Þetta virkar eins og einhvers konar skrípaleikur.
Farsi sem mætti setja upp í Þjóðleikhúsinu.
Eða hvað á að segja um svona viðskipti, sbr. fréttastofu Rúv:
Kaupþing fjármagnaði kaup Al-Thani
Kaupþing fjármagnaði sjálft viðskipti kaupsýslumanns frá Katar þegar hann eignaðist 5% hlut í bankanum í haust. Lánið greiddi hann upp með fyrirframákveðnum hagnaði af gjaldeyrissamningi við Kaupþing.
Þetta er fullyrt í Morgunblaðinu í dag. Tvö félög á Jómfrúreyjum lánuðu því þriðja fyrir kaupunum. Féð fengu þau frá Kaupþingi. Veðið voru bréfin sjálf. Annað þessara félaga var í eigu Ólafs Ólafssonar, í Samskipum, þá næst stærsta eiganda gamla Kaupþings.
Hitt félagið var í eigu kaupandans, Sheik Mohamed bin Khalifa Al-Thani. Þriðja félagið lánaði svo Q Iceland Finance ehf, fyrirtæki Sheiksins hér á landi. Á það var svo 25 milljarða hluturinn í Kaupþingi skráður.
Kaupþing og Sheikinn gerðu síðan með sér samning sem tryggði honum ávinning í evrum, -segir Morgunblaðið. Evrurnar keypti bankinn af Al-Thani á yfirverði. Með mismuninum greiddi hann upp lánið fyrir hlutabréfunum, í gegnum Kaupþing í Lúxemborg.
Njóti maður slíkra kjara – þarf maður ekki að vera neinn Sheik til að kaupa sér banka. Þess vegna skoðar nú Fjármálaeftirlitið málið. Það ætti að vera einfalt, -enda er Q Iceland Finance, -aðeins nokkrum húsum frá eftirlitinu.
Að Suðurlandsbraut 18 er reyndar fjöldi fyrirtækja, -nöfn sumra hljóma kunnuglega í eyrum. Þarna eru Kjalar, Ker, Egla, Gift, Samvinnusjóðurinn og fleiri og fleiri. Samtals eru 109 fyrirtæki skráð þar til húsa.
Eitt þeirra er lögfræðistofan Fullthingi, -þar sem starfa bæði Kristinn Hallgrímsson, stundum kallaður lögmaður S-hópsins og Telma Halldórsdóttir, stjórnarmaður í Q Iceland Finance ehf og talsmaður Sheiks Al-Thani hér á landi. Fyrir hádegi á fimmtudag lofaði hún, að síðar sama dag, kæmi yfirlýsing frá Sheiknum vegna þessara mála. Ekkert bólar á henni enn.“