Eyjan.is

Orðið á götunni er að það sé spenna í lofti í viðskiptalífinu þennan síðasta dag í mars, - lokadag fyrsta ársfjórðungs. Talið er að ýmsar aðgerðir, sem hafa verið í undirbúningi undanfarnar vikur og mánuði, fari nú að komast til framkvæmda. Það var til þess tekið að ýmis lykilstarfsmenn Landsbankans og Glitnis voru kallaðir til vinnu úr páskafríi á dögunum - það voru verkefni sem ekki máttu bíða.

Það á bæði við um það að farið verði að ganga að eignum ýmissa þeirra fjárfesta sem verst hafa orðið úti í gengishruni krónu og hlutabréfa síðustu vikur. Talið er að sláturtíðin í viðskiptalífinu sé að hefjast.

Orðið á götunni er að þetta eigi líka við um mannahald bankanna, fjárfestingarfélaga og fleiri fyrirtækja. Talið er víst að talsverður fjöldi fólks fái uppsagnarbréf í hendur í dag.

Loks er beðið eftir fréttum af sameiningu á bankamarkaði. Þar er sjónum sérstaklega beint að Glitni og BYR annars vegar og Landsbankanum og Straumi hins vegar.

Orðið á götunni er að margur maðurinn (konur og karlar) í jafnréttisiðnaðinn hafi hrist hausinn í forundran þegar nýlega var gengið frá ráðningu nýrra sviðsstjóra í félagsmálaráðuneytinu, sem er einmitt ráðuneyti jafnréttismála.

Stöðurnar voru mjög eftirsóttar og skiptu umsækjendurnir tugum, 75% umsækjenda þeirra voru konur. En þegar kom að því að ráða voru þrír karlar ráðnir og einn kona. Það er líka til þess tekið að enginn af starfsmönnum félagsmálaráðuneytisins fékk framgang í sviðsstjórastöðurnar.

Orðið á götunni er að óánægja sé á markaðnum með það hvernig staðið var að því að skrá Skipti - móðurfyrirtæki Símans - á markað. Margar spurningar vakni um framgangsmátann - bæði hvernig eigendurnir stóðu að verki og ekki síður það að fjármálaráðherra hefur gefið til kynna að hann geri engar athugasemdir við verklagið og fallist á að eigendurnir hafi uppfyllt samning sinn við ríkið.

Þegar Skipti keypti Símann fylgdi sú kvöð að skrá félagið á markað í síðasta lagi í lok árs 2007 og bjóða um leið almenningi að kaupa þriðjung hlutafjárins. Í síðasta lagi sagði í samningnum en rétt áður en fresturinn rann út báðu Skipti um frest og fengu hann greiðlega hjá Árna M. Mathiesen fjármálaráðherra. Á þessum tíma voru aðstæður á markaði orðnar erfiðar þótt þær hafi ekki verið neitt í líkingu við það sem síðar varð og svo voru Skipti á þeim tíma þátttakendur í tilraunum til að einkavæða slóvenskt símafyrirtæki. Því var veittur frestur til loka mars á þessu ári.

Orðið á götunni er að eftirvænting hafi verið fyrir útboðinu - þótt markaðsaðstæður hafi ekki verið þær bestu. Það réði eftirvæntingunni að þegar Síminn kæmi á markað yrði loks til hér eiginlegur hlutabréfamarkaður með fjarskipta- og fjölmiðlafyrirtæki. Fyrir voru Teymi og 365 en Skipti mundu gefa þessum geira markaðarins aukna breidd og dýpt, sem þótti mikilvægt.

Það var svo í byrjun mars sem Skipti voru tilbúin að uppfylla samninginn og bjóða almenningi að kaupa hlutaféð, sem Skipti höfðu fengið að ávaxta í þrjú ár. Strax var gagnrýnt að útboðsgengið væri - 6,64 - sem greiningaraðilum þótti of hátt og var mælt gegn kaupum á því verði. Raunverð var talið allt að 20% lægra en þetta gengi gaf til kynna. Það fór líka svo að þátttaka í útboðinu var lítil og einungis fjórðungur seldist af því sem var til sölu.

En þegar félagið var svo skráð á markað í lok síðustu viku tók við óvænt flétta því að korteri eftir að markaðir opnuðu með Skipti skráð í fyrsta skipti kom fram yfirtökutilboð frá Exista - langstærsta eigandanum, sem vildi innleysa og afskrá félagið.

