Eyjan.is

Orðið á götunni er að ræða Davíðs Oddssonar á landsfundi Sjálfstæðisflokksins í dag hafi verið síðasta sena hans á leiksviði stjórnmálanna í bili. Nú muni hann draga sig í hlé og rita æviminningar sínar. Þær muni hins vegar ekki koma út á þessu ári og varla á næsta ári.

Hitt er ekki dregið í efa að Davíð hefur frá mörgu að segja. Og að ýmsir stjórnmálamenn í öllum flokkum séu frekar órólegir þegar þeir hugsi um ævisögu hans. Davíð er hreinskilinn maður að eðlisfari og óvíst að hann hlífi nokkrum.

Orðið á götunni er að upphæðin sem Evu Joly verður greidd fyrir fjögurra daga vinnu á Íslandi sé ansi rausnarleg. Að minnsta kosti miðað við það sem þykir hátt á Íslandi í dag.

Eins og fram kom á Eyjunni í dag mun Eva fá 1,3 milljónir króna inn á bankareikninginn sinn í París í hverjum mánuði á næstunni. Það er sama upphæð og bankastjórar fá á Íslandi og vakið hefur hneykslun.

Hér mun hún hins vegar ekki dvelja nema að hámarki fjóra daga í mánuði. Góð daglaun það!, jafnvel þótt við sé bætt flugi og hótelkostnaði, sem óljóst er hvort er utan við launaupphæðina eða innifalið.

Orðið á götunni er að jafnvel hörðustu aðdáendur frú Evu hafi orðið fyrir vonbrigðum með launakröfur hennar. Tékkinn frá Jóhönnu Sigurðardóttur bætist við greiðslur sem hún þiggur annars staðar frá. Og svo er hún líklega að fara á Evrópuþingið sem fulltrúi græningja og þarf víst ekki að kvarta yfir launagreiðslunum úr sjóðum Evrópusambandsins.

Það vakti talsverða athygli þegar Orðið á götunni sagði frá því í nóvember 2007 að Davíð Oddsson þáverandi seðlabankastjóri hefði kallað FL Group FL Enron á fundi með erlendum fjármálasérfræðingum.

Sumum þótti þetta hneykslanleg ósvífni. Davíð væri með Baugsfyrirtækin á heilanum.

En hratt flýgur stund og viðhorfin breytast. Nú talar Gylfi Magnússon viðskiptaráðherra nánast um allt gamla bankakerfið sem eina stóra Enron-blekkingu. “Margt er líkt með skyldum”, sagði ráðherrann á blaðamannafundi í gær eins og lesa má í Fréttablaðinu í dag.

Og enginn kippir sér upp við þetta. Augljós sannindi!

Orðið á götunni er að enginn sé spámaður í sínu föðurlandi, að minnsta kosti ekki ef hann heitir Davíð Oddsson.

Orðið á götunni er að Kristján Þór Júlíusson alþingismaður hafi upphaflega ekki ætlað í formannsframboð í Sjálfstæðisflokknum en snúist hugur fyrir hvatningu manna sem taldir eru til stuðningshóps Guðlaugs Þórs Þórðarsonar í flokknum. Sagt er að Kristján Þór hafi meira að segja verið búinn að lýsa yfir stuðningi við framboð Bjarna Benediktssonar.

Guðlaugur Þór var sjálfur lengi talinn formannsefni, en eftir ófarir ríkisstjórnarinnar og úrslitin í prófkjöri sjálfstæðismanna í Reykjavík kom það ekki til greina.

Orðið á götunni er að það sé svokallaður Deigluhópur í Sjálfstæðisflokknum, nátengdur Geir H. Haarde núverandi formanni og Guðlaugi Þór, sem sé einna áhugasamastur um framboð Kristjáns Þórs. Sá hópur hefur verið mjög gagnrýninn á Davíð Oddsson, Björn Bjarnason og fleiri fyrrum valdamenn í Sjálfstæðisflokknum. Helstu foringjar Deigluhópsins eru Borgar Þór Einarsson lögfræðingur, sonur Ingu Jónu Þórðardóttur, Andri Óttarsson framkvæmdastjóri Sjálfstæðisflokksins og Þórlindur Kjartansson formaður Sambands ungra sjálfstæðismanna.

Orðið á götunni er að Bolli Thoroddsen, fyrrverandi formaður Heimdallar, muni einkum stýra kosningabaráttu Kristjáns Þórs á landsfundinum.

