Eyjan.is

Orðið á götunni er að það hafi ekki verið nein tilviljun að Einar Örn Ólafsson hafi verið ráðinn forstjóri Skeljungs, eftir að hann var látinn fara frá Íslandsbanka sökum trúnaðarbrests.

Orðið á götunni er að Einar Örn hafi sem yfirmaður fyrirtækjasviðs gamla Glitnis sýnt tryggð sína í verki fyrir fyrrverandi og núverandi eigendur Skeljungs, sem margir hverjir voru nánir viðskiptafélagar Baugs og FL Group, sem þá voru helstu eigendur Glitnis.

Þannig annaðist Einar Örn sölu Pálma Haraldssonar á Skeljungi þegar hann þurfti mest á því að halda, en orðið á götunni er að kaupendur hafi ekki þurft að leggja fram raunveruleg veð til að kaupin ættu sér stað. Voru þau raunar kölluð pappírskaup á sínum tíma. Allir “græddu”.

Orðið á götunni er að Gunnar Karl Guðmundsson hafi verið ósáttur við ýmis vinnubrögð eigenda Skeljungs og ákveðið að yfirgefa skipið í skyndingu. Þá lá beinast við að bjóða Einari Erni Ólafssyni forstjórastólinn, enda heppilega laus eftir trúnaðarbrest við núverandi stjórnendur Íslandsbanka.

Orðið á götunni er að þjónusta Einars Arnar á glæstum útrásartímum Glitnis við Birgi Bielvedt og fleiri núverandi eigendur Skeljungs hafi komið sér vel þegar finna þurfti nýjan forstjóra.

Orðið á götunni er að málflutningur á hinu háa Alþingi hafi náð nýjum hæðum með þessum orðum:

“Ég geri athugasemd við að forseti skuli gera athugasemd við að við gerum athugasemd við að forseti geri athugasemd við að við gerum athugasemd við fundarstjórn forseta.”

Svo mælti einn þingmanna framsóknarflokksins í umræðum um þingsályktunartillögu ríkisstjórnarinnar um aðildarviðræður að Evrópusambandinu.

Orðið á götunni er að við fyrstu umræðu hafi endurspeglast hinn gamalkunni með-eða-á-móti málfutningur, sem á meira skylt við ræðukeppni en eiginleg stjórnmál.

Orðið á götunni er að þetta sé aðeins forsmekkurinn af því sem koma skal, framundan séu málfundaæfingar á Alþingi sem muni jafnvel toppa þessa fyrrnefndu tilvitnun.

Orðið á götunni er að stuðningsmenn bæjarfulltrúans Gunnsteins Gunnsteinssonar, 2. manns á lista Sjálfstæðisflokksins í Kópavogi, hafi undanfarna daga þreifað á lykilmönnum í baklandsins, um hvort Gunnsteinn myndi njóta stuðnings þeirra í bæjarstjórastólinn.

Meðal þeirra sem hafa þrýst mjög á Gunnstein er Helga Guðrún Jónasdóttir, formaður sjálfstæðiskvenna í Kópavogi, sem mun ásamt nokkrum hafa reynt að mynda sátt um að Gunnsteinn taki við bæjarstjórastólnum. Einnig munu þau Gunnsteinn hafa átt samtöl við framsóknarmenn í bænum og leitað eftir stuðningi samstarfsflokksins við þennan leiðangur.

Gunnsteinn bæjarfulltrúi og Helga Guðrún sátu þétt saman á fundi Sjálfstæðisfélagsins í bænum í fyrradag og höfðu bæði uppi nokkra gagnrýni á bæjarstjórann á fundinum. Gunnsteinn sagðist telja mikilvægt að málið yrði að fullu upplýst sem fyrst og sannleikurinn leiddur fram. Helga tók einnig til máls og skaut föstum skotum, en baðst undan því að koma í pontu, þar sem hún hefði ekki áhuga á að lenda fyrir framan sjónvarpsvélar Ríkissjónvarpsins sem fylgdust með öllu sem fram fór. Hún tók undir með Gunnsteini, um að hætta væri á að flokkurinn bæri varanlegan skaða af málum bæjarstjórans.