Fjármálaráðherra hafði engar athugasemdir en Orðið á götunni er að menn spyrji sig hvort eigendur Skipta hafi sloppið létt frá skyldum sínum með því að ákveða einhliða of hátt sölugengi - þannig hafi samningurinn við ríkið verið uppfylltur til málamynda - síðan hafi félagið verið tekið á markaði. Annað hvort hafi ríkið samið af sér með því að sjá ekki við þessum möguleika eða þá að hagsmuna ríkisins hafi ekki verið gætt sem skyldi.

Orðið á götunni er að um páskana sé verið að vinna í sameiningu Glitnis-banka og sparisjóðsins BYR og að jafnvel verði tilkynnt um sameininguna strax á morgun. Glitnir og BYR eru að verulegu leyti í eigu sömu aðila, sem eru nátengdir Baugi og FL Group.  BYR var áður Sparisjóður vélstjóra, Sparisjóðurinn í Hafnarfirði og fleiri sparisjóðir.
Eins og Orðið á götunni sagði frá á dögunum sagði BYR með afar umdeildum hætti upp 14 konum í byrjun mars en þær uppsagnir eru aðeins taldar forsmekkurinn að því sem koma skal í fjármálageiranum. Framundan eru tímar þar sem fjármálafyrirtæki munu leita allra leiða til að fækka starfsfólki og draga úr kostnaði.

Orðið á götunni er að tilkynnt verði um fjölmargar uppsagnir starfsmanna bankanna um næstu mánaðamót og að einnig sé fleiri sameiningar í farvatningu, - þar er fyrst og fremst horft á Landsbankann og Straum, en Björgólfur Thor Björgólfsson og tengdir aðilar eru sem kunnugt er ráðandi á báðum stöðum.

Orðið á götunni er að gríðarlegur kurr sé í verkalýðshreyfingunni vegna þeirra vinnubragða sem sparisjóðurinn Byr beitti við uppsagnir 14 kvenna nú á dögunum.

Orðið á götunni er að þarna hafi verið hreinsaðar úr starfsliðinu konur á aldrinum 50 ára og eldri, margar með 20-35 ára starfsaldur, á sama tíma og 30-35 nýir starfsmenn hafi verið ráðnir til starfa hjá fyrirtækinu á síðustu mánuðum - en flestir nýju starfsmannanna eru yngri konur. Uppsagnirnar hafi ekki verið gerðar í sparnaðarskyni heldur hafi þetta hafi verið ímyndaraðgerð og eldri konurnar hafi ekki passað inn í þá ímynd sem fyrirtækið vilji gefa af sér.

Sérstaklega var tekið eftir því að konunum sem sagt var upp störfum var boðið upp á að þiggja þriggja klukkustunda áfallahjálp á kostnað fyrirtækisins og Orðið á götunni er að miðað við þá aðferð sem beitt var við uppsögnina sé einboðið að margar kvennanna þurfi á slíkri aðstoð að halda, jafnvel þótt sparisjóðurinn ætli að borga þeim nokkuð lengri uppsagnafrest en samningar kveða á um, eða amk í sumum tilfellum 9-12 mánuði. Verkahlýðshreyfingin er æf yfir málinu, m.a vegna þess að rótgrónar hefðir um samskipti við uppsagnir af þessu tagi voru brotnar og boðleiðir ekki virtar. Þannig hafi upplýsingaskyldu við trúnaðarmenn og verkalýðsfélag ekki verið sinnt og í sumum tilfellum hafi næsti yfirmaður ekki verið hafður með í ráðum áður og umsagnir þeirra um viðkomandi starfsmann að engu hafðar.

Aðferðin gengur líka þvert á þau fyrirheit sem starfsmönnum voru gefin við sameiningu þeirra sparisjóða sem mynda Byr en þá var sagt að ekki mundi koma til uppsagna heldur yrði hagræðingu náð í gegnum það að ráða ekki fólk í stað þess sem léti sjálft af störfum. Orðið á götunni er að uppsagnarbréfin hafi verið undirrituð í byrjun febrúar þótt þau hafi ekki verið afhent fyrr en í byrjun mars. Þær hafi verið látnar undirrita trúnaðarsamning þar sem fram komi að þær megi ekki ræða málefni sparisjóðanna við nokkurn mann, þar á meðal ekki uppsögnina.