Orðið á götunni er að lítill vafi sé á að kjölfestueigendur gömlu bankanna komust upp með að reka þessa banka, sem þeir voru minnihluta eigendur í, fyrst og fremst út frá eigin hagsmunum – eins og þeir ættu þá alfarið.

Nú þegar hefur komið ljós að bankarnir lánuðu þessum minnihlutaeigendum og tengdum aðilum háar fjárhæðir, oft með veðum í ótryggum eignum eða eignum þar sem verðmæti er ofmetið vegna hárrar viðskiptavildar.  Og sú viðskiptavild varð oftar en ekki til vegna kaupa eða sölu á fyrirtækjum til skyldra aðila eða með einföldu endurmati eigenda á verðmæti þeirra.

Einnig hafa verið smíðaðar fyrirtækjaflækjur alla leið til fjarlægra landa sem bjóða skattleysi og leynd öllum sem þangað koma.  Þessi skattleysislönd eru ekki ný af nálinni og tilgangur þeirra sem þangað leita er alltaf (a) að komast hjá skattgreiðslum eða (b) að leyna eignum.

Orðið á götunni er að það vilji gleymast að þessir eigendur voru ekki einir á ferð og fundu þetta ekki upp hjá sjálfum sér.  Þeir höfðu bæði ráðgjafa sem lögðu þetta til og eftirlitsaðila (endurskoðanda) sem staðfestu að þetta væri í lagi.  Og þessir ráðgjafar og eftirlitsaðilar reyndust oft vera sami aðilinn – oftar en ekki stærri endurskoðunarfyrirtækin.

Og enn eru þessir sömu aðilar að vaxa og efnast vel á „ráðgjöf“ sinni og nægir þar að nefna þrjú dæmi:

1 Ráðningu KPMG til að rannsaka Glitni, þó þeir hafi ekki lokið því verki (KPMG var endurskoðandi Kaupþings og Straums fyrir hrun). 

2 Nýlega skipan í skilanefnd Straums sem borin er uppi af endurskoðendum og lögmönnum frá PwC (PwC var endurskoðandi Landsbankans og Glitnis fyrir hrun). 

3 Skipan eins af eigendum lögmannsstofnunnar Logos sem skiptastjóra þrotabús Baugs (starfsmenn og eigendur Logos hafa unnið beint og óbeint fyrir Baug).

Eini munurinn núna er að kaupandinn er íslenska ríkið – almenningur.  Fjármálaeftirlitið og dómstólar virðast áfram um að fela hugmyndasmiðum bólunnar ný arðsöm verkefni í stað þess að leita til annarra aðila sem komu þar hvergi nærri.  Það er kannski skortur á einhverju á Íslandi – en það er enginn skortur á færum endurskoðendum og lögmönnum og því nokkuð sérstakt að sömu aðilarnir verði fyrir valinu.

Margir líkja því sem hér gerðist við flækjurnar í Enron.  Þar var einmitt búin til mikil fyrirtækjaflækja m.a. til að keyra upp verð eða fela raunveruleg verðmæti.  Stærsta endurskoðunar- og ráðgjafarfyrirtæki heims á þeim tíma – Arthur Anderson LLP – reyndist þar hafa verið bæði ráðgjafinn sem bjó til flækjurnar og aðilinn sem staðfesti að þær væru í lagi (endurskoðun).

Strax við hrun Enron lenti fyrirtækið í vandræðum og nú er Arthur Anderson ekki lengur til.  Fyrirtækið skilaði inn endurskoðunarleyfi sínu og hætti árið 2002 þegar það hafði hlotið dóm vegna endurskoðunar á Enron.  Við það misstu 85.000 manns vinnu.  Heimasíðan þeirra er reyndar enn til þó heldur fátækleg sé.

Á Íslandi er hins vegar haldið áfram að versla við þá sem tóku virkan þátt í að búa til og samþykkja bóluna.

Orðið á götunni spyr sig hverjir skyldu annars sinna endurskoðunarþjónustu fyrir nýju bankanna?

Orðið á götunni er að það þurfi ekki að koma á óvart að Íslandspóstur hafi styrkt stjórnmálaflokkana í alþingiskosningunum vorið 2007, þótt fjárstuðningur ríkisfyrirtækja við flokka sé bannaður í lögum.