Fjölmargir fluttu líka ræður til varnar Gunnari m.a. eldklerkurinn sjálfur Gunnar í Krossinum, sem vitnaði í fleyg orð frelsarans „Sannleikurinn, hann mun gjöra yður frjálsa“ og sagði líka að það hefði einhvern tíma talist jákvætt að börn vildu vera nálægt foreldrum sínum í vinnu.

Orðið á götunni er að innan raða flokksins sé þó varla nægilegur stuðningur við Gunnstein í hlutverk arftakans í Kópavogi. Varaformaður flokksins, Þorgerður Katrín Gunnarsdóttir mun hafa viðrað þá skoðun að nauðsynlegt sé að finna reynslumikinn aðila sem flokksmenn geti sameinast um.

Orðið á götunni er að í herbúðum Gunnars séu menn rasandi yfir því að fá ekki meiri stuðning við bæjarstjórann litríka, t.d. frá Jóni Gunnarssyni, fyrrverandi formann fulltrúaráðs sjálfstæðismanna í Kópavogi og alþingismanns. Stuðningsmenn Gunnars telja sig eiga það inni hjá Jóni, eftir að prófkjörsvél Gunnars tryggði honum öruggt þingsæti í nýafstöðnum kosningum.

Það verkur og athygli að nær enginn málsmetandi sjálfstæðismaður virðist treysta sér til að lýsa yfir stuðningi við Gunnar nema Jóhann Ísberg, sem situr í skjóli Gunnar sem formaður sjálfstæðismanna í Kópavogi.

Og nú halda menn líka niðri í sér andanum vegna þess að málefni Klæðningar verða sjálfsagt næst á dagskrá. Kallaðar verða fram upplýsingar um t.d. eignarhald Gunnars á fyrirtækinu, sem hefur átt margháttuð viðskipti við bæinn. Komi t.d. í ljós að Gunnari hafi enn átt í fyrirtækinu eftir breytingar þar árið 2003 er ljóst að fjölmargir samningar bæjarins við fyrirtækið standast ekki gagnvart stjórnsýslulögum. Það þyrfti að ólgilda þá því Gunnar hafi tekið þátt í afgreiðslu margra þessara mála.

Orðið á götunni er að nýir eigendur Icelandair Group, skilanefndir og ríkisbankar, hljóti að huga að því fljótlega að endurskoða mismunandi sérviskulega sérsamninga fyrri eigenda við útvalda aðila flugelítunnar í landinu og færa reksturinn þannig nær hrollköldum staðreyndum viðskiptalífs dagsins í dag.

Orðið á götunni er að einn þessara samninga hljóti að skera sérstaklega í augu hjá ferða- og dagpeningateljurum ríkisins, ef hann er þá enn í gildi. Síðast þegar vitað var, eða um það leyti sem bankarnir voru að falla, flaug nefnilega einn fyrrum forstöðumanna FL-Group, Albert Jónsson, ennþá ókeypis um heiminn á Saga Class ásamt maka í boði Icelandair þótt hann ynni ekki lengur hjá félaginu. Þá voru eftir þrjú ár af þessum sérsamningi Alberts.

Orðið á götunni er að best geymda leyndarmál ríkisstjórnarinnar sé hið óopinbera samkomulag stjórnvalda, að halda gengi krónunnar sem lægstu. Hvorki ríkisstjórn né Seðlabanki muni reyna að styrkja krónuna, enda þótt hagsmunir heimila og fyrirtækja beinlínis æpi á að reynt verði að styrkja krónuna.

Einkum eru tvær ástæður fyrir því að stjórnvöld hafa ákveðið að halda genginu lágu:

Í fyrsta lagi er það hin klassíska leið til að fá meira fyrir útflutning og reyna að hefta innflutning. Lægra gengi þýðir hærra verð fyrir útflutningsafurðir og að sama skapi hækkandi verð á innfluttum vörum. Fyrir þá sem eru komnir á miðjan aldur minnir þessi staða óþægilega á síendurteknar gengisfellingar áttunda og níunda áratugarins, sem sagðar voru með hagsmuni útflutningsatvinnuvega í húfi en höfðu þær afleiðingar að eignir almennings brunnu upp líkt og í dag.

