Eyjan.is

Orðið á götunni er að engan skyldi undra þótt það verði Grjóthrun í Hólshreppi í nótt. Grímur Atlason bæjarstjóri er að láta af störfum í dag og nýr meirihluti og nýr bæjarstjóri tekur við. En þá tekur aukavinnan við - Grímur er bassaleikari í hljómsveitinni Grjóthrun í Hólshreppi og hljómsveitin heldur einmitt upp á meirihlutaskiptin í Bolungarvík með því að halda ball í Edinborgarhúsinu á Ísafirði í kvöld.

Orðið á götunni er líka að hreyfing sé að myndast fyrir því að Grímur taki við sveitarstjórastarfinu í Súðavíkurhreppi en Ómar Jónsson er af láta af því starfi eftir langa og dygga þjónustu. Ómar sást einmitt á ferð í Bolungarvík í gærmorgun, hvarf þar inn í ráðhúsið og var lengi á staðnum. Talið er að hann hafi verið að gera Grími tilboð.

Orðið á götunni er að menn í viðskiptalífinu ræði mikið sín á milli um framgöngu bankanna þessa dagana - sem hegði sér eins og hákarlar og vomi yfir þeim fyrirtækjum sem þeir telja að standi höllum fæti - með kauptækifæri í huga.

Bankarnir eru búnir að loka fyrir gjaldeyrisskiptasamninga sem fyrirtækin hafa beitt til að verja sig gegn tapi af völdum gengisþróunarinnar. Sum fyrirtæki sem hafa orðið fyrir þungum búsifjum einmitt vegna þess að þau hafa ekki getað átt eðlileg gjaldeyrisviðskipti hafa lent í því að fá upphringingar frá Landsbankanum þar sem verið er að bjóðast til þess að kaup hlut í þessum sömu fyrirtækjum á tombóluverði. Háttsettir menn í viðskiptalífinu ræða þetta sín á milli og spyrja um hvort það sé ekki orðið fullljóst að það er óþolandi fyrir viðskiptalífið á Íslandi að búa við það samkrull viðskiptabanka- og fjárfestingabankastarfsemi sem viðgengst á Íslandi - en ekki annars staðar.

Orðið á götunni er að sjálfstæðismenn á norðanverðum Vestfjörðum telji að þeir hafi náð gríðarlega góðum samningum við A-listann í Bolungarvík - og það er enginn meira hissa á því en sjálfstæðismennirnir sjálfir.

A-listinn var klofningsbrot út úr Sjálfstæðisflokknum og varð til í illindum eftir prófkjör fyrir kosningarnar 2006 þar sem Anna G. Edvardsdóttir varð undir í baráttu við Elías Jónatansson, lauk ættar Einars Guðfinnssonar, hins mikla frumherja þar í bæ. Anna klauf sig út úr Sjálfstæðisflokknum og náði kjöri og gekk til samstarfs við K-lista Bæjarmálafélags Bolungarvíkur, að loknum kosningum.

Mikil heift var milli A og D lista á kjörtímabilinu og er hermt að flestir bæjarfulltrúar D-lista hafi reynt að finna einhverja ástæðu til að starfa ekki með A lista. Á samningafundinum nú um helgina komu þeir með allar sínar kröfur, slógu hvergi af og reyndu að finna einhvern ásteytingarstein. 

“Vandamálið var bara að Anna Guðrún sagði já við öllu, hreinlega öllu,” sagði sjálfstæðismaður, “við bara gátum ekki annað en samið við hana.”

En það fékkst svo auðvitað aukavinningur í þessum meirihlutaskiptum frá sjónarhóli sjálfstæðismanna. Grímur Atlason fráfarandi bæjarstjóri virðist úr myndinni en það var farið að líta út fyrir að hann gæti orðið þeim skeinuhættur í þingkosningum. Sjálfstæðismenn vantar illa sterka leiðtoga á Vestfjörðum um þessar mundir - en Grímur var hins vegar farinn að bera sig svo mannalega að menn voru farnir að horfa til hans sem leiðtoga Samfylkingarfólks í héraðinu. Með meirihlutaskiptunum virðist hins vegar sem sjálfstæðismönnum hafi tekist að steypa undan þessum væntanlega keppninaut meðan hann var enn í flugtaki.

