gera eins og málin standa.

Það vakti athygli í DV í dag að þar er viðtal við Vilhjálm Þ. Vilhjálmsson á forsíðu og fyrirsögnin sótt í smiðju Nixons, Ég er ekki skúrkur. Í viðtalinu staðfestir Vilhjálmur það að Davíð Oddsson er ekki alveg hættur afskiptum af pólitíkinni þótt hann sé nú Seðlabankastjóri. Vilhjálmi finnst vænt um þann stuðning sem Davíð hefur sýnt honum undanfarið.

DV hefur ekki verið að hlífa Vilhjálmi undanfarna daga, þvert á móti hefur enginn fjölmiðill sótt jafnhart að honum og einmitt það blað. Það vekur því athygli að Reyni Traustasyni virðist hafa snúist hugur og lýsir stuðningi við Vilhjálm í leiðara dagsins.

En Orðið á götunni er að það veki mesta athygli við þetta viðtal í fjölmiðlaheiminum að blaðamaðurinn sem tekur viðtalið er Kjartan Gunnar Kjartansson. Hann sér um ættfræðiskrif í DV og er lítið í fréttamálunum. Hins vegar er hann vel tengdur Vilhjálmi í gegnum eiginkonu sína, Mörtu Guðjónsdóttur, varaborgarfulltrúa Sjálfstæðisflokksins og formann Varðar, fulltrúaráðs sjálfstæðisfélaganna í Reykjavík.

Þess vegna er það Orðið á götunni að Villi hafi sett það sem skilyrði fyrir því að veita viðtalið að Kjartan Gunnar tæki það.

Orðið á götunni er að Össur Skarphéðinsson eigi von á því á næsta ríkisstjórnarfundi að forsætisráðherra leggi fram leiðbeiningar um háttatíma ráðherra sinna. Bæði Geir Haarde og Björn Bjarnason hafa látið í ljós áhyggjur yfir því að Össur fái ekki nægilega hvíld og þurfi að fara fyrr að sofa í staðinn fyrir að sitja við tölvuna og blogga fram undir morgun.

Samt lætur iðnaðarráðherrann ekkert slá sig út á laginu, eins og þeir urðu greinilega varir við sem voru með honum á Food and Fun á föstudaginn og urðu ekki varir við annað en að hann væri alveg útsofinn.

Þarna flutti Össur eitursnjalla ræðu á ensku og varð nokkrum sinnum að gera hlé svo að áheyrendur gætu jafnað sig á hlátrinum áður en hann héldi áfram. En hann gerði bara grín að sjálfum sér þannig að ríkisstjórnarsamstarfið hvorki versnaði né batnaði meðan ræðan var flutt.

Orðið á götunni er að loksins sé búið að ákveða hvenær Baugsmálið verður flutt fyrir Hæstarétti.  Þetta er síðasti angi málsins, þ.e.a.s. ef undan eru skilin skattamálin, sem enn er verið að garfa í og rannsaka.
En það var í júní í fyrrasumar sem Héraðsdómur kvað upp sinn dóm og menn hafa lengi beðið eftir því að Hæstiréttur setti málið á dagskrá svo að fá mætti það út úr sögunni. Flestir vilja sennilega að því ljúki sem fyrst.

Og á dögunum var loksins komið að því að lögmenn fengu hringingu frá Hæstarétti með upplýsingum um að málið hafi verið sett á dagskrá réttarins þann 14. maí. Þannig að væntanlega kemur endanlegur dómur í síðasta lagi í kringum mánaðamótin maí-júní.

Orðið á götunni er að David Karsbøl hjá greiningardeild Saxo Bank hafi alveg farið með sig í ummælum sínum í Börsen í dag þar sem hann sagði að Seðlabanki Íslands væri að dæla peningum inn í hagkerfið. Það sé eitthvað sem menn sjái í þróunarríkjum eins og Simbabve en ekki í vestrænu hagkerfi.

Þetta þykir renna mjög sterkum stoðum undir þá fullyrðingu Sigurðar Einarssonar, stjórnarformanns Kaupþings, að annað hvort sé maðurinn heimskur eða fáfróður - að minnsta kosti sé hann örugglega meinfýsinn í góðu meðallagi.