Orðið á götunni er að Íslandspóstur hafi markvisst unnið að því að leyna því að ríkið sé eigandi fyrirtækisins. Á vefsíðu Íslandspósts er að finna margvíslegar upplýsingar um fyrirtækið og stjórn þess, en hvergi kemur fram að ríkið sé eigandi. Mörgum finnst að framganga fyrirtækisins á markaðnum á undanförnum árum beri þess líka merki að stjórnendur hugsi eins þeir þurfi ekkert að taka tillit til samfélagslegra hagsmuna.

Orðið á götunni er að stjórnmálaflokkarnir, jafnvel flokkarnir í ríkisstjórn, hafi líklega verið búnir að gleyma því að Íslandspóstur er enn í eigu almennings! Mönnunum, sem gleymdu sér á bankavaktinni, er trúandi til slíks!

Svo virðist sem stjórnvöld vilji ekki heldur vita af króganum. Á vefsíðu samgönguráðuneytisins er listi yfir stofnanir og opinber hlutafélög sem heyra undir ráðuneytið. Þar er Íslandspóstur ekki nefndur á nafn, þótt samgönguráðherra fari með allt hlutafé fyrirtækisins.

Orðið á götunni er að Framsóknarflokkurinn sé nánast á suðupunkti vegna sífelldra árása forystumanna ríkisstjórnarinnar, ekki síst úr röðum Samfylkingarinnar, á helstu stefnumál flokksins. Óánægja framsóknarmanna birtist skýrt á bloggsíðum þeirra á netinu og ummælum sem þingmenn flokksins og formaður láta falla.

Orðið á götunni er að framsóknarmenn eigi hins vegar engan mótleik í stöðunni. Þeir lofuðu að verja minnihlutastjórnina falli og þeir geta ekki hlaupist frá því. Sigmundur Davíð Gunnlaugsson formaður Framsóknarflokksins staðfesti í Silfri Egils á sunnudaginn að flokkurinn mundi þrátt fyrir óánægju sína halda áfram að verja stjórnina.

Orðið á götunni er að margir framsóknarmenn telji að þeir hefðu átt að standa öðru vísi að stuðningi við ríksstjórnina til að tryggja að þeir hefðu sjálfir einhvern ávinning af rausnarlegu tilboði sínu. Nú stefnir í að eftir kosningar verði mynduð vinstri stjórn sem ekki þurfi á vernd Framsóknar að halda. Og ekki blæs byrlegar en svo í skoðanakönnunum að alls er óvíst hvort Sigmundur Davíð formaður nái kjöri á þing.

Orðið á götunni er að tengsl lögmannsstofunnar Logos við Baug og önnur félög Jóns Ásgeirs Jóhannessonar séu nánari en fram hefur komið. Þessi tengsl vekja spurningar um hæfi starfsmanns á lögmannsstofunni til að fjalla á óhlutdrægan hátt um þá gífurlegu fjárhagslegu hagsmuni sem í húfi eru þegar Baugur er tekinn til skipta. Gjaldþrotamál Baugs er hið stærsta sinnar tegundar í Íslandssögunni.

Ljósmyndin, sem er á úrklippu úr Markaðnum, viðskiptablaði Fréttablaðsins,  12. desember 2007, er tekin þegar Jón Ásgeir kom beint úr brúðkaupsferð sinni til landsins til að “redda málum” FL Group eins og blaðið orðaði það. Hún sýnir þegar Jón Ásgeir gengur út af aðalskrifstofu Logos með Hannesi Smárasyni, Þorsteini M. Jónssyni og Magnúsi Ármann eftir að stjórn FL Group hafði haldið stjórnarfund á lögmannsstofu Logos.

Orðið á götunni er að það verði varla seinna en í dag að Jóhanna Sigurðardóttir forsætisráðherra tilkynni að hún hafi látið undan þrýstingi og bjóði sig fram sem formaður Samfylkingarinnar á flokksþinginu í lok þessa mánaðar.

Margir áttu reyndar von á því að tilkynningin kæmi strax í gær þegar úrslitin í prófkjöri Samfylkingarinnar lágu fyrir. En þá átti víst eftir að vinna betur í kynningarmálum og láta það berast að 150 frammámenn í flokknum hefðu undirritað áskorun til hennar um að fara í framboð.

Tregari frambjóðandi fyrirfinnst víst ekki í íslenskri stjórnmálasögu.