Orðið á götunni er að nýjustu fréttir úr Hádegismóum veki hreint enga kæti í Svörtuloftum. Nánar tiltekið þá er fullyrt að Davíðsmenn í Sjálfstæðisflokknum séu allt annað en ánægðir með það að Evrópusinninn Ólafur Þ. Stephensen á að taka við sem ritstjóri Morgunblaðsins af heimastjórnarmanninum Styrmi Gunnarssyni þann 2. júní næstkomandi.

Styrmir hefur verið innvígður og innmúraður í Davíðsarminn og helsti andstæðingur Evrópusambandsaðildar. Hann hefur stýrt herhlaupi Davíðsmanna í ýmsum umdeildum málum í þjóðfélaginu undanfarin ár. Ólafur Þ. Stephensen er hins vegar í fararbroddi Evrópusinna í Sjálfstæðisflokknum. Ólafur studdi Þorstein Pálsson gegn Davíð Oddssyni í formannsslagnum á sínum tíma. Í innanflokksátökum undanfarinna ára hafa bæði Ólafur og Þór Sigfússon, nýr stjórnarformaður Árvakurs, jafnan tekist á við nánustu samstarfsmenn Davíðs og verið andstæðingar þeirra, þannig eru þeir litlir stuðningsmenn Björns og Davíðs en þeim mun meiri stuðningsmenn Guðlaugs Þórs og Geirs.

En Orðið á götunni er líka að fyrst hafi verið sagt frá því á Orðið á götunni að Þór yrði stjórnarformaður Árvakurs og mundi gera það sitt fyrsta verk að ráða Ólaf sem ritstjóra Moggans.

Orðið á götunni er að það titri allt í höfuðstöðvum 365 í Skaftahlíðinni - annan daginn í röð er komið upp leiðindamál.

Í gær var það Lára Ómarsdóttir og spurningin um hvort henni var alvara eða ekki þegar hún bauðst til þess að fá einhvern til þess að henda eggi í lögguna í beinni útsendingu.

Í dag er það “vændisblaðamennska” fylgirits Fréttablaðsins, sem heitir Föstudagur og er í miðopnu Fréttablaðsins í dag. Á forsíðu þess er stór mynd af Ellý Ármanns og inni í miðopnu er svo “viðtal” sem er í raun ekkert annað en auglýsing fyrir húsið sem Ellý og maðurinn hennar, Freyr Einarsson, rannsóknarstjóri hjá 365, eru að reyna að selja. Marta María Jónasdóttir, titlaður ritstjóri fylgiritsins, dregur ekki af sér í lýsingum á húsinu og ágæti þess en Ellý vill ekki selja nema hún fái 120 milljónir króna. Ritstjórinn lætur þess svo ekki getið að maður Ellýjar er einn af yfirmönnum 365, heldur er hann kynntur þannig til sögunnar að hann “starfi við fjölmiðla.”

Blaðamenn Fréttablaðsins eru brjálaðir yfir því að heiður og sómi ritstjórnarinnar sé dreginn í svaðið með “vændisblaðamennsku” af þessu tagi, sem líðst ekki á dagblöðum sem taka sig alvarlega þótt einhverjir þykist hafa séð eitthvað svipað í gegnum tíðina í afkimum íslenska tímaritamarkaðarins.

Orðið á götunni er að Lára Ómarsdóttir, fréttamaður Stöðvar 2, sé ekki í góðum málum eftir óeirðirnar við Norðlingaholt í gær. Lára áttaði sig ekki á því að hún var í beinni útsendingu á Vísir.is þegar hún bauð pródúsent fréttastofunnar að athuga hvort hún gæti fengið einhvern til þess að kasta eggjum í lögguna í beinni útsendingu.

En hún var í beinni útsendingu á netinu og þess vegna náðist upptaka af tilboðinu. Orðið á götunni er að Lára hafi verið tekin á teppið strax í gær en að hún segist bara hafa verið að grínast.

Lára segir að þetta hafi verið óheppilegt hjá henni en adrenalínið og andrúmsloftið á staðnum hafi aðeins náð valdi á fólki í augnablik. Enginn hafi verið fenginn eða hvattur til þess að kasta eggjum - allt eggjakast sem náðist á mynd hafi verið án atbeina fréttamanna.