Orðið á götunni er að allmargir þeirra sem keyptu sér nýjustu Land Cruiser 200 týpuna nýlega á 10,6-11,2 milljónir kr. stykkið hafi notað einhvern hluta úr hinum sótsvarta mánudegi, sem gekk yfir markaðina í gær, til þess að hringja í umboðið og kvarta yfir eyðslunni, sem sé sko ekkert 11 lítrar á hundraðið eins og auglýst sé, heldur miklu nær því að vera, fjandinn hafi það, 14!

Engum sögum fer af hliðstæðum upphringingum í Seðlabankann til að kvarta yfir álíka hækkun á myntkörfulánunum sem tekin voru vegna sömu bifreiða.

Orðið á götunni er að Bear Sterns, bandaríski fjárfestingabankinn, sem JP Morgan, eignaðist á brunaútsölu um helgina, hafi tekið þátt í að aðstoða Íslendinga í útrásinni.

Talið er að áhrifin frá hruni Bear Sterns séu helsta skýringin á þeirri miklu dýfu sem varð á hlutabréfamörkuðum um allan heim í dag - ekki síst hér á landi. Áhættufælni er það kallað

Bear Sterns hefur einkum unnið með Milestone - félagi Karls Wernerssonar, sem er eigandi Askar Capital og Sjóvár, og tók bandaríski bankinn þátt í fjármögnun á Milestone á kaupum á sænska fjárfestingarfélaginu Invik, sl. vor.

Það þótti ekki í kot vísað á þeim tíma fyrir Milestone að eiga svo öflugan viðskiptafélaga - einn stærsta fjárfestingarbanka Bandaríkjanna. En skjótt skipast veður í lofti - miðað við verðlagningu Bear Sterns í sölunni um helgina virðist sem höfuðstöðvarnar í New York hafi verið eina verðmæta eign bankans þegar á reyndi.

Orðið á götunni er að aðalfundur Árvakurs, útgáfufélags Morgunblaðsins, sé á næsta leiti og verði haldinn öðru hvoru megin við páska. Búist er við að þar verði skipt um stjórnarformann í fyrirtækinu og að Stefán P. Eggertsson, verkfræðingur, og fulltrúi fjölskyldu Valtýs Stefánssonar, láti af störfum, enda hefur fjölskyldan ekki lengur þau áhrif á  útgáfuna sem áður var.

Björgólfur Guðmundsson á nú 51% í Árvakri, eftir að hann keypti Forsíðu, félag í eigu Ólafs Jóhanns Ólafssonar, rithöfundar, í haust sem leið. Reyndar hefur enn ekki verið sagt frá þeim viðskiptum í Morgunblaðinu sjálfu. Einnig eiga fleiri hluthafar sölurétt á Björgólf og er talið að hann ráði alls yfir um 2/3 hlutum hlutafjárins. Talið er að á aðalfundinum nú muni loks koma að því að skipað verði í stjórn í samræmi við eigendahlutföllin.

Á aðalfundinum verða vitaskuld birtar upplýsingar um afkomu Árvakurs á síðasta ári en á árinu 2006 tapaði félagið hvorki meira né minna en um 650 milljónum króna og átti einungis eftir eigið fé til þess að standa undir óbreyttu tapi fram á mitt þetta ár.

Sú frétt sem mest er beðið eftir úr herbúðum Morgunblaðsins tengist hins vegar ritstjóramálum en Styrmir Gunnarsson, ritstjóri, verður sjötugur síðar í þessum mánuði. Hefð er fyrir því á Morgunblaðinu að ritstjórar og aðrir starfsmenn hætti árið sem þeir verða sjötugir og var þeirri reglu t.d. framfylgt þegar Matthías Johanenssen varð sjötugur þótt hann væri þá í fullu fjöri og með óskerta starfsorku. Þess hefur því verið vænst að Styrmir láti af störfum í ár og hefur verið talað um að starfslok hans verði eigi síðar en í október. En síðustu fréttir af þeim málum eru þær að óvíst sé hvort Styrmir hætti. Ekkert hefur farið fyrir tilraunum til þess að finna eftirmann hans og er jafnvel talið að til standi að hann haldi áfram störfum.