Önnur ástæða, sem minna hefur verið rætt um, er að eignir nýju ríkisbankanna þriggja eru bundnar erlendum eignum að stórum hluta og því “hagnast” bankarnir á lágu gengi, þó að almenningi í landinu blæði fyrir vikið. Þannig hafa stjórnvöld viljað halda genginu sem lægstu til að efnahagsreikningar bankanna líti betur út þegar þeir fá nýtt start í sumar. Orðið á götunni er að þetta virki heldur ósanngjarnt gagnvart heimilum í landinu, sem hafi á sínum tíma tapað á því að gengið var of hátt en eigi svo nú að tapa enn meiru á of lágu gengi.

Orðið á götunni er að ríkisstjórnin hafi fyrir allnokkru síðan ákveðið reyna að halda genginu lágu, þrátt fyrir hagsmuna heimila í hina áttina. Stjórnvöld hafi hinsvegar ákveðið að nefna það ekki upp opinberlega, enda ekki líklegt til vinsælda. Einn stjórnarþingmaður, sem varð á vegi orðsins á götunni í vikunni, sagðist gera sér grein fyrir þessari erfiðu þversögn, en því miður hafði hann ekki lausn á vandamálinu. Hann viðurkenndi líka að almenningur yrði að taka skellinn fyrir bankakerfið – í annað skipti á aðeins hálfu ári.

Orðið á götunni er að tilkynnt verði um nýjan aðalbankastjóra Seðlabankans á allra næstu dögum.

Umsækjendur um embættið voru hagfræðingarnir Arnór Sighvatsson, Ásgeir Jónsson, Jóhann Rúnar Björgvinsson,  Már Guðmundsson, Rannveig Sigurðardóttir, Tryggvi Pálsson, Yngvi Örn Kristinsson og Þorvaldur Gylfason.

Orðið á götunni er að Már Guðmundsson verði fyrir valinu. Hann er fyrrverandi aðalhagfræðingur Seðlabankans og er nú einn af yfirmönnum Alþjóðagreiðslubankans í Sviss. Hann þykir hafa yfirburðaþekkingu á málefnum seðlabanka og nýtur alþjóðlegs álits sem fagmaður á því sviði.

Orðið á götunni er að Össur Skarphéðinsson, á sínum endurnýjaða valdapósti í utanríkisráðuneytinu, fari hægt og varlega af stað í ókortlagða hættusiglingu Evróputillögunnar gegnum þingið.

Nú reyni á skipstjórnarhæfileika hins sjóaða garps sem þurfi að þræða leiðina með aðra aðalskrúfuna óvirka – eða kannski í bakkgír – framhjá boðum og brimsköflum með úrtöluraddirnar gjammandi á dekkinu og jafnvel uppi í brú. Eins gott að bógskrúfurnar virki og allir pólitískir radarar og dýptarmælar séu í standi!

Orðið á götunni er að þó að staða Össurar hafi aldrei verið sterkari né völd hans jafn mikil sé staða ESB málsins að sama skapi viðkvæm og flókin og lítið megi bera út af svo dallurinn snúist ekki og skipið liggi flatt fyrir öldunni. Á það er bent að staðan bjóði ekki upp á aflraunastjórnmál í hefðbundnum framkvæmdavaldsstíl og ekki er að sjá heldur að hún rúmi einhverja pólitíska skiptidíla. Umtöluð plottvísi ráðherrans komi honum því að litlu gagni í þessum Evrópuslag. Heppilegra er talið fyrir hann að spila opið, með kröfu tímans um gagnsæi og heiðarleika að leiðarljósi og kalla opið eftir því að þingmenn séu trúir eigin sannfæringu og stjórnarskránni.

Orðið á götunni er að Össur dusti nú rykið af grasrótaraðferðum sem hann notaði sem formaður Samfylkingarinnar á þeim tíma sem sá flokkur ákvað í almennri póstkosningu að stefna á aðild, fyrstur flokka.