Málið er litið alvarlegum augum enda er fátt talið grafa eins undan trúverðugleika fréttamanna og ásakanir um að þeir sviðsetji fréttir - t.d. með því að gera raunverulega frétt um mestu mótmæli síðustu 50 ára aðeins meira krassandi með því að fá leikara til þess að taka að sér eggjakast. Hins vegar er greinilegt að Lára á talsverða innistæðu hjá samstarfsfólkinu sem trúir á heiðarleik hennar í starfi.

Orðið á götunni er að hluti þeirra bílstjóra sem handteknir voru af lögreglunni í morgun megi búast við því að missa vinnuna. Þetta voru menn í vinnu hjá verktakafyrirtækjum sem voru búin að banna sínum starfsmönnum þátttöku í aðgerðunum en vissu ekki fyrr til en þau sáu bílana sína í sjónvarpinu lokandi Suðurlandsveginum og starfsmennina í bardaga við lögregluna.
Lögregla hefur nú haldlagt bílana og má búast við að einhverjir dagar líði áður en þeim verður skilað. “Þeir mega hafa bílstjórann eins lengi og þeir vilja en ég vil fá bílinn,” sagði eigandi eins bílsins þegar hann hringdi í lögfræðinginn sinn í dag.

Orðið á götunni er að sjálfstæðismenn og A-listi séu langt komnir með að mynda nýjan meirihluta í bæjarstjórn Bolungarvíkur. Fundir hafa staðið yfir í allan dag á heimili Elíasar Jónatanssonar, oddvita sjálfstæðismanna, sem talið er víst að verði bæjarstjóri nýja meirihlutans.

Þar með verður Grími Atlasyni sagt upp sem bæjarstjóra en hann hefur gegnt því starfi frá því eftir kosningarnar 2006 og var ráðinn til starfa af meirihlutanum sem K-listi og A-listi mynduðu. K-listinn var sameiginlegt framboð félagshyggjufólks úr Samfylkingu og Framsóknarflokki en A-listi var klofningsframboð úr Sjálfstæðisflokknum myndað í kringum Önnu G. Edvardsdóttur.

A-listinn náði einum manni og missti þannig Sjálfstæðisflokkurinn meirihluta í þessu höfuðvígi sínu á landsvísu í fyrsta skipti í manna minnum. En sú útlegð virðist aðeins ætla að standa í tvö ár því að sættir eru að takast á ný milli Önnu annars vegar og Elíasar og Sjálfstæðisflokksins hins vegar. Það þykir sæta miklum tíðindum í Bolungarvík þar sem mikill hiti hefur verið í samskiptum þeirra á milli það sem af er þessu kjörtímabili.

Orðið á götunni er að tvennt hafi vakið athygli við skipun nýrrar stjórnar Landsvirkjunar sl. föstudag. Í fyrsta lagi að Ingimundur Sigurpálsson, var skipaður formaður stjórnarinnar, sama dag og hann hætti sem formaður Samtaka atvinnulífsins, þótt hann sé með á bakinu 300 milljóna króna sektir Samkeppniseftirlitsins fyrir ólögmætt samráð Eimskipafélagsins á þeim árum þegar Ingimundur var þar forstjóri. Þetta mál er talið hafa ráðið talsverðu um það að Ingimundur hætti hjá SA en þá bregst Árni Mathiesen við með því að gera hann að formanni Landsvirkjunar. En Ingimundur er hins vegar einn helsti trúnaðarmaður Sjálfstæðisflokksins og hefur löngum verið treyst fyrir bitlingum á vegum þess flokks.

Ekki vakti það síður athygli að Árni kaus að halda Páli Magnússyni, fráfarandi formanni Landsvirkjunar,  áfram í stjórninni. Páll er sem kunnugt er framsóknarmaður, var aðstoðarmaður Valgerðar Sverrisdóttur en framsókn átti hins vegar engan rétt á neinu stjórnarsæti og það er talið einsdæmi að einn stjórnmálaflokkur - í þessu tilfelli sjálfstæðismenn - gefi eftir eitt stykki bitling fyrir sinn eigin flokksmann til þess að setja annars flokks mann í opinbera stjórn. En það gerði Árni Mathiesen þegar hann skipaði Pál áfram í stjórn Landsvirkjunar. Og orðið á götunni er að menn klóri sér í kollinum og spyrji: hvernig stendur á því? Er þetta til marks um efasemdir sjálfstæðismanna um stjórnarsamstarfið - að þeir vilji bæta sambandið yfir til framsóknar og fari þá framhjá Guðna, sem er í betra sambandi við Davíð í Seðlabankanum en Geir í Stjórnarráðinu, og veðji frekar á að það sé framtíð í tengslum við Pál Magnússon.

