Fyrir nokkrum árum var ég fenginn til að vera ásamt fleira fólki í svokölluðum rýnihópi vegna uppbyggingar á Höfðasvæðinu.

Hópurinn hittist tvisvar að mig minnir. Allir í honum voru sammála um að byggingar þarna yrðu að vera á hóflegum mælikvarða, það yrði að gæta vel að tengja við byggðina í kring; alls ekki mætti hrúga niður of miklu byggingamagni.

Fundirnir fóru fram í mestu vinsemd. Mig minnir að við höfum fengið gjafakörfu með víni og einhverju fíneríi að launum.

Svo var farið að byggja á Höfðasvæðinu og þá sá maður að ekkert mark hafði verið tekið á þessum hópi.

Nákvæmlega ekkert. Þessi svokallaða rýni var bara yfirvarp.

Það var passað upp á að hafa byggingarnar eins stórar og þunglamalegar og hugsast gat; fyllt upp í hvern rúmmeter þar sem hægt var að byggja.

En því er ég að skrifa þetta að mér voru sendar í dag þessar teikningar af fyrirhugaðri byggð í Kringunni. Með stækkaðri verslunarmiðstöð og háum turnum.

Er hugsanlegt að menn hafi aðeins ofmetið hvað þarf að byggja mikið fyrir 300 þúsund manna þjóð?