Orðið á götunni er að Guðni Ágústsson, formaður Framsóknarflokksins, ætli að leggja fram tillögu á Alþingi um að eldri borgarar verði styrktir til þess að yfirgefa Ísland og dvelja á Kanaríeyjum yfir köldustu mánuði ársins. Þetta telur hann að geti verið liður í sparnaðaraðgerðum ríkissjóðs.

Hugmyndiin fæddist hjá Guðna þegar hann sat framsóknarfund með 360 Íslendingum á Klörubar á Gran Canaria í gærmorgun.

Orðið á götunni er að Guðni hafi leikið á als oddi og einnig aðrir fundarmenn. Þarna var fluttur vitnisburður um að gigtarsjúklingar, asmasjúklingar og aðrir losni við lyf og fái bata eftir dvölina á Kanarí og þannig kviknaði hugmyndin að útrás til Kanarí í því skyni að bæta líðan sjúkra og spara ríkissjóði stórfé í leiðinni.

Orðið á götunni er að flest knattspyrnufélög séu í hálfgerðum bobba nú í upphafi keppnistímabilsins. Mörg þeirra hafa notið myndarlegra styrkja frá auðmönnum og fyrirtækum í veislunni undanfarin ár en nú eru þeir tímar liðnir og annað hljóð komið í strokkinn hjá styrktaraðilum.

Fram hefur lengi reitt sig á öflugan stuðning Hannesar Smárasonar og FL Group en nú er forstjórinn nýbúinn að lýsa því yfir að spara eigi 50% í rekstri fyrirtækisins á næsta ári.

Og mörgum finnst fokið í flest skjól fyrir knattspyrnufélögin þegar sjálfur Björgólfur Guðmundsson, yfir KR-ingur Íslands, er hættur afskiptum af málum knattspyrnudeildar KR. Björgólfur hefur stutt KR af fádæma myndarskap undanfarin ár en sá tími er liðinn. Hann einbeitir sér að rekstri West Ham.

Orðið á götunni er að nýr félagi hafi fengið inngöngu í félagsskap þar sem 16 fyrrverandi utanríkisráðherrar með Madeleine Albright, Igor Ivanov, Lloyd Norman Axworthy og Joscha Fischer í broddi fylkingar koma reglulega saman til þess að ræða stöðu og horfur í heimsmálum.

Klúbburinn hélt fund í Kaupmannahöfn um helgina og þar var Halldór Ásgrímsson formlega tekinn inn í félagsskapinn en hann er sem kunnugt er búsettur í Kaupmannahöfn og stýrir þar skrifstofu Norrænu ráðherranefndarinnar.

Orðið á götunni er að sífellt fleiri fyrirtæki séu að fækka starfsfólki og reyna þannig að draga úr kostnaði. Nú um mánaðamótin var fjórtán starfsmönnum sagt upp hjá Sparisjóðnum BYR - sameinuðu fyrirtæki Sparisjóðs vélstjóra, Sparisjóðs Hafnarfjarðar, Sparisjóðs Kópavogs og Sparisjóðs Norðlendinga. Um leið var lokað afgreiðslunni í Smáralind og boðað að afgreiðslunni í Orkuveituhúsinu verði lokað innan fárra vikna.

Icelandic Group er annað fyrirtæki sem fækkaði fólki um mánaðamótin. Þar var fimm starfsmönnum gert að hætta störfum í sparnaðarskyni.

Aðalfundur 365 verður haldinn nú eftir hádegið og Orðið á götunni er að þar sé að vænta tilkynningar um breytta markaðssetningu sjónvarpsstöðva fyrirtækisins. Það stendur víst til að binda eina slaufu utan um allar sjónvarpsstöðvar 365 með nýjum nafngiftum - sem hafa ekki áhrif á dagskrána eða starfsfólkið og heldur ekki áskrifendur. Þetta er svona “Ný föt - sama röddin” breyting sem stendur til að gera.

Annars er það helst á dagskrá, auk venjulegra aðalfundarstarfa, að lagt er til að hlutafé verði aukið um 1,5 milljarð króna og svo á að samþykkja að boða framvegis fjölmiðla á aðalfundinn - og verður þá fyrirkomulagið eins og hjá RÚV ohf. sem er skylt að bjóða fjölmiðlum á sinn aðalfund.