Orðið á götunni er að það dragi til tíðinda í Evrópumálum. Á þingi Samtaka atvinnulífsins gær sagði Geir H. Haarde, forsætisráðherra, að Íslendingar ættu aðeins um tvennt að ræða: að ganga inn eða að ganga ekki inn í ESB, og þótti mönnum þetta skarplega athugað.

En orðið á götunni er að síðastliðinn miðvikudag hafi verið haldinn merkilegur þingflokksfundur hjá Samfylkingunni. Þar var mikið talað um Evrópumál. Niðurstaðan var sú að flokkurinn geti ekki lengur látið eins og ákvæði stjórnarsáttmálans séu nægilega afdráttarlaus.

Samfylkingin verði einfaldlega að koma fram með nýja línu sem tekur meira mið af stefnu flokksins heldur en tillitssemi við innanflokksvandræði samstarfsflokksins.

Orðið á götunni er að Guðni Ágústsson, formaður Framsóknarflokksins, hafi afþakkað boð um að taka þátt í ráðstefnu um Evrópumál sem Landssamband framsóknarkvenna ætlar að halda í Framsóknarhúsinu á laugardaginn. Óhætt er að segja að dagskrá ráðstefnunnar beri með sér að hún er haldin af þeim hluta flokksins sem er hallur undir aðild að Evrópusambandinu - og þar með á öndverðum meiði við Guðna og Bjarna Harðarson, sem eru helstu andstæðingar ESB innan framsóknar.

Á fundi framsóknarkvennanna ætla Valgerður Sverrisdóttir, varaformaður, og Siv Friðleifsdóttir, þingflokksformaður, báðar að flytja erindi, auk Andrésar Péturssonar, formanns Evrópusamtakanna. Guðna var boðið að taka þátt en sendi boð um að hann væri vant við látinn.

Orðið á götunni er að það sé eitthvað dularfullt við endalok Boston NOW, blaðsins sem Gunnar Smári tók að sér að stofna og ýta úr vör fyrir Baug. Fríblaðið í Boston gekk ágætlega og hefur tvöfaldað upplag sitt á því tæpa ári sem liðið er frá því það hóf göngu sína. Reksturinn hefur hins vegar alls ekki verið að skila neinum afgangi og lengi var leitað leiða til þess að taka á því. Ákveðin niðurstaða fékkst á föstudaginn þegar stjórnendateymi blaðsins, sem átti 25% í fyrirtækinu, keypti Íslendingana út úr fyrirtækinu.

Það næsta sem spyrst til fyrirtækisins er svo á mánudag þegar tilkynnt er að Boston NOW sé hætt að koma út og ástæðan sé efnahagsástandið á Íslandi. Hér gaus upp fnykur af einhverju. Baugsmenn kröfðust leiðréttingar og fengu en eftir stendur spurningin: af hverju tóku stjórnendur Boston NOW fyrirtækið yfir frá Baugi á föstudegi en lögðu það svo niður á mánudegi?

Orðið á götunni  er að aðrir fjölmiðlar í Boston hafi einfaldlega gert stjórnendunum tilboð sem þeir gátu ekki hafnað og borgað þeim fyrir að leggja upp laupana og hætta útgáfunni.