Vissulega hefur Seðlabankinn nýlega ákveðið að auka veðhæfi í eignum bankanna í erlendum gjaldmiðli, en sú breyting er til samræmis við það sem gerist og gengur í vestrænum hagkerfum. Á hinn bóginn vegur á móti að Seðlabankinn takmarkar einmitt peninga í umferð með hávaxtastefnu sinni, sem margir kenna við okurvexti. Með ummælum sínum er Daninn hins vegar að gefa ranglega í skyn að Seðlabankinn sitji við það að prenta peninga og virðist með því vera að reyna að tala niður krónuna. Ætli eitthvað að dönsku bönkunum séu með skortstöður í krónunni og eigi hagsmuna að gæta að því að hún falli all hressilega?

Orðið á götunni er að Geir H. Haarde, forsætisráðherra, sé kominn með nýjan efnahagsráðgjafa sem er að móta tillögur fyrir ríkisstjórnina um viðbrögð við bankakrísunni.

Ráðgjafinn er Finnur Sveinbjörnsson, fyrrverandi forstjóri Sparisjóðabankans, Icebank, en honum var einmitt sagt upp störfum í hallarbyltingu sem gerð var þar nýlega. Finnur hefur undanfarið verið að kalla fyrir sig helstu stjórnendur bankanna í nafni forsætisráðherra.

Orðið á götunni er að það sé fundin skýring á því hvað Guðjón Þórðarson, knattspyrnuþjálfari, var að gera í Valhöll, húsi Sjálfstæðisflokksins, þegar öll blaðamannastétt landsins beið í anddyrinu eftir því Vilhjálmur Þ. Vilhjálmsson mætti á löngu boðaðan blaðamananfund.

Þegar blaðamennirnir höfðu beðið í klukkutíma eftir Villa kom Guðjón Þórðarson í húsið - en enginn vissi hvers vegna. Ætlaði hann að taka að sér að þjálfa borgarstjórnarflokkinn? Eða var hann bara á leið til tannlæknis upp á 4. hæð í Valhöll?

Gátan er leyst. Guðjón er orðinn kennari við Stjórnmálaskóla Sjálfstæðisflokksins og var að koma á undirbúningsfund. Mánudaginn 10. mars mun hann halda fyrirlestur um “Listina að byggja upp liðsheild.” Það verður áreiðanlega skyldumæting á þann fyrirlestur fyrir borgarastjórnarflokkinn í Reykjavík.

Skólinn tók til starfa í gærkvöldi með setningarávarpi Geirs H. Haarde, forsætisráðherra, formanns Sjálfstæðisflokksins og mágs Guðjóns Þórðarsonar. Námskrána má kynna sér með því að smella hér.

Orðið á götunni er að nemendur í skólanum bíði sérstaklega spenntir eftir laugardeginum 1. mars. Þá verður haldinn gestafyrirlestur um “listina að vera leiðtogi.” Það er leyndarmál hver heldur þann fyrirlestur - kannski næsti borgarstjóri í Reykjavík?

Þriðjudagskvöldið 26. febrúar verður Guðlaugur Þór Þórðarson heilbrigðisráðherra við kennarapúltið og kennir fag sem heitir “Velferð fyrir alla.” “Þetta var kjörorð verkalýðsins 1. maí í fyrra,” sagði góðkunnur Davíðsmaður stundarhátt og hristi hausinn yfir öllum krötunum sem ráða ríkjum í Valhöll þessa dagana.

Það hefur vakið athygli undanfarna daga að ýmsir forystumenn Samfylkingarinnar hafa gengið fram fyrir skjöldu í innanbúðarátökunum í Sjálfstæðisflokknum og verja formanninn og forsætisráðherrann Geir H. Haarde með kjafti og klóm.