Orðið á götunni er að á ekki-fundi framsóknarmanna hvaðanæva að á landinu á laugardag hafi komið í ljós að gríðarlega óánægja er í flokknum með stöðu flokksins og stefnu núverandi forystu.

Þar endurspeglast með skýrum hætti hve djúpt Evrópuumræðan ristir um þessar mundir í pólitíkinni. Líkt og í öðrum flokkum er Framsóknarflokkurinn klofinn í herðar niður í afstöðunni til Evrópusambandsins. Þótt Guðni Ágústsson, formaður og Bjarni Harðarson, nánasti ráðgafi hans, séu harðir andstæðingar hefur Valgerður Sverrisdóttir lengi verið í hópi eindregnustu Evrópusinna og hún talar fyrir munn margra í flokknum, þar á meðal margra þeirra sem mættir voru til ekki-fundarins á laugardaginn til þess að kanna hvort möguleiki væri á að flokkurinn gæti reist sig við.

Það kom skýrt fram á fundinum - þar sem sat stór hluti þess fólks sem mest hefur unnið í grasrót flokksins undanfarið - að margir framsóknarmenn ætla að láta afstöðuna til Evrópusambandsins ráða atkvæði sínu í næstu kosningum og mun ekki fylgja flokki sem hefur þá stefnu í þeim málum sem Guðni og þó sérstaklega Bjarni hafa talað fyrir undanfarið.

Orðið á götunni er að í gær hafi verið haldinn óopinber fundur, eins konar non-meeting, þar sem hittust um 40 framsóknarmann hvaðanæva að landinu - margir þeirra úr fylkingum sem tekist hafa hart á um allt og ekkert undanfarin ár. Þarna var hins vegar enginn úr forystunni og enginn yfir fimmtugu. Engir þingmenn fengu að vera með nema Birkir Jón og Höskuldur Þórhallsson.

Þarna voru m.a. Páll Magnússon, bæjarritari í Kópavogi, Gunnar Bragi Sveinsson, bæjarfulltrúi á Sauðárkróki, Björn Ingi Hrafnsson, fyrrverandi borgarfulltrúi, Óskar Bergsson, núverandi borgarfulltrúi, Hallur Magnússon, þekktastur fyrir störf hjá Íbúðalánasjóði og Birkir Jón Jónsson, þingmaður og líka Vigdís Hauksdóttir, fyrrv. varaþingmaður og einn nánasti ráðgjafi Guðna Ágústssonar, Dagný Jónsdóttir, fyrrverandi þingmaður, og Sæunn Stefánsdóttir ritari flokksins.

Fundarefnið var það að staða Framsóknarflokksins þykir orðin grafalvarleg, svo alvarleg að hann eigi sér ekkert líf framundan nema flokksmenn temji sér önnur vinnubrögð og láti á það reyna hvort þeir geti náð sátt um málefni og vinnubrögð til frambúðar. Niðurstaðan var sú að reyna að skipta um aðferðir í flokksstarfi og samstarfi og eru víst næstu skref í undirbúningi í þeim efnum.

Orðið á götunni er að einn mesti áhrifamaðurinn í íslensku efnahagslífi um þessar mundir sé Sturla Pálsson, framkvæmdastjóri alþjóða- og markaðssviðs Seðlabankans. Sturla er ekki aðeins einn helsti stjórnandi Seðlabankans heldur nánasti hagfræðilegur ráðgjafi og samstarfsmaður Davíðs Oddssonar, formanns bankastjórnarinnar, sem hefur á honum miklar mætur.

Sturla hefur ekki verið áberandi opinberlega í umræðunni hingað til en viðskipta- og efnahagslífinu er ljóst að orð fárra vega þyngra en hans um þessar mundir, það var því tekið eftir því sem Sturla sagði þegar hann kom fram sem talsmaður bankans í hádegisfréttum RÚV í gær.

Orðið á götunni er að Fjármálaeftirlitið sé með öngulinn í rassinum eftir að hafa reynt í sex mánuði að veiða upplýsingar um það hver sé í raun eigandi um 23,8% hlutafjár í Straumi Burðarás. Hluturinn er skráður á söfnunarreikning Landsbankans í Lúxemborg en bankinn neitar að svara hver stendur þar á bak við.