Orðið á götunni er að innan stjórnarflokkanna sé áhugi á því að Vilhjálmur Bjarnason verði næsti forstjóri Fjármálaeftirlitsins. Hann er í hópi nítján umsækjenda um stöðuna.

Nokkrir þekktir menn eru meðal umsækjenda, þar á meðal Helgi Magnús Gunnarsson saksóknari efnahagsbrota.

“Forstjóri skal hafa menntun á háskólastigi og búa yfir víðtækri þekkingu og starfsreynslu á fjármagnsmarkaði”, segir í lögum um kröfur sem gerðar eru til yfirmanns Fjármálaeftirlitsins.

Það er þriggja manna stjórn Fjármálaeftirlitsins sem ræður forstjórann. Í henni eiga sæti Gunnar Haraldsson, forstöðumaður Hagfræðistofnunar Háskóla Íslands, sem er formaður, Kristín Haraldsdóttir, lögfræðingur og Jón Þ. Sigurgeirsson, framkvæmdastjóri, tilnefndur af Seðlabanka Íslands.

Orðið á götunni er að lögmaður frá lögfræðiskrifstofunni Logos verði á morgun skipaður skiptastjóri í þrotabúi Baugs Group hf. Orðið á götunni er að verði það raunin sé það með hreinum endemum sé tekið tillit til tengsla lögmannsstofunnar við hið gjaldþrota fyrirtæki.

Fyrir liggur að lögfræðistofan hefur annast lagalega ráðgjöf og almenna lögmannsþjónustu við Baug áður en félagið fór í þrot. Margir þeir samninga sem Baugur hefur gert á síðastliðnum árum koma án efa til skoðunar hjá skiptastjóra sem verður því dómari í eigin sök í mörgum tilvikum.

Aðeins eru nokkrir dagar frá því að til stofunnar var ráðinn Gunnar Þór Þórarinsson lögmaður en hann starfaði hjá Baugi Group frá 2008 til 2009. Þar áður starfaði hann sem fulltrúi á lögmannsstofu Hreins Loftssonar sem er hluthafi í Baugi.

Þá er Jakob Möller, lögmaður hjá Logos, aðstoðarmaður í greiðslustöðvun Stoða hf. sem Baugur er ráðandi hluthafi í. Jakob var ennfremur einn af verjendum fyrrum forstjóra Baugs, Tryggva Jónssonar, í hinu svokallaða Baugsmáli.

Orðið á götunni er að lögmenn séu margir yfir sig hneykslaðir á því að til standi að skipa lögmann hjá Logos í sæti skiptastjóra í þrotabúinu, enda hafi aldrei áður verið um jafn mikla hagsmuna að ræða í einu þrotabúi hér á landi. Miklu skipti að það sé hafið yfir allan vafa að skiptastjóri í þrotabúinu sé hlutlaus. Líklega sé vart að finna stofu sem tengist Baugi með jafn augljósum og nánum hætti og Logos, að lögmannsstofu Gests Jónssonar undanskilinni.

Orðið á götunni er að mikillar taugaspennu gæti nú í herbúðum stuðningsmanna Guðlaugs Þórs Þórðarsonar og Illuga Gunnarssonar vegna prófkjörsins í Reykjavík á laugardaginn. Þingmennirnir keppa um efsta sætið á prófkjörslistanum. Sá sem hreppir sætið verður að líkindum formaður þingflokks sjálfstæðismanna. Fyrsta sætið væri ávísun á ráðherrastól ef flokkurinn væri á leið í ríkisstjórn sem ekki getur talist sérstaklega líklegt eins og vindar blása um þessar mundir.

Kannanir sem birtar hafa verið sýna nokkra yfirburði Illuga, en deilt er um hve marktækar þær eru. Eins er á það bent að Guðlaugur Þór hafi yfir að ráða einkar öflugri kosningavél sem saman standi af áhugasömum kosningasmölum og fullkomnu tölvukerfi og menn skyldu ekki vanmeta þýðingu þess á kjördag

Í dag hefur sú saga gengið að stuðningsmenn Guðlaugs Þórs verði með kosningabombu á morgun, föstudag. Verði hún í því formi að óánægðir eigendur innistæðna í Sjóði 9 hjá Glitni birti heilsíðuauglýsingu í dagblöðunum þar sem Illugi verði sakaður um að bera ábyrgð á því að sjóðurinn gat ekki staðið við skuldbindingar sínar að fullu. Illugi sat um skeið í stjórn sjóðsins, Sjálfur telur Illugi sig ekkert hafa að fela í sambandi við sjóðinn og hefur birt á vefsíðu sinni spurningar og svör um sjóðinn og stjórnarsetu sína þar.