Orðið á götunni er að Dagur B. Eggertsson borgarfulltrúi og varaformaður Samfylkingarinnar sé búinn að missa áhuga á borgarstjórnarpólitíkinni í Reykjavík. Frá áramótum hefur Dagur, sem er oddviti borgarstjórnarflokks Samfylkingarinnar, setið innan við 40% funda í borgarráði, sem er eins konar framkvæmdastjórn Reykjavíkurborgar. Innan Samfylkingarinnar hefur það vakið spurningar um fyrirætlanir Dags en hann var sem kunnugt er kjörinn varaformaður flokksins á landsfundi í lok mars og haft nánari afskipti af landsmálapólitíkinni en áður.

Dagur tók sem varaformaður Samfylkingarinnar virkan þátt í kosningabaráttunni fyrir alþingiskosningarnar og stjórnarmyndunarviðræðum Samfylkingar og Vinstri hreyfingarinnar — græns framboðs í kjölfarið. Þessar annir Dags hafa hins vegar bitnað á störfum hans fyrir Reykvíkinga. Af lestri fundargerða borgarráðs er ljóst að af 18 borgarráðsfundum, sem hafa verið haldnir frá ársbyrjun 2009, hefur Dagur aðeins setið 7 heila fundi eða í 39% tilvika. Hann lét ekki sjá sig á 8 fundum en í 10 skipti boðaði hann varamann í sinn stað. Síðast mætti hann í borgarráð 2. apríl og fór þá snemma af fundi.

Borgarráð er eina ráðið í stjórnkerfi Reykjavíkurborgar sem Dagur situr í en flestir aðrir borgarfulltrúar minnihlutans sitja í 2-3 fagráðum.

Orðið á götunni er að ekki séu öll flokkssystkin Dags ánægð með mætinguna og telji að áhugaleysi hans geti veikt stöðu flokksins í borginni. Hugur Dags beinist greinilega fremur að landsmálum, en innan flokksins telja sumir að Jóhanna Sigurðardóttir muni draga sig í hlé þegar Evrópumálin verða komin á rekspöl og Dagur taka við fyrir næstu þingkosningar. Segja þeir að hreinlegra væri að hann hætti afskiptum af borgarmálum og helgaði sig landsmálunum og minna á að borgarbúar hafi fengið sig fullsadda af borgarstjórum sem hlaupa frá borði.

Aðrir telja að kurr þessi sé þó fremur merki um að í hönd fari erfitt prófkjör Samfylkingarinnar fyrir borgarstjórnarkosningar. Hvíslað er um að Dagur hafi hug á því að endurnýja listann verulega, en það fellur núverandi borgarstjórnarfulltrúum misvel í geð. Staða Dags er hins vegar með þeim hætti að sækist hann eftir efsta sæti listans, eins og allt bendir til, er talið óhugsandi að nokkur bjóði sig fram gegn honum.

Mæting Dags B. Eggertssonar á borgarráðsfundum frá áramótum:

1 05.jan Sat heilan fund 
2 08.jan Sat heilan fund 
3 15.jan Mætti ekki á fund Boðaði varamann
4 22.jan Mætti ekki á fund Boðaði varamann
5 29.jan Tók sæti seint á fundi Boðaði varamann
6 05.feb Sat heilan fund 
7 12.feb Sat heilan fund 
8 19.feb Sat heilan fund 
9 26.feb Sat heilan fund 
10 05.mar Mætti ekki á fund Boðaði varamann
11 12.mar Sat heilan fund 
12 19.mar Tók sæti seint á fundi Boðaði varamann
13 26.mar Mætti ekki á fund Boðaði varamann
14 02.apr Fór snemma af fundi Boðaði varamann
15 16.apr Mætti ekki á fund Boðaði varamann
16 24.apr Mætti ekki á fund Boðaði varamann
17 25.apr Mætti ekki á fund Boðaði ekki varamann
18 07.maí Mætti ekki á fund Boðaði varamann 

Orðið á götunni er að mikið uppnám hafi orðið hjá skilanefnd Landsbankans í dag þegar fréttastofa Stöðvar 2 hóf að spyrja út í leynileg viðskipti skilanefndarinnar með stofnfjárhluti í BYR sparisjóði.

