Hugmyndirnar um stórkostlegar hamfarir af völdum loftslagsbreytinga spretta af trúarlegri þrá – sem einnig birtist í stjórnmálahugmyndum eins og kommmúnisma og nasisma – eftir heimsslitum; atburði sem toppar alla hina.
Syndaflóði.
Þetta er mjög blandið djúprættri sektarkennd sem virðist vera fylgifiskur mannsins frá örófi alda. Að maðurinn sé spilltur í eðli sínu og eigi að að gjalda fyrir það. Nú felst erfðasyndin í því að við höfum syndgað gegn plánetunni – ekki gegn guði eins og í kristindóminum.
Fleira í þessu er með trúarlegu yfirbragði. Þeir sem gagnrýna þessar hugmyndir – eða benda einfaldlega á að dómsdagur sé ekki endilega í nánd – eru kallaðir afneitarar. Þeir eru villutrúarmenn og eru úthrópaðir sem slíkir.
Al Gore fer um heiminn eins og farandtrúboði með tjald sitt. Eins og títt er um slíka prédíkara snýst þetta dálítið um peninga líka. Gore fær morð fjár fyrir að koma fram. Hann veitir ekki viðtöl nema hann fái sérstaklega borgað fyrir það. Er ekki til viðtals fyrir efasemdamenn.
Gore lifir heldur ekki endilega samkvæmt boðskapnum sjálfur. Þess er kannski ekki heldur þörf – hinir sanntrúuðu koma hvort sem er.