Orðið á götunni er að Össur Skarpéðinsson hafi sérstaklega beitt sér í því að bera blak af forsætisráðherranum. Um helgina mætti hann í Mannamál hjá Sigmundi Erni og var aðallega að tala um hvað Geir Haarde væri æðislegur. Það barst líka í tal þegar Össur heimsótti Loga í beinni á Stöð 2 á föstudagskvöldið. Aðrir forystumenn Samfylkingarinnar hafa líka lagt sitt af mörkum, til að mynda þau Ingibjörg Sólrún Gísladóttir og Björgvin G. Sigurðsson.

Orðið á götunni er að sjálfstæðismönnum þyki sumum lítið til koma og þeir spyrja sig hvaða hugur fylgir máli? Gæti verið, að Samfylkingin vilji halda Geir H. Haarde sem lengst í forystu Sjálfstæðisflokksins, því að hún á honum skuld að gjalda. Bæði bjargaði Geir Samfylkingunni úr eyðimörk stjórnarandstöðunnar og síðast en ekki síst hefur hefur hagur Samfylkingarinnar vænkast sem aldrei fyrr í ríkisstjórnarsamstarfinu, einkum á kostnað Sjálfstæðisflokksins. Það er því ekki að undra þótt Samfylkingin sé ánægð undir stjórn Geirs.

Orðið á götunni er að þótt íslenska útrásin virðist vera með allt niðrum sig þessa dagana þá sé fyrsta íslenska útrásarfyrirtækið í betri málum en nokkru sinni fyrr. Verst að Íslendingar eru búnir að missa öll tök á fyrirtækinu..

Þetta er Stoke City, knattspyrnuliðið, sem var í sömu deild og Huddersfield þegar hópur íslenskra kapítalista, með Guðjón Þórðarson, keypti í því ráðandi hlut með fulltingi Kaupþings skömmu fyrir aldamót. Þar með hófst íslenska útrásin. Það gerðu margir lítið úr félaginu og þessum viðskiptum og sögðu: Stók er djók. Það gekk á ýmsu í sögu Íslendinga og Stoke, en þegar íslensku bissnessmennirnir seldu loksins hlut sinn í félaginu voru þeir orðnir svo óvinsælir meðal stuðningsmanna félagsins að þeir þorðu varla að láta sjá sig á Brittania Stadium af ótta við að verða fyrir aðkasti.

En eftir að Íslendingarnir fóru á braut hefur Stoke City verið á uppleið. Nú er liðið í efsta sæti 1. deildar í ensku knattspyrnunni og hillir í að félagið komist í Úrvalsdeildina og moki inn milljörðum í sjónvarpstekjum. Það er ekki einn einasti Íslendingur eftir í herbúðum félagsins, hvorki í stjórn, starfsliði né leikmannahópi.

Orðið á götunni er að menn á fjármálamarkaði hafi orðið undrandi þegar ekkert kom út úr fundinum sem forsætisráðherra boðaði stjórnendur bankanna til í ráðherrabústaðnum í gær. Bankastjórarnir eru uppteknir menn og á fleygiferð út og suður og breyttu dagskrá sinni til þess að hitta forsætisráðherra. Enn sem komið er bendir hins vegar ekkert til annars en þess að forsætisráðherra hafi bara verið að bjóða bankamönnum í huggulegt molakaffispjall.

Forsætisráðherra boðaði fundinn sjálfur og tilkynnti um hann opinberlega í ræðu sinni á Viðskiptaþingi og þess vegna var við því búist að hann mundi gefa út tilkynningu um einhverjar aðgerðir að honum loknum. Davíð Oddsson, seðlabankastjóri, bjóst hins vegar ekki við stórum tíðindum af fundinum því að hann sagði á blaðamannafundi Seðlabankans í gær að fundur forsætisráðherra væri bara í framhaldi af fundi Seðlabankans með ríkisstjórninni.

Orðið á götunni er að annað hvort hafi þetta molakaffispjall engu skilað nema auknum efasemdum um forystuhæfileika forsætisráðherrans eða þá að það séu svo háleynilegar aðgerðir í undirbúningi að mjög stórra tíðinda sé að vænta strax eftir helgi.  Hvaða ákvörðun gæti það verið? Kannski breytingar á lögum til þess að verða við háværum kröfum atvinnulífsins um breytingar á peningamálastefnu Seðlabankans?