Ljóst sé að formaður nefndarinnar Lárus Finnbogason sé flæktur í málið, en eins og kom fram í fréttum Stöðvar 2 í kvöld, þá er hann endurskoðandi Reykjavik Invest, sem Landsbankinn tilkynnti BYR í síðustu viku að keypt hefði 2,6% af hlut gamla Landsbankans í sparisjóðnum. Svo virðist sem að Lárus hafi ekki upplýst félaga sína í skilanefndinni fyllilega um það sem hann var að bralla, því ráða má af stuttri og fremur óskýrri yfirlýsingu sem barst fjölmiðlum seint í kvöld, að nefndin hafi komið saman í kvöld og skipað formanni sínum að láta söluna ganga tilbaka.

Arnar Bjarnarson eigandi Reykjavik Invest, fjárfestingafélags með lítil umsvif á síðustu árum, keypti umrædd bréf en neitaði að gefa neitt upp um verð eða fjármögnun þeirra í samtali við fréttastofu Stöðvar 2 í dag. Orðið á götunni er að Arnar sé langt frá því að vera borgunarmaður fyrir þeim ríflega hálfa milljarði króna sem stofnfjárbréfin eru talin kosta. Þetta séu því annað hvort sýndarviðskipti (eins og þau sem áttu sér svo reglulega stað fyrir bankahrunið), eða þá að einhverjir huldumenn (Landsbankinn) hafi ætlað að lána honum fyrir kaupunum með litlum eða engum veðum.

Nafn Arnars hljómar e.t.v. kunnuglega í eyrum sumra. Hann er fyrrverandi prófessor á Bifröst, náinn trúnaðarmaður Guðna Ágústssonar og mikill áhrifamaður í Framsóknarflokknum. Arnar á meðal annars sæti í málefnanefnd miðstjórnar Framsóknarflokksins. Einnig starfaði hann um skamma hríð hjá MP Banka, en var sagt upp störfum þar.

Orðið á götunni er að einhverjir ákveðnir einstaklingar hafi séð tækifæri í því moldviðri sem risið hefur í kringum BYR og hugsað sér gott til glóðarinnar. Þeir hafi í samstarfi við skilanefndina fengið Arnar til að leppa bréf úr eigu gamla Landsbankans, stillt honum upp í framboð til stjórnar ásamt m.a. Herði Arnarssyni fyrrv. forstjóra Marels og svo hóað í Svein Margeirsson, dugmikinn hindrunarhlaupara og baráttumann fyrir bættum vinnubrögðum í BYR, til að ljá framboðinu aukinn trúverðugleika. Spyrja má hvaða augum þessi ötulli baráttumaður„fyrir bættu siðferði sparisjóða“ líti meðframbjóðanda sinn Arnar Bjarnarson nú þegar liggur fyrir hvernig stofnfjárhlutur Arnars kom til?

Þeir sem lögðu á ráðin um söluna til Arnars og valdatökuna í BYR, virðast hins vegar ekki hafa litið til þess að jafnræði og gagnsæi þarf að ríkja þegar að eigur ríkisins eru seldar. Og eins og fram hefur komið þá var 2,6% hluturinn í BYR hvergi auglýstur til sölu. Skattgreiðendur geta því ekki verið vissir um að þeir hafi átt að fá besta verð fyrir hlutinn, né um að raunveruleg viðskipti hafi verið að ræða en ekki sýndartilfærsla til að þjóna plotti fárra manna.

Þeirri kenningu hefur jafnframt verið kastað fram að stjórnendur Nýja Landsbankans kunni að tengjast málinu. Þeir hafi séð tækifæri í því að til yrði nýr sterkur eigendahópur í BYR-sparisjóði, með mögulega framtíðar sameiningarmöguleika á fjármálamarkaði í huga.