Orðið á götunni er að frumvarp Össurar Skarphéðinssonar iðnaðarráðherra um álverið í Helguvík kunni að stranda í þingnefndum á Alþingi og ekki fást afgreitt fyrir kosningar.

Orðið á götunni er að Álfheiður Ingadóttir þingkona VG beiti sér af hörku gegn frumvarpinu jafnt fyrir opnum tjöldum sem í bakherbergjum þingsins. Síðast í morgun lét hún þau orð falla á vefritinu Smugunni að “mikil vinna” væri framundan áður en hægt væri að afgreiða frumvarpið til 2. umræðu í þinginu. Það þyrfti að fara  til þriggja þingnefnda, iðnaðarnefndar, þar sem hún er varaformaður, efnahags- og skattanefndar og umhverfisnefndar.

Orðið á götunni er að Álfheiður og fleiri andstæðingar frumvarpsins í þingflokki VG séu staðráðin í því að bregða fæti fyrir álverið í Helguvík.

Fram hefur komið að Eva Joly fyrrum rannsóknardómari kom hingað til lands fyrir tilstuðlan Egils Helgasonar sjónvarpsmanns og Jóns Þórissonar arkitekts. Færri vita að Vigdís Finnbogadóttir, fyrrverandi forseti Íslands, sýndi ferð hennar til Íslands mikinn áhuga. Þær hittust á einkafundi, Vigdís mætti á fyrirlestur Joly í Háskólanum í Reykjavík í gær og orðið á götunni er að það hafi meðal annars verið fyrir hvatningu Vigdísar að Joly var ráðinn ráðgjafi stjórnvalda.

Vinátta mun hafa tekist á milli þessara tveggja kvenna sem hvor um sig hafa orðið miklir áhrifavaldar.

Orðið á götunni er að Jóhanna Sigurðardóttir muni taka áskorun flokksfélaga sinna í Samfylkingunni og bjóða sig fram til formennsku á flokksþinginu í lok þessa mánaðar.

Orðið á götunni er að hún ætli þó ekki að sitja lengi á formannsstól. Önnur formannsefni þurfa því að vera í viðbragðsstöðu áfram og sýna í verki að þeir séu réttmætir arftakar.

Orðið á götunni er að það hafi verið fljótfærnisleg ályktun á þessari síðu fyrr í dag að leið Dags B. Eggertssonar til forystu í Samfylkingunni væri bein og breið eftir að Jóhanna Sigurðardóttir og Össur Skarphéðinsson lýstu því yfir að þau sæktust ekki eftir að verða arftakar Ingibjargar Sólrúnar Gísladóttur.

Orðið á götunni er að miklu líklegra sé að ákaft verði þrýst á Jóhönnu Sigurðardóttur að gefa kost á sér til formennsku í flokknum til næstu tveggja ára. Sennilegt sé að hún eigi erfitt með að hafna slíkri áskorun, ef til dæmis allir þingmenn flokksins og fleiri áhrifamenn sameinast um hana. Kannanir sýna að kjósendur Samfylkingarinnar vilja Jóhönnu sem forystumann flokksins.

Orðið á götunni er að fallist Jóhanna á að taka að sér formennskuna verði Dagur B. Eggertsson og önnur formannsefni, svo sem Lúðvík Geirsson bæjarstjóri í Hafnarfirði, að sýna biðlund. Þeirra tími komi seinna. Þeir muni ekki bjóða sig fram gegn Jóhönnu.

Orðið á götunni er að eins og mál hafa þróast sé langlíklegast að Össur Skarphéðinsson verði í öðru sæti á framboðslista Samfylkingarinnar í Reykjavík, hinu frátekna sæti Ingibjargar Sólrúnar, og Dagur B. Eggertsson sitji áfram á stól sínum í ráðhúsinu.

Orðið á götunni er að Dagur B. Eggertsson borgarfulltrúi verði kjörinn formaður Samfylkingarinnar á landsþingi flokksins í lok þessa mánaðar. Hann mun að öllum líkindum fá yfirburðakosningu.