Orðið á götunni er að í dag eða á morgun muni matsfyrirtækið Moody’s lækka lánshæfiseinkunnir íslensku bankanna en fyrirtækið tilkynnti um daginn að þeir væru allir teknir á athugunarlista.

Eftir ákvörðun Seðlabanka í morgun um að lækka ekki stýrivextina eins og vonast hafði eftir heyrast líka áhyggjur af því að Moddy’s tilkynni að bankarnir verði áfram á athugunarlista eftir lækkunina - sem þýði að fyrirtækið verði með enn eina lækkunina í undirbúningi. Þetta sögðu svartsýnismenn - nýbúnir að móttaka boðskap erkibiskupanna við Arnarhól í morgun.

Orðið á götunni er að á morgun verði kynntar niðurstöður í verðlaunasamkeppni um skipulag Vatnsmýrarsvæðisins. Fjölmargir aðilar hafa sent inn tillögur um breytingar á aðalskipulagi borgarinnar en Orðið á götunni er að á aðeins einni tillögu sé gert ráð fyrir því að flugvöllurinn eigi sér framtíð.

Tillögurnar verða kynntar með pompi og pragt í Listasafni Reykjavíkur í Tryggvagötu kl. 16 á morgun en Orðið á götunni er að hvorki gamli, góði Villi né Ólafur F. Magnússon borgarstjóri hafi mikinn áhuga á málinu og samkomunni. Þar verður Dagur B. Eggertsson, formaður stýrihópsins, og Hanna Birna Kristjánsdóttir, formaður skipulagsráðs í aðalhlutverki.

Og það fylgir sögu að Ólafur F. sé beinlínis að leggja stein í götu málsins. Sýningin í Hafnarhúsinu á að standa í eina viku en upphaflega stóð til að þá yrði hún flutt niður í Ráðhús. Nú er búið að breyta því. Eftir fyrstu vikuna flyst sýningin upp í Borgartún 3 í upplýsingaskála Skipulags- og byggingarsviðs, í sama sal og notaður er undir kynningu á deiliskipulagstillögum og hugmyndum um tvöföldun bílskúra, hækkun risglugga og þannig mál. Nýi borgarstjórinn er sem sagt á móti málinu og ætlar sér að lækka á því prófílinn sem mest hann má.

Orðið á götunni er að Jóhanna Vilhjálmsdóttir sé hætt störfum í Kastljósi Sjónvarpsins.  Hún tilkynnti samstarfsfólki sínu þetta í morgun og bar við persónulegum ástæðum.

Sjálfsagt hefur það verið undarlegur tími fyrir Jóhönnu undanfarið að vera starfsmaður Kastljóssins, helsta fréttaþáttar þjóðarinnar, meðan stormurinn hefur geisað um störf föður hennar, Vilhjálms Þ. Vilhjálmssonar, borgarstjóra. Jóhanna var nýkomin úr fæðingarorlofi til starfa á ný og kom brotthvarf hennar af skjánum á óvart en hún er tvímælalaust ein alfremsta sjónvarpskona landsins.

Orðið á götunni er að Geir H. Haarde og Guðlaugur Þór Þórðarson þrýsti á Vilhjálm Þ. Vilhjálmsson að þrauka og hætta ekki í borgarstjórn Reykjavíkur. Það er ekki bara umhyggja fyrir Villa sem þar býr að baki heldur líka staðan í valdabaráttunni innan flokksins. Ef Vilhjálmur færi úr borgarstjórnarflokknum mundu ítök þeirra sem standa næst Geir og Guðlaugi Þór verða að engu í borgarstjórnarflokknum.

Geir og Guðlaugur Þór ekki áhuga á að ýta undir Hönnu Birnu Kristjánsdóttur eða nokkurn annan í borgarstjórnarflokknum sem næsta leiðtogaefni sjálfstæðismanna. Sú staða er frátekin fyrir annan mann, sem þessir mestu áhrifamenn flokksforystunnar í Reykjavík vilja að leiði D-listann í næstu kosningum. Sá er Borgar Þór Einarsson, stjúpsonur forsætisráðherrans.