Orðið á götunni er að Lárusi Finnbogasyni sé vart sætt áfram sem formanni skilanefndar Landsbankans, eftir atburði dagsins. Slegið hafi verið harkalega á puttana á honum með ákvörðun skilanefndarinnar í kvöld. Trúnaðarbrestur hljóti að vera kominn upp á milli skilanefndarmanna og formannsins. Einnig sé Fjármálaeftirlitið varla kátt með að hafa fengið ákúrur vegna málsins frá Jóhönnu Sigurðardóttur, í fyrsta langa viðtalinu sem hún gefur eftir að ný ríkisstjórn tók við völdum. Málinu sé því hvergi nærri lokið. Skilanefnd með gríðarleg áhrif og eignir á sinni könnu, geti ekki setið þegjandi undir ásökunum um spillingu í sínum röðum. Upplýsa þurfi hvernig salan til Reykjavik Invest hafi komið til og hvort fleiri dæmi séu um leynilega eignasölu skilanefndarinna

Orðið á götunni er að stjórnarflokkarnir tveir, Samfylkingin og VG, hafi í dag misst af einstæðu tækifæri til að hringja inn nýja tíma í íslenskum stjórnmálum. Það hefðu þeir getað gert með því að hafa flokksráðs- og flokksstjórnarfundi sína opna fjölmiðlum og heimila að þeir væru sendir út beint.

Í staðinn var farin sú leið að flokksfólk, innvígt og innmúrað, fékk eitt aðgang og algjör leynd hvílir yfir umræðunum.

Orðið á götunni er að þetta sé ekki það Nýja Ísland sem almenningur hefur verið að bíða eftir.

Orðið á götunni er að litlar breytingar hafi orðið á leyndarhjúpnum sem stjórnvöld sveipa hin stærri mál lands og þjóðar þrátt fyrir stjórnarskiptin í febrúar og kosningasigur flokka sem sögðust ætla að leggja allt á borðið.

Skýrslur og gögn um bankahrunið, sem talað var um að birta, eru enn læst í skúffum. Mikilvægar skýrslur eru geymdar í læstum herbergjum sem eingöngu innvígðir fá aðgang að.

Þögn lykur einnig um störf rannsóknarnefndar um bankahrunið og sérstaks saksóknara. Ekkert hefur verið upplýst um það hverjir hafa verið yfirheyrðir, hverjir hafa stöðu grunaðra og hvar húsleitir hafa verið framkvæmdar.

Orðið á götunni er að þetta sé ekki nógu gott. Stjórnvöld eigi að upplýsa þjóðina um gang mála eins og lofað var í kosningabaráttunni.

Orðið á götunni reyndist hlaupa á sig þegar það fullyrti í gær að það væri opinbert vantraust ráðherra á Tinnu Gunnlaugsdóttur þjóðleikhússtjóra að staðan væri auglýst eftir fimm ára embættistímabil. Í lögum um Þjóðleikhúsið segir nefnilega að skylt sé að auglýsa stöðuna á fimm ára fresti.

Hitt stendur óbreytt að vangaveltur eru uppi um næsta þjóðleikhússtjóra og hefur nafn fráfarandi ráðherra VG verið nefnt í því sambandi.

Orðið á götunni er að ákvörðun Katrínar Jakobsdóttur menntamálaráðherra að auglýsa embætti þjóðleikhússtjóra sé bein vantraustsyfirlýsing á Tinnu Gunnlaugsdóttur sem gegnt hefur embættinu síðast liðin fimm ár. Sjaldgæft, ef ekki einsdæmi, er að embætti forstöðumanns ríkisstofnunar sé auglýst eftir aðeins fimm ára tímabil, þótt það sé heimilt lögum samkvæmt.

Orðið á götunni er að innan Vinstri hreyfingarinnar - græns framboðs vilji margir að Katrín Jakobsdóttir beiti ráðherravaldi sínu til að opna hinum fjölmörgu vinstri grænu leikurum landsins leið til áhrifa í leikhúslífinu. Ein leiðin væri að gera flokksmann að þjóðleikhússtjóra. Í því sambandi heyrist nefnt nafn Kolbrúnar Halldórsdóttur fyrrverandi leikkonu sem féll af þingi á dögunum og missir ráðherrastöðu sína um helgina.