Orðið á götunni er að í réttarkerfinu eigi menn von á því að þriðja dómstiginu verði komið á í landinu strax á næsta ári.  Það kemur á óvart því að um þessar mundir er Alþingi með nýtt frumvarp um dómstóla til meðferðar þar sem ekkert er minnst á þriðja dómstigið. Megn óánægja er hins vegar meðal lögmanna, dómara og háskólakennara í lögfræði með núverandi skipan. Hún leiðir til þess að fjölmörgum málum er vísað frá Hæstarétti heim til héraðs að nýju af því að Hæstiréttur kallar ekki fyrir sig vitni heldur lætur nægja að dæma málin á grundvelli gagna um vitnayfirheyrslur í héraðsdómi. Sönnunarfærsla fyrir Hæstarétti er því ekki milliliðalaus hvað framburð vitna varðar og þess vegna er Hæstarétti þröngur stakkur sniðinn gagnvart ákvæðum Mannréttindasáttmálans. Þess vegna ómerkir rétturinn dóma og vísar þeim aftur heim í hérað þegar sönnunarmatið byggir á umdeildu mati á framburði vitna.

Þetta hefur lengi verið réttarkerfinu þyrnir í augum - menn hafa kallað eftir nýju millidómstigi sem taki mál til meðferðar á áfrýjunarstigi og kalli fyrir sig vitni til milliliðalausrar sönnunarfærslu. Björn Bjarnason tók nýja skipan ekki upp í frumvarpið sem hann lagði fyrir þingið í vetur en Orðið á götunni er að engu að síður sé nú að skapast samstaða um að slíkar breytingar megi ekki bíða lengur - og að þær verði gerðar næsta haust.

Orðið á götunni er að Þór Sigfússon, forstjóri Sjóvár, muni taka við stjórnarformennsku á aðalfundi Árvakurs, sem nú er á næsta leiti, og að það komi því í hans hlut að ganga frá ráðningu nýs ritstjóra í stað Styrmis Gunnarssonar, sem varð sjötugur í síðasta mánuði og mun láta af störfum í sumar eða í haust að því er talið er.

Orðið á götunni er að það auki líkurnar á því að Ólafi Þ. Stephensen, ritstjóra 24Stunda, verði boðin ritstjórastaðan á Mogganum að hann og nýi stjórnarformaðurinn eru gamlir vinir og vopnabræður úr hreyfingu ungra sjálfstæðismanna. Ólafur og Þór voru báðir formenn Heimdallar og voru í sömu hreyfingu í hörðum átökum sem þar voru háð á árunum í kringum 1990.

Orðið á götunni er að leigutakar margra laxveiðiáa séu farnir að ókyrrast yfir sumrinu. Það er ekki vegna þess að það séu slæmar veiðihorfur - menn hafa enga ástæðu til að óttast að svo sé - heldur eru áhyggjurnar sprottnar af ástandinu í bönkunum.

Undanfarin ár hafa bankarnir haldið veiðiréttareigendum og leigutökum uppi - gullár bankanna voru gullár veiðiréttareigendanna. Það var hægt að leigja allar sprænur út á góðu verði því bankarnir kepptust við að bjóða viðskiptavinum í lax - hvort sem þeir höfðu veitt áður eða ekki fengu þeir að spreyta sig fyrir 120.000 krónur á dag.

Nú eru þessir tímar að baki, bankarnir eru farnir að afboða sig og það verður lítið um laxveiðitúra á þeirra vegum í sumar.

Orðið á götunni er að það sé einföld ástæða fyrir því að Íbúðalánasjóður hélt ekki skuldabréfaútboð fyrir mánaðamót eins og starfsáætlun sjóðsins gerði ráð fyrir.

Ástæðan er sú að Jóhanna Sigurðardóttir, félagsmálaráðherra, skipaði stjórnendum sjóðsins að hætta við útboðið vegna mikils þrýstings sem samráðherrar hennar beittu hana, - fjármálaráðherra og forsætisráðherra.

Þetta er í fyrsta skipti sem Íbúðalánasjóður víkur frá áætlun um útboð - en ef sjóðurinn hefði farið á markaðinn hefði niðurstaðan orðið sú að lækka vexti niður í um 5,05%  og e.t.v. komið hreyfingu á markaðinn. En þessi efnahagsráðstöfun ríkisstjórnarinnar tryggir að af því verður ekki.

Orðið á götunni er að góður gangur sé í samningaviðræðum kennara við sveitarfélögin.  Í burðarliðnum er samningur til eins árs þar sem eingöngu verður tekið á launaþáttum en hluti samningsins er þegar kominn til framkvæmda í ýmsum sporslum og aukagreiðslum sem sveitarfélögin hafa þurft að taka upp að undanförnu til þess að halda fólki.