Ingibjörg Sólrún tilkynnti síðdegis í dag að hún ætlaði að hætta stjórnmálaþátttöku heilsu sinnar vegna. Það þarf ekki aðeins að kjósa nýjan formann heldur þarf að skipa framboðssæti það sem henni var ætlað í vor.

Orðið á götunni er að kjörnefnd Samfylkingarinnar í Reykjavík muni tilnefna Dag B. Eggertsson í framboð í stað Ingibjargar Sólrúnar.

Orðið á götunni er að frumvarp Össurar Skarphéðinssonar um álverið í Helguvík verði samþykkt með miklum meirihluta á Alþingi fljótlega án þess að það hafi nokkur vandræði í för með sér í stjórnarsamstarfinu. 

Orðið á götunni er að þingmenn VG, sem eru miklir andstæðingar álvera og stórvirkjana, muni flestir eða allir sitja frá við atkvæðagreiðsluna í stað þess að leggja stein í götu frumvarpsins.

Orðið á götunni er að þetta sé gjaldið sem þingflokkur VG greiði fyrir ráðherrastóla flokksins. Þeir séu taldir mikilvægari en álverið. Raunar mun það vera sannfæring VG að ástandið á álmörkuðum vinni gegn álverinu, hvað sem líður fjárfestingarsamingi Össurar Skarphéðinssonar og Helguvíkurmanna. Álverið í Helguvík muni ekki rísa í fyrirsjáanlegri framtíð.

Orðið á götunni er að það hafi vakið nokkra undrun meðal sjálfstæðismanna í Suðvesturkjördæmi þegar Þorgerður Katrín Gunnarsdóttir hóf í vikunni að birta auglýsingar þar sem hún óskar eftir stuðningi í 1.-2. sæti í prófkjöri flokksins í kjördæminu. Fyrirfram átti enginn von á öðru en að varaformaður flokksins og fyrrverandi ráðherra teldi 1. sætið hið eina sem rétt væri að stefna á.

Orðið á götunni er að með þessu sé Þorgerður Katrín að viðurkenna að hún finni fyrir ákveðnu andstreymi meðal sjálfstæðismanna í kjördæminu vegna bankahrunsins og umræðunnar um tengsl hennar við Kaupþing.

Orðið á götunni er að líkurnar á því að formannsefnið Bjarni Benediktsson hreppi 1. sætið í prófkjörinu hafi aukist til muna nú þegar Þorgerður Katrín kemur þeim skilaboðum óbeint á framfæri að hún geti sætt sig við 2. sætið.

Orðið á götunni er að mikil gremja hafi verið meðal fundarmanna á frambjóðendakvöldi Samfylkingarinnar í Reykjavík í gærkvöldi þegar í ljós kom að þrír helstu forystumenn flokksins létu ekki sjá sig. Þetta voru þau Ingibjörg Sólrún Gísladóttir, Össur Skarphéðinsson og Jóhanna Sigurðardóttir. Þótti fjarvera þeirra minna óþægilega mikið á hvernig þrjú efstu sætin á prófskjörlista flokksins í Reykjavík hefðu verið tekin frá og úthlutuð þessum sömu forystumönnum.

Nær allir aðrir frambjóðendur Samfylkingarinnarí Reykjavík mættu á fundinn sem haldinn var í kosningamiðstöð flokksins.

Fyrir fundinn sendi Samfylkingarfélagið í Reykjavík flokksmönnum í borginni fundarboð þar sem sagði: “Öflugur hópur fólks hefur nú gefið kost á sér til að taka sæti á lista flokksins fyrir þingkosningarnar. Flokksmönnum gefst nú einstakt tækifæri, að eiga eina og jafnvel tvær kvöldstundir með þessum góða hópi á Skólabrú í miðborg Reykjavíkur. Tvö næstu miðvikudagskvöld, 4. og 11. mars verðum við með kvöldstund með frambjóðendum og hefjast leikar um klukkan 20.30. að venju. Kvöldstundin verður með óhefðbundnu sniði, þ.e. engin ræðuhöld heldur mun ekki síður reyna á hversu góðir hlustendur frambjóðendurnir eru. Spjallað verður yfir kaffi og jafnvel öðrum veigum, flokksmenn og frambjóðendur sitja saman og ræða stjórnmál og hvaðeina sem okkur mun detta í hug.”