Orðið á götunni er að ólíklegt sé að Katrín Jakobsdóttir láti undan þessum þrýstingi. Hún sé hugsjónakona sem ekki vilji að flokkurinn fái undir hennar stjórn nafnið Vinstri hreyfingin - grænt framapot!

Orðið á götunni er að fulltrúar Alþjóðagjaldeyrissjóðsins á Íslandi hefðu gjarnan vilja lækka stýrivexti Seðlabankans enn meira en gert var í dag. Þeir hafi áttað sig á því að núverandi vaxtastig sé að sliga atvinnulíf og heimilin.

Orðið á götunni er að þeir hafi samt ekki getað leyft peningastefnunefnd Seðlabankans að taka stærra skref en að lækka vexti í 13% Ástæðan er sú að miklar vaxtalækkanir eru ekki í samræmi við það sem tíðkast hefur hjá sjóðnum á undanförnum áratugum. Þar eru bara tekin stutt skref í einu. Það mundi setja vont fordæmi að lækka vexti í stórum stökkum. Skiptir engu þó vextir á Íslandi séu ofan við allt sem þekkist og tíðkast á byggðu bóli.

Orðið á götunni er að bjartsýnustu stuðningsmenn aðildar Íslands að Evrópusambandinu innan stjórnarflokkanna séu orðnir svo sannfærðir um að Ísland verði fljótlega orðið eitt aðildarríkjanna, að þeir séu farnir að bollaleggja um hver verði fulltrúi lands og þjóðar í hinni voldugu framkvæmdastjórn ESB.

Hvert aðildarríkja ESB á einn fulltrúa í framkvæmdastjórninni. Þeir eru stundum kallaðir ráðherrar eða kommissarar og fer hver með sitt ráðuneyti eða svið. Þetta er einhver eftirsóttasta hálauna-, virðingar- og valdastaða í stjórnkerfi vestrænna ríkja.

Orðið á götunni er að það sé rökrétt að sá maður sem nái samningum við ESB, sem Íslendingar samþykki í þjóðaratkvæðagreiðslu, fái sæti Íslands í framkvæmdastjórninni í viðurkenningarskyni.

Þá er að velja formann íslensku samninganefndarinnar. Orðið á götunni er að um það sé ekki samkomulag á milli Samfylkingarinnar og VG, enda hefur málið svo sem ekki komist á dagskrá formlega. Sagt er að áhugi sé á því innan VG að fá Svavar Gestsson sendiherra, gamlan baráttufélaga Steingríms J. Sigfússonar úr Alþýðubandalaginu, í verkefnið. Samfylkingin er sögð hafa aðrar hugmyndir, en hefur engin nöfn nefnt upphátt.

Orðið á götunni er að aðeins tveir nýir ráðherrar bætist í ríkisstjórnina sem væntanlega verður mynduð um helgina. Samfylkingarmaðurinn Árni Páll Árnason verði dómsmálaráðherra í stað Rögnu Árnadóttur sem víki úr stjórninni. Svandís Svavarsdóttir verði umhverfisráðherra í stað Kolbrúnar Halldórsdóttur sem fallin er af þingi.

Samkvæmt þessu verður Gylfi Magnússon áfram viðskiptaráðherra eins og nefnt var hér í gær.

Orðið á götunni er að frekari breytingar á ríkisstjórninni kunni að verða gerðar þegar líður á næsta vetur og breytingar hafa verið gerðar á ráðaneytaskipan eins og stefnt mun að með nýrri löggjöf.

Orðið á götunni er að forseti Íslands, Ólafur Ragnar Grímsson, hafi ekki bara beitt Sigmund Davíð Gunnlaugsson, formann Framsóknarflokksins, þrýstingi til að fá hann til að styðja minnihlutastjórn Samfylkingarinnar og Vinstri grænna eins og Stöð 2 sagði frá í fréttum í kvöld. Hann hafi beinlínis ávítað hann í löngu símtali þegar honum fannst hinn ungi flokksformaður ekki spila rétt úr stöðunni.

Slík afskipti forseta af stjórnarmyndun eru einsdæmi á síðari árum.