Einkum er þreifað um 5% hlut sem huldumenn keyptu í bankanum sl sumar fyrir 10 milljarða - en á undirgengi. Það var sagt að þetta væri erlendur fagfjárfestir sem myndi styrkja félagið til lengri tíma litið og því væri réttlætanlegt að hann fengi að kaupa bréfin með verulegum afslætti. Enn fást engar upplýsingar um hvað aðilar þetta eru.
Stærsti hluthafinn í Straumi Burðarás er Samson með rúm 32% og því vel undir yfirtökuskyldunni, sem stofnast við 40%. Samson er líka eigandi Landsbankans og það er einmitt Landsbankinn í skattaparadísinni Lúxemborg sem fer með þennan 23,8% eignarhlut og þann atkvæðisrétt sem honum fylgir.

Orðið á götunni er að Fjármálaeftirlitið sé ráðalaust gagnvart neitun Landsbankans í skattaparadísinni við því að veita upplýsingar um raunverulega eigendur. En þar sem amk kaupendur þessara 5% frá því í sumar eru sagðir vera “erlendur fagfjárfestir” er væntanlega ljóst að þeir peningar eru ekki partur af þeim 500 milljörðum króna sem Indriði Þorláksson, fyrrverandi ríkisskattstjóri, fullyrðir að íslenskir aðilar geymi í erlendum skattaparadísum.

Orðið á götunni er að ætli Seðlabankinn að vera samkvæmur sjálfum sér hljóti hann að hækka stýrivexti enn frekar þann 10. apríl - nema eitthvað ófyrirséð gerist fram að þeim tíma.

Þótt hjól efnahagslífsins séu farin að snúast hægar er enn mikil spenna í efnahagslífinu eins og forsíðufrétt Moggans í dag um aukna sölu á bílum og utanlandsferðum staðfestir.

Annað sem mælir á móti því að spár greiningardeilda bankanna um lækkandi stýrivexti rætist er það að vísitala neysluverðs hækkaði í síðustu viku um 1,38% og verðbólgan er núna 6,8% en um næstu mánaðamót dettur út úr 12 mánaða mælingu 0,3% verðhjöðnun þannig að það er talið öruggt að 12 mánaða verðbólga sé að aukast. Einnig eru nýgerðir kjarasamningar að mælast með auknum launakostnaði. Verðbólga vegna innflutnings er líka mikil vegna hækkana á áburðarverði, olíuverði, kornverði og vegna þess að gengi krónunnar er að lækka.

Þannig að Orðið á götunni er að menn í fjármálalífinu spyrji sig: Hvers vegna í ósköpunum ætti Seðlabankinn að lækka stýrivexti í næstu framtíð?

Orðið á götunni er að hópuppsagnir í atvinnulífinu séu rétt að byrja. Fyrir helgi sagði deCode upp 60 manns og byggingafyrirtækið Stafnás 95 manns. Víðar er verið að segja upp fólki en í bankageiranum eru menn að bíða eftir því að látið verði til skarar skríða.

Talið er að bankar og fjármálafyrirtæki muni segja upp allt að 1.000 manns næstu þrjá mánuðina eða svo. Þetta á við um alla bankana og uppsagnirnar verða jafnt á fjárfestingabankasviði og viðskiptabankasviði. Útibú og deildir verða lagðar niður og sameinuð og allra leiða leitað til þess að draga úr kostnaði - ólíkt því sem verið hefur undanfarin misseri þegar bankarnir söfnuðu fitu í góðærinu. Þeir tímar eru liðnir.

Orðið á götunni er að í morgun hafi fjölmenn sveit frá Kaupþingi og Skiptum - móðurfyrirtækis Símans - farið utan til Kaupmannahafnar. Erindið er að undirbúa skráningu Skipta á hlutabréfamarkað.

Orðið á götunni er að stemmningin í hópnum sé blendin - það eru engar draumaaðstæður til þess að skrá nýtt fjarskiptafyrirtæki á markaðinn. Þegar Skipti keyptu Símann af ríkinu var ákvæði um að fyrirtækið ætti að fara á markað fyrir lok síðasta árs og selja um leið þriðjung af félaginu til almennings. Skipti báðu Árna Mathiesen, fjármálaráðherra um frest fram í lok mars og fengu frestinn. En vegna aðstæðna á markaði hefur fresturinn ekki unnið með heldur á móti eigendum Skipta og niðursveiflan á mörkuðum síðan í haust þýðir að líklega hefur þessi seinkun kostað fyrirtækið milljarða.