Orðið á götunni er að Ólafur Ragnar hafi verið mikið niðri fyrir þegar hann hringdi í Sigmund Davíð síðdegis föstudaginn 30. janúar. Nánir trúnaðarmenn formannsins urðu vitni að samtalinu. Forsetinn hafði þá fregnað að Framsóknarflokkurinn vildi skoða betur málefnasamning væntanlegrar ríkisstjórnar og fá flokkana til að taka tillit til efnahagstillagna sem framsóknarmenn höfðu fengið frá hagfræðingunum Jóni Daníelssyni í London og Ragnari Árnasyni. Ef þetta gengi eftir yrðu fyrri áform um að halda ríkisráðsfund á Bessastöðum um helgina að engu.

Orðið á götunni er að forsetinn hafi lesið formanni Framsóknarflokksins pistilinn myndarlega og leitt honum fyrir sjónir að hann væri að eyðileggja einstakt tækifæri til að koma Sjálfstæðisflokknum frá völdum með því að tefja stjórnarmyndunina.

Orðið á götunni segir ekkert um það hvað formaður Framsóknarflokksins hugsaði meðan á símtalinu stóð. En daginn eftir kom þingflokkur Framsóknar saman og gaf grænt ljós á myndun ríkisstjórnarinnar sunnudaginn 1. febrúar.

Orðið á götunni er að Gylfi Magnússon viðskiptaráðherra kunni að halda embætti sínu í nýju ríkisstjórninni þvert á orðróm sem rakinn var hér í fyrr í dag um að báðir utanþingsráðherrarnir væru á leið úr stjórninni vegna ásóknar stjórnarliða í ráðherrastöður.

Orðið á götunni er að þótt forystumenn stjórnarflokkanna séu ekki af neinni alvöru byrjaðir að skipuleggja skiptingu ráðuneyta og ráðherrastöður í nýju ríkisstjórninni meti nánir samstarfsmenn þeirra það svo, að línan sé að einn maður að lágmarki utan þings og flokkanna verði meðal ráðherra.

Orðið á götunni er að verði þetta niðurstaðan sé langlíklegast að pláss verði fundið fyrir Gylfa Magnússon við ríkisstjórnarborðið. Og þá sé sennilegt að hann verði áfram í viðskiptaráðuneytinu.

Orðið á götunni er að utanþingsráðherrarnir Gylfi Magnússon og Ragna Árnadóttir verði ekki ráðherrar í næstu ríkisstjórn Samfylkingarinnar og VG. Ásókn stjórnarþingmanna í ráðherrasæti sé svo mikil að ekkert pláss sé til ráðstöfunar við ríkisstjórnarborðið.

Forystumenn stjórnarflokkanna, Jóhanna og Steingrímur, halda þó enn öllu opnu, en flestir telja að það sé einkum fyrir kurteisissakir.

Orðið á götunni er að Gylfi Magnússon viðskiptaráðherra sé þegar farinn að undirbúa að pakka saman. Aðstoðarmaður hans, Helga Valfells, er hætt störfum og enginn verið ráðinn í staðinn. Einnig er Þorfinnur Ómarsson blaðafulltrúi ráðuneytisins hættur. Hann fær ekki endurnýjun ráðningarsamnings þar sem Gylfi telur sig ekki geta skuldbundið ráðuneytið þegar hann hefur enga vissu fyrir því hve lengi hann situr á ráðherrastólnum.

Orðið á götunni er að smáauglýsingadálkur Morgunblaðsins í dag sýni verulegt umburðarlyndi stjórnenda blaðsins gagnvart því hvernig þessi vettvangur er notaður.

Í dag eru stolnar fartölvur auglýstar kinnroðalaust á bls. 28, eins og úrklippan sýnir, og einnig á smáauglýsingavef blaðsins. Gefið er upp óskráð símanúmer.

Nú er svo sem ekki að efast um að hér er einhver á ferð sem telur að svona auglýsingar séu fyndnar. Draga verður í efa að lesendur blaðsins deili þessu skopskyni með auglýsandanum, enda hefur margur maðurinn orðið fyrir því að fartölvu hans hefur verið stolið og síðan falboðin á svarta markaðnum.